Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 8

1-5 Шымше печатьым почмаш. 6– 9:21 Пуч-влак.

1А кунам Пача шымше печатьым почын, пуйто пел шагат наре пылпомышто тымык лийын.2Юмын ончылно шогышо шым Суксым ужынам, нунылан шым пучым пуымо.

3Адак ик Суксо толын да, шӧртньӧ дене ыштыме тӱтырымӧ атым кучен, жертвенник ончылан шогалын. Престол ончылнысо шӧртньӧ жертвенникыш святой-влакын чыланыштын кумалмышт дене пырля надырлан пуыжо манын, тамлын ӱпшышӧ фимиамым тудлан шуко пуымо улмаш.4Святой-влакын кумалмышт дене пырля тамлын ӱпшышӧ фимиамын шикшыже Суксын кидше гыч Юмын ончыко нӧлталтын.5Вара Суксо тӱтырымӧ атым налын, тудым жертвенникысе тул дене темен да мланде ӱмбаке шуэн. Тунам йӱк-йӱан, кӱдырчӧ, волгенче лийын да мланде чытырнен.

6Ынде шым пучым кучышо шым Суксо пуалташ ямдылалтын.

7Икымше Суксо пучым пуалтымеке, вӱр дене варыме шолем ден тул лектыныт, да нуно мланде ӱмбаке йогеныт. Пушеҥге-влакын кумшо ужашыже да чыла ужар шудо йӱлен.

8Кокымшо Суксо пучым пуалтымеке, пуйто тул дене йӱлышӧ кугу курык теҥызыш кудалтыме лийын. Теҥызын кумшо ужашыже вӱрыш савырнен,9теҥызыште илыше чонан-влакын кумшо ужашыже колен, корабль-влакын кумшо ужашыже пытен.

10Кумшо Суксо пучым пуалтымеке, волгалтарен йӱлышӧ кугу шӱдыр кава гыч камвозын, тудо эҥер-влакын кумшо ужашыже да памаш-влак ӱмбаке возын.11А шӱдыржын лӱмжӧ – арымшудо. Вӱдын кумшо ужашыже арымшудо гай лийын, да вӱдлан кӧра шуко еҥ колен, вет вӱдшӧ кочо лийын.

12Нылымше Суксо пучым пуалтымеке, кечын кумшо ужашыже, тылзын кумшо ужашыже, шӱдыр-влакын кумшо ужашышт эҥгекым чытеныт. Нунын кумшо ужашышт пычкемышалтыныт, да кечывал кечын кумшо ужашыже волгыдо лийын огыл, йӱд денат тыгак лийын.

13Тунам мый ужынам да пылпомыш покшелне чоҥештыше Суксын виян йӱк дене ойлымыжым колынам: «Ойго, ойго, ойго мландӱмбалне илыше-влаклан ончыкыжым моло кум Суксын пучым пуалтыме йӱкышт деч!»


предыдущая глава Глава 8 следующая глава