Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 7

1-8 Израиль калыкын печать дене палемдыме 144 тӱжем еҥже. 9-17 Престол да Пача ончылно шуко калык.

1Тылеч вара мый ныл Суксым ужынам, нуно мландын ныл лукыштыжо шогеныт да, мландышкат, теҥызышкат, нимогай пушеҥгышкат мардеж ынже пуо манын, мландын ныл мардежшым кученыт.2Мый кече лекме могырым нӧлталтше да Илыше Юмын печатьшым кучышо вес Суксым ужынам. Тудо мландылан да теҥызлан эҥгекым ышташ эрыкым пуымо ныл Суксылан виян кычкыралын:3«Юмынан тарзыже-влакын саҥгашышт печатьым шындымешкына, мландыланат, теҥызланат, пушеҥгыланат нимогай эҥгекым ида ыште».4Печать дене палемдыме еҥ-влакын чотыштым кольым, тиде – шӱдӧ нылле ныл тӱжем, нуно Израиль эрге-влакын чыла тукымжо гыч лийыныт:5Иуда тукым гыч латкок тӱжемым печать дене палемдыме, Рувим тукым гыч – латкок тӱжемым, Гад тукым гыч – латкок тӱжемым,6Асир тукым гыч – латкок тӱжемым, Неффалим тукым гыч – латкок тӱжемым, Манассий тукым гыч – латкок тӱжемым,7Симеон тукым гыч – латкок тӱжемым, Левий тукым гыч – латкок тӱжемым, Иссахар тукым гыч – латкок тӱжемым,8Завулон тукым гыч – латкок тӱжемым, Иосиф тукым гыч – латкок тӱжемым, Вениамин тукым гыч – латкок тӱжемым палемдыме.

9Тылеч вара мый ужынам: теве моткоч шуко калык, тудым нигӧ шотлен пытарен кертын огыл. Тушто чыла тӱрлӧ тукым, йыжыҥ, калык да йылме гыч еҥ-влак лийыныт. Нуно престол ончылно да Пача ончылно шогеныт, ӱмбалнышт ош вургем, кидыштышт пальме укш лийын.10Виян йӱк дене нуно кычкыреныт:
«Престолышто шинчыше Юмына деч, да Пача деч,
утарымаш толеш!»
11Суксо-влак чылан престол, старец-влак да ныл илыше йыр шогеныт, престол ончылно кумык возыныт да Юмылан вуйым савен12каласеныт:
«Аминь! Моктымаш, чап, уш-акыл,
тауштымаш, пагалымаш, вий да пеҥгыдылык
мемнан Юмыланна курым-курымеш. Аминь!»
13Вара старец-влак кокла гыч иктыже мый дечем йодын: «Нине ош вургеман-влак кӧмыт улыт да кушеч толыныт?»14Мый тудлан каласенам: «Кугун пагалыме, тый палет». А тудо мылам манын: «Нине еҥ-влак пеш кугу орлык гыч толыныт, нуно вургемыштым мушкыныт да Пачан вӱржӧ дене ошемденыт.15
Сандене нуно Юмын престолжо ончылно улыт,
Тудлан храмыштыже йӱдшӧ-кечыже служитлат,
да престолышто Шинчыше нунын коклаште илаш тӱҥалеш.
16Ынде нуно огыт шужо, йӱмыштат ок шу,
нуным кечат, нимогай лӱп шокшат пелташ ок тӱҥал.
17Престол покшелнысе Пача нуным кӱта,
илыше вӱд памаш деке коштыкташ тӱҥалеш,
да Юмо нунын шинчашт гыч чыла шинчавӱдым ӱштылеш».


предыдущая глава Глава 7 следующая глава