Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 19

6-10 Пачан сӱан сийже. 11-21 Ош имне ӱмбалне имнешке.

1Тылеч вара мый пылпомыш гыч шуко калык тӱшкан гай виян йӱкым колынам. Нуно ойленыт:
«Аллилуия! Утарымаш, чап, пагалымаш да куат мемнан Юмынан:
2Тудын судитлымыже чын да поро,
яжарланымыж дене мландым локтылшо
кугу яжарым Тудо судитлен
да тарзыж-влакын вӱрыштым йоктарыме верч
тудын кидше гыч тӱлыкташ йодын».
3Вара угычын кычкыралыныт:
«Аллилуия! Тудын йӱлымӧ шикшыже
курым-курымеш нӧлталтеш!»
4Коло ныл старец да ныл илыше кумык возыныт да престолышто шинчыше Юмылан вуйым савен ойленыт:
«Аминь! Аллилуия!»
5Престол деч йӱк лектын:
«Мемнан Юмынан тарзыже-влак,
Тудлан лӱдын кумалше-влак,
изиже-кугужо чылан Тудым моктыза!»

6Вара мый моткоч кугу тӱшкан гай, кугу вӱд лӱшкымӧ гай, кӱдырчӧ виян кӱдыртымӧ гай йӱкым колынам. Тудо ойлен:
«Аллилуия! Чылакучышо Господь Юмо
кугыжаланаш тӱҥалын.
7Куанышаш да йывыртышаш, Тудым чапландарышаш улына,
вет Пачан сӱанже шуын,
да Тудын налшаш ӱдыржӧ шкенжым ямдылен.
8Тудлан чияш ару волгалтше виссон вургемым пуымо».
Виссонжо святой-влакын чын пашашт лиеш.9Суксо мылам каласен: «Возо: Пачан сӱан сийышкыже ӱжмӧ-влак поро пиалан улыт». Вара ешарен: «Ниныже Юмын чын шомакше улыт».10Тунам мый, вуйым саваш манын, тудын йолжо деке кумык возынам, а тудо мылам ойлен: «Ончо, тыге ит ыште! Мый тый денет да Иисусын таныклымыжым кучышо иза-шольыч-влак дене пырля служитлыше улам. Юмылан вуетым саве». А Иисусын таныклымыже пророкла каласкалымын шӱлышыжӧ улеш.

11Мый почылтшо пылпомышым ужынам: теве ош имне, а ӱмбалныже шинчышым Ӱшанле да Чын манын лӱмдымӧ. Тудо чын почеш судитла да кредалеш.12Тудын шинчаже – тулйылме гай, вуйыштыжо шуко диадим. Тудын возымо лӱмжӧ уло, тиде лӱмым Шкеж деч весе нигӧ ок пале.13Тудо вӱр дене йошкаргыше вургеман лийын, да Тудын лӱмжӧ – Юмын Шомакше.14Ош ару виссон вургеман пылпомышсо сарзе-влак, ош имньым кушкыжын, почешыже каеныт.15Умшаж гыч пӱсӧ керде лектын, тудын дене калык-влакым пытарышаш улмаш. Нуным Тудо кӱртньӧ тоя дене кӱташ тӱҥалеш, виноградым темден лукмо верыште Чылакучышо Юмын шыдыжын да чот сырымыжын аракажым Шке тошкен ышта.16Тудын вургемешыже да эрдешыже «Кугыжа-влакын Кугыжашт, господь-влакын Господьышт» манын возымо лӱм уло.

17Мый кечыште шогышо ик Суксым ужынам. Кӱшнӧ каваште чоҥештылше кайык-влаклан тудо кугу йӱк дене кычкыралын: «Толза, Юмын кугу кас кочкышышкыжо погыныза!18Кугыжа, сарзывуй да виян-влакын капыштым, имне да имнешке-влакын капыштым, чыла эрыкан да кулын, изи еҥын да кугу еҥын капыштым кочса!»19Вара мый янлыкын, мландысе кугыжа-влакын да нунын сарзе-влакыштын погынымыштым ужынам. Нуно имне ӱмбалне Шинчыше дене да Тудын сарзыже-влак дене кредалаш ямдылалтыныт.20Но янлыкым руалтен кученыт, тудын ончылно палдарыше палым ончыктышо шояк пророкымат пырля кученыт. Чудыжо-влак дене тудо янлыкын палыжым налше да янлыкын тӱсшылан вуйым савен кумалше-влакым ондален улмаш. Нуным когыньыштымат илышынек киш дене йӱлышӧ тулан ерыш шуымо.21А молыштым имне ӱмбалне Шинчышын умшаж гыч лекше керде дене пуштмо, да кайык-влак, нунын колышо капыштым кочкын, чылан темыныт.


*а 19:8 Виссон – йытын мушын эн вичкыж да эн чапле ярымже (ужашыже).

предыдущая глава Глава 19 следующая глава