Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 16

1-21 Юмын шыдыжын шым чашыже.

1Вара мый храм гыч шым Суксылан виян йӱк дене ойлымым колынам: «Кайыза да Юмын шыдыжын шым чашыжым мланде ӱмбаке ястарыза!»

2Икымше Суксо каен да шке чашыжым мланде ӱмбаке ястарен. Тунам янлыкын палыжым налше да тудын тӱсшылан вуйым савен кумалше-влакын капешышт орландарыше йырнык шӱйшӧ сусыр лектын.

3Кокымшо Суксо шке чашыжым теҥызыш ястарен: вӱд колышын вӱржӧ гай лийын, да теҥызыште чыла чонан колен.

4Кумшо Суксо шке чашыжым эҥерлашке да памашлашке ястарен, да нуно вӱрыш савырненыт.5Мый вӱд Суксын ойлымыжым колынам:
«Господь, Тый улшо да лийше, святой,
тыге судитлымет дене чын улат.
6Нуно святой ден пророк-влакын вӱрыштым йоктареныт,
да Тый нунылан вӱрым йӱаш пуэнат.
Нуно тидым шогат».
7Мый жертвенник деч весын ойлымыжым колынам:
«Туге, Чылакучышо Господь Юмо,
Тыйын судитлымет чын да поро».

8Нылымше Суксо шке чашыжым кечыш ястарен: кечылан еҥ-влакым тул дене когарташ эрык пуалтын.9Кугу пич шокшо дене еҥ-влак когаргеныт да нине эҥгекым кид йымалныже кучышо Юмын лӱмжым мыскыленыт, язык деч кораҥын огытыл, Юмым чапландарен огытыл.

10Визымше Суксо шке чашыжым янлыкын престолышкыжо ястарен, да тудын кугыжанышыже пычкемышалтын. Еҥ-влак орланымышт дене йылмыштым пурыныт,11орланымыштлан да сусырыштлан кӧра пылпомышсо Юмым мыскыленыт, осал пашашт деч кораҥын огытыл.

12Кудымшо Суксо шке чашыжым кугу Евфрат эҥерыш ястарен. Эҥерын вӱдшӧ кошкен, тыге эрвел могырысо кугыжа-влаклан корно почылтын.13Вара драконын умшаж гыч, янлыкын умшаж гыч да шояк пророкын умшаж гыч ужавала койшо кум шакше шӱлыш лекмым мый ужынам.14Нуно палдарыше палым ончыктышо ия шӱлыш улыт, Чылакучышо Юмын тиде кугу кечынже кредалмашыш погаш манын, нуно уло тӱнян кугыжаж-влак деке лектыт.15«Теве, вор семын вучыдымын толам: чара кошташ огыл да намысшым ынышт уж манын, вургемжым аралыше да тӱткӧ лийше еҥ поро пиалан.»16Суксо чыла кугыжа-влакым еврейла Армагеддон манме верыш поген.

17А шымше Суксо шке чашыжым южыш ястарен, да пылпомышсо храм гыч престол деч виян йӱк шергылтын, тудо каласен: «Шукталтын!»18Волгенче, кӱдырчӧ да йӱк-йӱан лийын, мланде виян чытырналтын. Тугай кугу да виян чытырналтмаш лийын, могайже мланде ӱмбалне айдеме улмо годсек нигунамат лийын огыл.19Кугу ола кум ужашлан шелалтын, чын Юмым палыдыме-влакын олашт шаланеныт. Шыдыжын да чот сырымыжын аракажым йӱкташ манын, Юмо кугу Вавилон оламат шарналтен.20Чыла остров торлен йомын, курык-влакат кодын огытыл.21Пылпомыш гыч еҥ-влак ӱмбаке талант наре нелытан шолдыра шолем йоген. Шолем деч лийше эҥгеклан верчын еҥ-влак Юмым мыскыленыт, вет азапше моткоч кугу лийын.


*а 16:21 Талант – нылле килограмм наре.

предыдущая глава Глава 16 следующая глава