Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 21

1-8 У кава ден у мланде. 9– 22:5 У Иерусалим.

1Вара мый у кава ден у мландым ужынам. Ончычсо кава ден ончычсо мланде пытеныт, теҥызат ынде уке.2Мый, Иоанн, святой олам, у Иерусалимым, ужынам. Тудо качылан сӧрастарыме марлан лекшаш ӱдыр семын ямдылыме улмаш да пылпомыш гыч Юмо деч волен.3Пылпомыш гыч виян йӱкым колынам, тудо ойлен: «Теве, Юмын илемже ынде айдеме коклаште. Тудо нунын пелен илаш тӱҥалеш, нуно Тудын калыкше лийыт, да Юмо, нунын Юмышт, Шкежак нунын коклаште лиеш.4Юмо нунын чыла шинчавӱдыштым ӱштылеш. Ынде колымаш ок лий, ойгат, мӱгырен шортмашат, черат ок лий, вет ончычсо эртен.

5Престолышто Шинчыше каласен: «Теве, Мый чылажымат уым ыштем». Вара ойлен: «Возен нал, вет нине шомак чын да ӱшанле улыт».6Адак мылам ойлен: «Шукталтын. Мый Альфа да Омега, Тӱҥалтыш да Мучаш улам. Мый йӱмӧ шушылан илыш вӱд памаш гыч вӱдым яра пуэм.7Сеҥыше чыла тидын наследникше лиеш, а Мый тудын Юмыжо лиям, тудо Мыйын эргым лиеш.8Но лӱдшӧ, ӱшанымаш деч кораҥше, шакше, еҥым пуштшо, яжарланыше ден юзо-влакын, шояк юмылан кумалше-влакын да чыла шоячын ужашышт – йӱлышӧ кишан ер. Тиде – кокымшо колымаш».

9Пытартыш шым эҥгекым темыман шым чашым кучышо шым Суксо кокла гыч иктыже толын да мыланем каласен: «Тол, мый тыланет Пачан налшаш ӱдыржым, вате лийшашыжым, ончыктем».10Тудо мыйым шӱлыш дене кугу да кӱкшӧ курыкыш наҥгаен, да пылпомыш гыч Юмо деч волышо кугу олам, святой Иерусалимым, мылам ончыктен.11Юмын чапше тудын уло, олаже шергакан кӱ семын, хрусталь гай яндар яспис кӱ семын йолген.12Ола йыр кугу да кӱкшӧ пырдыж лийын, тушто – латкок капка, капкаште латкок Суксо. Капка ӱмбалне лӱм-влакым возымо, тиде – Израиль эрге-влакын латкок тукымын лӱмышт.13Эрвел могырым кум капка, йӱдвел могырым кум капка, кечывалвел могырым кум капка да касвел могырым кум капка.14Олан пырдыжшын латкок негызше лийын, да тушто – Пачан латкок Апостолжын лӱмышт.

15Мый денем мутланыше Суксын олам да тудын капка ден пырдыжшым висаш шӧртньӧ тояже лийын.16Ола ныл лукан лийын, тудын кутышыжо – лопкытшо гаяк. Суксо тояж дене олам висен, висымыже латкок тӱжем стадий лийын: тудын кутышыжо, лопкытшо да кӱкшытшӧ икгай.17Вара пырдыжым висен, айдемын висаж дене келшышын, тудо шӱдӧ нылле ныл кынергут лийын, Суксынат висаже тыгаяк.18Пырдыжшым яспис дене ыштыме, а олаже ару янда гай яндар шӧртньӧ лийын.19Олан пырдыж негызшым тӱрлӧ шергакан кӱ дене сӧрастарыме: икымше негызым – яспис дене, кокымшым – сапфир дене, кумшым – халкидон дене, нылымшым – смарагд дене,ӈ20визымшым – сардоникс дене, кудымшым – сердолик дене, шымшым – хризолит дене, кандашымшым – вирилл дене, индешымшым – топаз дене, луымшым – хризопрас дене, латикымшым – гиацинт дене, латкокымшым – аметист дене.21А латкок капка латкок ракывотшер пырче лийын: кажне капкаже ик ракывотшер пырче гыч шоген. А олан уремже – вошт койшо янда гай яндар шӧртньӧ.

22Мый олаште храмым ужын омыл, вет тудын храмже – Чылакучышо Господь Юмо да Пача.23Олам волгалтараш кечат, тылзат ок кӱл: Юмын чапше тудым волгалтара; тудын волгалтарышыже – Пача.24Тиде олан волгыдыштыжо утарыме калык-влак кошташ тӱҥалыт. Мландӱмбалсе кугыжа-влак чапыштым да пагалымашыштым тушко кондат.25Капка-влакшым кечывалым петыраш огыт тӱҥал, а йӱд тушто ок лий.26Тушко калык-влакын чапыштым да пагалымашыштым кондат.27Тушко нимо амыргыше, йырныкым да шоям ыштыше нигӧ ок пуро. Пачан илыш книгашкыже возымо-влак веле тушко пурат.


*а 21:19-20 Таче нине кӱ гыч южыштым вес семын лӱмдат: яспис – яшме, халкидон – халцедон, смарагд – изумруд, вирилл – берилл, хризопрас – хризопраз.

предыдущая глава Глава 21 следующая глава