Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ФИЛИМОНЛАН КОЛТЫМО СЕРЫШЫЖЕ

Глава 1

1-3 Саламлымаш. 4-7 Филимонын ӱшанымашыж ден йӧратымашыже. 8-22 Онисим верч йодмаш. 23-25 Чеверласымаш.

1-2Иисус Христос верч кучен петырыме Павел да Тимофей иза деч мемнан дене пырля ыштыше йӧратыме Филимонлан, йӧратыме Апфия акалан да мемнан дене пырля ыштыше Архипплан, тыгак тыйын пӧртыштӧ погынышо черкылан.

3Мемнан Юмо Ачана деч да Господь Иисус Христос деч порылык да тыныслык тыланда лийже.

4Кумалмем годым тыйым эре шарнем, Юмылан таум ыштем,5вет чыла святой-влакым да Иисус Христосым йӧратымет да Иисус Христослан ӱшанымет нерген мый колынам.6Мемнан-влак деке тый ӱшанымаш гоч ушненат. Тидыже Христос Иисус дене ушнымаште тыланда пуымо чыла сайым келгынрак пален налашет полшыжо манын, Юмо деч йодам.7Тыйын йӧратымашет мемнам пешак куандара да кумылаҥда, вет тылат кӧра, шольым, святой-влакын шӱмышт лыпланеныт.

8Мом ышташ кӱлмым шукташ тыланет кӱшташ Христос дене ушнен шогымаште эрыкем уло гынат,9йодаш сайраклан шотлем, вет мый тыйым йӧратем. Весе огыл, мый, Павел, кугурак еҥ, ынде Иисус Христос верч петырыме айдеме,10Онисим эргым шотышто тый дечет йоднем. Тудо мылам казаматыште шке эргым семын шочын.11-12Ондак тудо тылат пайдале лийын огыл, а кызыт мыламат, тылатат пайдале. Мый тудым, шкемын шӱмем, тый декет мӧҥгеш колтем. Онисимым шке декет нал.13Поро Уверлан кӧра петырымаште шинчымем годым мылам тыйын олмеш полшыжо манын, тудым шке пеленем кучаш шоненам ыле,14но, тыйын шоныметым палыде, тидым ыштымем ок шу. Мый тыланет ӧкымеш порым ыштыкташ ом шоно, тек поро пашат шке кумылын лиеш.15Ала тудо пеленет курымешлан кодшо манын веле тый дечет икмыняр жаплан ойырымо лийын.16Но ынде тудо тыйын кулет веле огыл, а кул деч шергырак: йӧратыме шольо. Тудо мылам моткоч шергакан, а тылат айдеме семынат, Господьлан ӱшаныше семынат эшеат кугурак акан.

17Тыгеракын, мыйым ӱшанымаште изалан шотлет гын, шке декет мыйым пуртымо семын тудым пурто.18Тудо тыйын ончылно титакыш пурен але пуышашыже уло гын, тидым мыйын парымемлан шотло.19Мый, Павел, шке кидем дене возем: чыла тидым пӧртылтем. Чынжым гын, тый шке чонет шотышто мылам парымыште улат манын каласен кертам ыле.20Туге, шольым, Господьлан лийын, поро пашам ышташ йодам. Мыйын шӱмем Господь пелен куандаре.

21Мутым колыштметлан ӱшанен, тидым возем. Тый ышташ йодмем деч шукыракат ыштет манын, мый палем.22Вес йодмашемат уло: мыланем пӧлемым ямдыле. Юмо деч тидым сӧрвалымыланда кӧра тыланда пӧртылтымӧ лиям манын, мый ӱшанен вучем.

23-24Иисус Христос верч мый денем пырля петырен шындыме Епафрас, тыгак мый денем пырля ыштыше-влак Марк, Аристарх, Димас, Лука тылат саламым колтат.25Господьна Иисус Христосын порылыкшо тендан шӱм-чон шӱлышда дене лийже. Аминь.


*а 1:11-12 Онисим лӱм ’пайдале’ манме лиеш.

предыдущая глава Глава 1 следующая глава