Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ ИОАНН БОГОСЛОВЛАН ПОЧМАШ

Глава 1

1-3 Ончылмут. 4-8 Саламлымаш. 9-20 Иоаннын Христосым ужмыжо.

1Иисус Христосын почмашыже; вашке мо лийшашым шке тарзыж-влаклан ончыкташ манын, тиде почмашым Юмо Тудлан пуэн. Тудыжо чыла тидым Иоанн тарзыже деке колтымо Суксыж гоч палдарен.2Юмын шомакше да Иисус Христосын таныклымыж нерген, мом ужын, чылаж нерген Иоанн тыште таныклен каласкала.3Пророкла ойлымо тиде шомакым лудшо да тидым колыштшо-влак, тушан возымым шуктышо-влак пиалан улыт: шукталтме жап чакемын.

4-5Иоанн деч Асий кундемысе шым черкылан.

Кӧ уло, Кӧ лийын да Кӧ толеш, Тудын деч, Тудын престол ончылнысо шым шӱлыш деч да колышо-влак кокла гыч эн ондак ылыжше, мландӱмбалсе кугыжа-влакын онышт лийше ӱшанле таныклыше Иисус Христос деч тыланда порылык да тыныслык лийже.

Тудо мемнам йӧратен да шке Вӱржӧ дене языкна деч мушкын эрыктен,6Юмын, шке Ачажын, кугыжа ден иерейже-влакым мемнам ыштен. Тудлан курым-курымеш чап да вий лийже! Аминь.7
Теве Тудо пыл коклаште толеш,
Тудым чылан шке шинчашт дене ужыт,
ужыт Тудым шуралтыше-влакат,
мландӱмбалнысе чыла тукым
Тудын верч ойганен шорташ тӱҥалеш.
Тыгак лиеш, аминь.

8«Мый – Альфа ден Омега, Тӱҥалтыш ден Мучаш улам», – ойла Господь, Тудо, Кӧ уло, Кӧ лийын да Кӧ толеш, Чылакучышо.

9Мый, Иоанн, Иисус Христосын орлыкшым, Кугыжанышыжым да чытымашыжым тендан дене пырля налше изада, Юмын шомаклан да Иисус Христосын таныклымыжлан кӧра Патмос манын лӱмдымӧ островышто лийынам.10Господьын кечынже мыйым шӱлыш авалтен, да пуч гыч лекше гай виян йӱкым шке шеҥгелнем колынам. Тудыжо ойлен: «Мый Альфа ден Омега, Икымше ден Пытартыш улам.11Мом тый ужат, книгаш возо да Асийыште улшо черке-влаклан колто: Ефесыш, Смирнаш, Пергамыш, Фиатираш, Сардисыш, Филадельфийыш да Лаодикийыш».

12-13Мый денем ойлышо йӱк кӧн манын, мый ончалаш савырнышым. Савырнымеке, шым шӧртньӧ светильникым да нунын коклаште Айдеме Эргыла койшым ужым. Тудо подир вургемым чийыше да оҥ тураште шӧртньӧ ӱштым ӱшталше лийын.14Тудын вуйжо да ӱпшӧ ош меж гай, лум гай ошо, а шинчаже тулйылме гай лийыныт,15йолжо йолгыжшо той гай, пуйто коҥгаш шуарыме, а йӱкшӧ кугу вӱд лӱшкымӧ гай лийын.16Пурла кидыштыже Тудо шым шӱдырым кучен, умшаж гыч кок могырге пӱсӧ керде лектын, а шӱргыжӧ – уло вийын йолгалтше кече гай.

17А кунам мый Тудым ужынам, йол воктекыже колышо гай камвозынам. Тудо пурла кидшым мыйын ӱмбакем пыштен да ойлен: «Ит лӱд. Мый Икымше да Пытартыш18да Илыше улам; Мый колышо лийынам, а теве Мый курым-курымеш илыше улам, аминь, да колымаш ден тамыкын сравочышт Мый денем.19Тугеже, мом ужметым, мо уло да тылеч вара мо лийшаш, возо.20Пурла кидыштем тыйын ужмо шым шӱдыр да шым шӧртньӧ светильник теве тидым ончыктат: шым шӱдыр – шым черкын Суксыж-влак, тыйын ужмо шым светильникше – шым черке.


*а 1:0Грек йылмыште тиде книга «Апокалипсис» маналтеш, тиде мут почмашым але кончымашым ончыкта.

*б 1:8 «Альфа ден Омега»: грек буква радамыште икымше ден пытартыш буква.

*в 1:10 «Господьын кечынже»: рушарнян.

предыдущая глава Глава 1 следующая глава