Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 11

1-14 Кок таныклыше. 15-19 Шымше пуч.

1Мылам пондо гай тоям пуэныт да каласеныт: «Кынел, Юмын храмжым да жертвенникшым висе, тушто кумалше-влакым шотло.2А храмын тӱжвал кудывечыжым ӧрдыжеш кодо, тудым ит висе, вет тудым чын Юмым палыдыме-влаклан пуымо, да нуно святой олам нылле кок тылзе тошкаш тӱҥалыт.3Мый кок таныклышемым колтем: нуно, чоштыра вургемым чиен, тӱжем кок шӱдӧ кудло кече пророкла каласкалаш тӱҥалыт».

4Нунышт мландын Юмыжо ончылно шогышо кок олив пушеҥге да кок светильник улыт.5Нунын умшашт гыч тул лектеш да нунылан осалым ышташ шонышо тушманыштым пытара. Кӧ нунылан осалым ыштынеже гын, тудо пуштмо лийшаш.6Пророкла ойлымышт годым йӱр [мланде ӱмбаке] ынже йӱр манын, пылпомышым петыраш нунын властьышт уло, да шонымышт годым вӱдым вӱрыш савыраш да мландыш тӱрлӧ эҥгекым колташ властьышт уло.

7А кунам нуно таныклымыштым мучашыш шуктат, пундашдыме келгыт гыч лекше янлык нунын ваштареш кредалаш тӱҥалеш, сеҥа да нуным пуштеш.8Нунын капыштым кугу ола уремеш кода, тудыжым таҥастарен ойлымо годым Содом ден Египет маныт, туштак мемнан Господьнат ыресеш пудалыме лийын.9Колышо капыштым тӱрлӧ калык, тукым, йылме да йыжыҥ гыч еҥ-влак кум кечат пеле ончат да нунын капыштым шӱгарыш пышташ огыт пу.10Мландӱмбалне илыше-влак нунын колымыштлан куанат да йывыртат, икте-весылан пӧлекым колтат, вет нине кок пророк мландӱмбалне илыше-влакым орландареныт.

11Но кум кечат пеле гыч пророк-влакын кӧргышкышт Юмо деч илыш шӱлыш пурен, да нуно [коктынат] йол ӱмбаке кынел шогалыныт. Нуным ончышо-влакым кугу лӱдмаш авалтен.12Нуно пылпомыш гыч «Тышке кӱзыза» манын виян йӱкын каласымыжым колыныт. Пророк-влак пыл ӱмбалан пылпомышко кӱзеныт, а тушманышт-влак нуным онченыт.13Тиде жапыштак мланде виян чытырналтын, да олан луымшо ужашыже шаланен. Мланде чытырналтме дене шым тӱжем еҥ пытен, молышт моткоч чот лӱдыныт да пылпомышсо Юмым чапландареныт.

14Кокымшо ойго эртен, теве кумшо ойго вашке толеш.

15Шымше Суксо пучым пуалтен. Тунам пылпомышто шуко йӱк йоҥгалтын, нуно виян ойленыт:
«Тӱня кугыжаныш
мемнан Господьнан да Тудын Христосшын лие!
Тудо курым-курымеш кугыжаланаш тӱҥалеш».
16Юмын ончылно шке престолыштышт шинчыше коло ныл старец кумык возын да Юмылан вуйым савен17ойлен:
«Чылакучышо Господь Юмына,
Улшо, Лийше да Толшаш,
Тыланет таум ыштена:
Тый шке кугу куатетым налынат
да кугыжаланаш тӱҥалынат.
18Чын Юмым палыдыме-влак шыде дене темыныт,
но Тыйын шыде жапет ынде толын.
Колышо-влакым судитлаш,
Тыйын пророк тарзет-влаклан,
святой-влаклан, лӱметым лӱдын пагалыше-влаклан
изиланат, кугуланат тарым пуаш
да мландым пытарыше-влакым пытараш жап шуын».
19Вара Юмын пылпомышсо храмже почылтын, да храмыштыже Тудын сугынь ковчегше койын. Волгенче волгалтын, йӱк-йӱан шоктен, кӱдырчӧ кӱдыртен, мланде чытырналтын да кугу шолем лийын.


предыдущая глава Глава 11 следующая глава