Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 3

1-6 Сардисысе черкылан серыш. 7-13 Филадельфийысе черкылан серыш. 14-22 Лаодикийысе черкылан серыш.

1Сардисысе черкын Суксыжлан возо:

”Юмын шым шӱлышыжӧ да шым шӱдыр кӧн уло, Тудо тыге ойла: Тыйын пашатым палем. Лӱмет илышын, но шкеже колышо улат.2Помыжалт, мо але кодын да колымашке лишемын, тудым пеҥгыдемде. Юмем ончылно тыйын пашат тичмаш огыл манын ужынам.3Тугеже, мом тый налынат да колынат, тудым шарне, тидым кучо да, языкетым касарыктен, Юмо деке савырне. А шекланен от шого гын, Мый вор семын мием, да кунам тылат мут кучыкташ толам, тый от пале.4Но Сардисыште еҥет-влак коклаште вургемыштым амыртыдыме-влакат икмынярын улыт. Нуно Мый денем пырля ош вургеман кошташ тӱҥалыт; нуно тидлан йӧрышӧ улыт.5Сеҥышыже ош вургемым чия, да Мый лӱмжым илыш книга гыч ом ӱштыл, а Ачам ончылно да Тудын Суксыж-влак ончылно лӱмжым палымем нерген почын каласем.6Кӧн пылышыже уло, черке-влаклан Шӱлышын мом ойлымыжым тек колеш.”

7Филадельфийысе черкын Суксыжлан возо:

”Давидын сравочшым кучышо Святой да Чын – Тудын почмыжым нигӧ ок петыре, да Тудын петырымыжым нигӧ ок поч – тыге ойла:8Тыйын пашатым палем. Теве тыйын ончылнет Мый омсам почынам, да нигӧ тудым петырен ок керт. Виет шагал гынат, шомакем кучен иленат да Мыйын лӱмем деч кораҥын отыл.9Теве Мый тыланет сатанан тӱшкаж гыч шкеныштым иудей манын лӱмдышӧ-влакым пуэм – но нуно иудей огытыл, а шойыштыт веле. Нуным тыге ыштыктем: нуно толыт, тыйын йол воктекет кумык возыт да тыйым йӧратымем пален налыт.10Мыйын чыташ кӱштымем тый шуктен шогенат, сандене, кунам мландӱмбалне илыше-влакым тергыме жап уло сандалыкыш толын шуэш, Мый тыйым арален кодем.11Вашке толам: тыйын сеҥымаш вуйшӱдышетым нигӧ ынже нал манын, мо тыйын уло, тудым пеҥгыдын кучо.12Сеҥышым Мый шке Юмемын храмыштыже ӱшанле меҥгым ыштем, тушечын тудыжо ынде ок лек. Тудын ӱмбалан шке Юмемын лӱмжым да Мыйын Юмемын олажын – Мыйын Юмем деч пылпомыш гыч волышо у Иерусалимын – лӱмжым да Шкемын у лӱмем возем.13Кӧн пылышыже уло, черке-влаклан Шӱлышын мом ойлымыжым тек колеш.”

14Лаодикийысе черкын Суксыжлан возо:

”Чын да ӱшанле танык, Юмын чыла ыштымыжын тӱҥалтышыже, Аминь, тыге ойла:15Тыйын пашатым палем. Тый йӱштат, шокшат отыл. О, тый йӱштӧ але шокшо лият ыле гын!16Но шокшат, йӱштат отыл, а леве улат, сандене тыйым умшам гыч луктын кудалтышаш улам,17вет тый ойлет: ’Мый поян улам, поенам да мылам нимо ок кӱл’. Тый пиалдыме, чаманышашлык, йорло, сокыр да чара улметым от пале.18Тыланет ойым пуэм: поян лияш манын, тулеш эрыктыме шӧртньым Мый дечем тӱлен нал; чияш да намысле чаратым петыраш манын, Мый дечем ош вургемым нал; шинчат ужшо манын, шинчашкет эмым шӱрӧ.19Кӧм Мый йӧратем, чылаштымат шылталем да наказатлем. Тыгеракын, чон йӱлен тыршыше лий да, языкетым касарыктен, Юмо деке савырне.20Теве Мый омса воктене шогем да пералтем. Кӧ Мыйын йӱкем колеш да омсам почеш гын, тудын деке Мый пурем да тудын дене кас кочкышым ыштем, а тудо – Мый денем.21Сеҥышылан Мый пеленем престолышкем шинчаш эрыкым пуэм. Тугак Мыят сеҥенам да Ачам дене Тудын престолышкыжо шинчынам.22Кӧн пылышыже уло, черке-влаклан Шӱлыш мом ойлымым тек колеш”.»


предыдущая глава Глава 3 следующая глава