Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ

Глава 1

1-4 Юмо Эргыж гоч ойла. 5-14 Юмын Эргыже Суксо-влак деч кӱшнӧ шога.

1Ожно шуко гана да тӱрлӧ семын пророк-влак гоч ача-влаклан ойлышо Юмо2тиде пытартыш кечылаште мыланна Эргыж гоч ойлен. Эргыжым Юмо чылан наследникшылан шогалтен, Тудын гочак курым-влакым пӱрен улмаш.3Эрге Тудын чапшын волгалтмыже, могай улмыжын тичмаш сынже улеш да чылажымат куатан шомакше дене куча. Шкеж дене мемнам язык деч эрныктарымеке, Эрге пылпомыш кӱкшытыштӧ Чаплылыкын [престолжын] пурла могырышкыжо шинчын.4Налме лӱмжӧ Суксо-влакын лӱмышт деч кунар кӱшнӧ, Суксо деч Тудо тунарак кугу лийын.

5Суксо кокла гыч кӧлан кунам Юмо каласен:
«Тый Мыйын Эргым улат,
Мый таче Тыйым шочыктенам».
Адак каласен:
«Мый Тудлан Ача лиям,
а Тудо Мыланем Эрге лиеш».
6Тыгак Икымше Шочшыжым тӱняшке пуртымыж годым манын:
«Тек Тудлан Юмын чыла Суксыжо вуйым сава».
7Суксо-влак нерген каласа:
«Суксыж-влакым шӱлышым ышта,
служитлышыж-влакым – тулйылмым».
8А Эргыж нерген:
«Юмо, Тыйын престолет курым-курымашлык,
чынлыкын скипетрже – Тыйын Кугыжанышетын скипетрже.
9Тый чын ыштымым йӧратенат,
закондымылыкым ужмышудымо лийынат.
Сандене, Юмо, Юмет Тыйым куан ӱй дене
пеленет улшо-влак деч утларак шӱрен».
10Адак ойлен:
«Тый, Господь, тӱҥалтыште мландым негызленат,
каваат – кидетын пашаже.
11Нуно пытат, а Тый эре улат.
Чылажат вургем семын тоштемеш,
12чием семын нуным вӱдылат,
да нуно вашталтыт.
Но Тый эре тугаяк кодат,
илышаш кечет огеш пыте».
13Суксо кокла гыч кӧлан кунам Юмо каласен:
«Тушманет-влакым йол йымакет пыштымешкем,
пурла велыштем шинче».
14Але чыла Суксо Юмылан служитлыше шӱлыш огыл? Утарымашым налшаш-влаклан нуным служитлаш колтымо огыл мо?


*а 1:2 «Пӱрен» – сотворил. «Курым-влакым» – але «тӱня-влакым» (тыгак – 11:3).

*б 1:5 Пс 2:7, 2 Цар 7:14.

*в 1:6 Пс 96:7.

*г 1:7 Пс 103:4. «Шӱлыш»: грек йылмыште ик мутак «шӱлыш» ден «мардеж» шомакым ончыкта. Ончо Ин 3:8.

*д 1:8-9 Пс 44:7-8.

*е 1:10-12 Пс 101:26-28.

*ж 1:13 Пс 109:1.

предыдущая глава Глава 1 следующая глава