Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 13

1-18 Кок шучко янлык.

1Мый теҥыз серысе ошмаш шогалынам да теҥыз гыч янлыкын лекмыжым ужынам. Тудын шым вуйжо да лу тӱкыжӧ лийын, тӱкыштыжӧ лу диадим, а вуйлаштыже – Юмым мыскылыме лӱм-влак.2Мыйын ужмо янлыкше барс гай лийын, а йолжо – маскан гай, умшаже – левын умшаж гай. Дракон тудлан шке вийжым, шке престолжым да кугу властьым пуэн.3Мый ужынам: янлыкын ик вуйжо колышаш гай сусыргышо лийын улмаш, но сусыржо паремын. Уло мланде ӧрмыж дене янлык почеш эскерен. Янлыклан властьым пуышо драконлан еҥ-влак, кумалын, вуйым савеныт4да янлыклан, сукен, вуйым савен ойленыт: «Кӧ тиде янлык гай, да кӧ тудын дене кредалын кертеш?»

5Янлыклан кугешнен да Юмым мыскылен ойлышо умша пуалтын, тыгак тудлан нылле кок тылзе шке пашажым ышташ эрыкым пуымо.6Юмым мыскылаш, Тудын лӱмжым, илемжым да пылпомышто илыше-влакым вурсаш умшажым почын.7Святой-влак ӱмбаке сар дене каяш да нуным сеҥаш тудлан эрык пуалтын, тыгак чыла йыжыҥ, калык, йылме да тукым-влакым тудын кидышкыже пуымо.8Мландӱмбалне чыла илыше, кӧн лӱмыштым шӱшкылмӧ Пачан илыш книгаштыже тӱня тӱҥалтыш гычак возымо огыл, сукен, янлыклан вуйым сават.9
Кӧн пылышыже уло, тек колеш.
10Кӧ пленыш наҥгая, пленыш логалеш, кӧ керде дене пуштеш, керде деч колышаш.
Тыштыже святой-влакын чытымашышт да ӱшанымашышт.

11Мый вес янлыкын мланде гыч лекмыжым ужынам, тудын пачан гай кок тӱкыжӧ лийын, да дракон семын ойлен.12Тудо икымше янлыкын чумыр властьше дене тудын ончылно ышта, колымашыш шуктышо сусыр деч паремше икымше янлыклан вуйым савен кумалаш уло мландым да мландӱмбалне илыше-влакым ӧкымла.13Тудо кугу палдарыше пале-влакым ончыкта, еҥ-влак ончылно пылпомыш гыч мландыш тулымат волта.14Янлык ончылно тудлан ышташ пуымо палдарыше пале-влак дене мланде ӱмбалне илыше-влакым ондала, керде дене сусыргышо да илыше кодшо янлык лӱмеш тӱсым ышташ мланде ӱмбалне илыше-влаклан кӱшта.15Янлыкын тӱсшылан шӱлышым пурташ тудлан эрык пуалтын, сандене янлыкын тӱсшӧ ойлашат тӱҥалын да, кӧ янлыкын тӱсшылан вуйым савен кумалын огыл, чылаштым пуштыктен.16Изилан да кугулан, поянлан да йорлылан, эрыканлан да куллан – чылаштлан пурла кидышкышт але саҥгашкышт палым шындыкта.17Тыгеракын, тиде палым – янлыкын лӱмжым але лӱмжын чотшым – налше деч молыжо ужаленат, налынат огыт керт.

18Тыште кугу уш-акыл. Кӧн ушыжо уло, тек янлыкын чотшым шотла: тиде айдемын чотшо, тудын чотшо – куд шӱдӧ кудло кудыт.


предыдущая глава Глава 13 следующая глава