Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 18

1– 19:5 Вавилонын шаланымыже.

1Тылеч вара мый пылпомыш гыч адак ик Суксо волымым ужынам. Тудын моткоч кугу властьше улмаш, да мланде тудын чапше дене волгалтарыме лийын.2Суксо виян йӱк дене кычкыралын:
«Сӱмырлен, кугу Вавилон ола сӱмырлен!
Тудо ия-влакын илыме верышт,
чыла осал шӱлышын шылме верже
да чыла шакше да йыгыжге кайыкын шылме верже лийын.
Вет тудо яжарланыме шыде аракажым чыла калыклан йӱктен,
3мландӱмбалсе кугыжа-влак тудын дене пырля яжарланеныт
да мландӱмбалсе сатузо-влак
тудын моткоч ракатланен илымыжлан кӧра поеныт».
4Вара пылпомыш гыч вес йӱкым колынам, тудо ойлен:
«Мыйын калыкем, тиде ола гыч лек!
Уке гын, тудын языкышкыже ушнет
да тудын дене пырля эҥгекыш логалат.
5Тудын языкше пылпомышыш шумеш шуын,
да Юмо тудын чын огыл ыштымыжым шарналтен.
6Кузе тыланда пуэн, тудлан тугак пуыза,
пашажлан кӧра кок пачаш ешарен пӧртылтыза.
Весылан аракам варен ямдылыме чашыштыже шкаланже кок пачаш варен ямдылыза.
7Кунар тудо шкенжым чапландарен да ракатланен илен,
тунар орланымашым да ойгым тудлан пуыза,
вет шке шӱмыштыжӧ тудо ойла:
”Кугыжала шинчем, мый тулык вате омыл да ойгымат ом уж”.
8Сандене эҥгекше ик кечыште толеш:
колымаш, шортмаш да шужымаш.
Тудо тул дене йӱлалтыме лиеш,
вет тудым титаканыш лукшо Господь Юмо виян.
9Тиде ола дене яжарланыше да ракатланыше мландӱмбалнысе кугыжа-влак тудын йӱлымӧ шикшыжым ончымышт годым тудын верч мӱгырен шорташ тӱҥалыт.10Нуно, тудын орланымыж деч лӱдын, ӧрдыжтӧ шогат да ойлат:
”Ойго, ойго тыланет, кугу ола,
Вавилон, пеҥгыде ола!
Тыйым судитлымаш иканаште толын!”
11Мландӱмбалсе сатузо-влак тудын верч шортыт да ойгырат, вет нунын сатуштым ынде нигӧ ок нал:12шӧртньӧ ден шийым, шергакан кӱм, ракывотшерым, мотор йытын вынерым, шемалге-йошкар куэмым, порсыным, чевер куэмым, тӱрлӧ тамле пушан пушеҥгым, слон лу дене ыштыме тӱрлӧ ӱзгар-влакым, эн шергакан пушеҥге, вӱргене, кӱртньӧ, мрамор дене ыштыме ӱзгарым,13корицым, фимиамым, миром, ладыным, йошкар аракам, олив ӱйым, ложашым, шыдаҥым, вольыкым, шорыкым, имньым, орвам, айдеме капым да чоным.14
”Уло чонет дене налаш шонымо саскат тый дечет каен,
чыла поян да чапле тый дечет йомын,
ынде нуным нигунам от му.”
15Чыла нине сатум налше да ужалыше, тиде яжар олалан кӧра пойышо сатузо-влак, тудын орланымыж деч лӱдын, ойгырен шортын ӧрдыжтӧ шогат да16ойлат:
”Ойго, ойго тыланет, кугу ола!
Тый мотор йытын вургемым,
шемалге-йошкаргым, чеверым чийыше,
шӧртньӧ, шергакан кӱ да ракывотшер дене
сӧрастарыме лийынат.
17Ик шагатыште тыгай поянлык пытен!”
Корабль виктарыше, корабль дене ийын коштшо, корабльыште ыштыше да теҥыз кӱшеш илыше-влак чылан ӧрдыжтӧ шогеныт18да, тудын йӱлымӧ шикшыжым ончен, кычкыралыныт: ”Тиде кугу ола гай вес ола уло мо?”19Нуно вуйышкышт пуракым шавеныт да ойгырен-шортын кычкыреныт:
”Ойго, ойго тыланет, кугу ола!
Кӧн теҥыз корабльже лийын,
олан шергакан сатуж дене чылан поеныт,
но ик шагатыште чыла пытен”.
20Пылпомыш, святой-влак, Апостол ден пророк-влак, тудын дене мо лиймылан куаныза: тендам тудо кузе судитлен, тудым Юмо тугак судитлен».21
Вара куатан ик Суксо кугу вакшкӱ гай кӱм налын, теҥызыш шуэн да ойлен:
«Тыгай вий дене кугу Вавилон олат кудалтыме лиеш,
ынде тудым огыт му.
22Кӱсле дене шоктымым,
мурымым, шиялтыш дене шоктымым,
пучым пуалтымым тыйын уремыштет ынде огыт кол,
пашаштлан уста тӱрлӧ кидмастар-влакым тыште ынде огыт му,
вакш йоҥыштымо йӱк-йӱанат ок шокто.
23Олаште лампын тулжо ынде волгалтараш ок тӱҥал,
каче ден ӱдырын йӱкыштым тыште ынде огыт кол.
Вет тыйын сатузет-влак мландӱмбалне тӧра лийыныт,
да тыйын юзыланымет чыла калыкым ондален.
24Пророк ден святой-влакын вӱрыштым,
мланде ӱмбалне чыла пуштмо-влакын вӱрыштым
тиде олаште мумо».


предыдущая глава Глава 18 следующая глава