Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ТИТЛАН КОЛТЫМО СЕРЫШЫЖЕ

Глава 3

1-11 Порым ыште. 12-15 Каҥаш ден саламлымаш.

1Тӱрлӧ вуйлатыше да тӧра-влаклан мут колыштшо лийышт манын, ӱшаныше-влаклан эре ушештарен шого, нуным колыштышт да кеч-могай поро пашам ышташ ямде шогышт.2Нигӧн ӱмбаке осалым ынышт ойло, нигӧ дене ынышт ӱчаше, тыматле, чыла еҥлан поро кумылан лийышт.3Ондак меат шонен моштыдымо, мутым колыштдымо, йомшо лийынна, сутланымын да тӱрлӧ ракатланымын кулышт улына ыле: осалланен да кӧранен иленна, йырнык да икте-весынам ужмышудымо лийынна.4А кунам мемнан Утарыше Юмынан порылыкшо да айдемым йӧратымыже почылтын,5Тудо мемнан ыштыме чын пашаланна огыл, а угыч шочыктышо мушмаш да Святой Шӱлыш дене уэмдымаш гоч шке порылыкшо дене мемнам утарен.6Мемнан Иисус Христос Утарышына гоч Святой Шӱлышым ӱмбакына Юмо лыҥ опталын.7Тыгеракын ме, Тудын порылыкшо дене чыныш лукмо-влак, ӱшанен вучымо курымашлык илышым налын кертына.

8Тиде шомак чын. Мый тидым тыланет поснак палемдыктынем. Юмылан ӱшанаш тӱҥалше-влак поро пашалан тыршышт. Тидыже еҥ-влаклан сай да пайдале.9Но шотдымо тӱрлӧ ӱчашымаш, тукымвожым шымлымаш да закон нерген икте-весе ваштареш ойлымаш деч кораҥ, тиде нимогай пайдам ок пу да кӱлдымӧ.10Ик гана да вес гана шижтарымекет, шояк туныктымашан еҥ деч кораҥ.11Тыгай еҥ пужлен, тудо языкым ышта, шкенжым шке титаканыш луктеш манын, тый палет.

12Кунам тый декет Артемам але Тихикым колтем, мый декем Никопольыш вашке тол, тушто телым эртараш шонен пыштенам.13Закон туныктышо Зинам да Аполлосым корныш тыршен ямдыле, нунылан мо кӱлеш, тек чылажат лийже.14Мемнан-влакат, саскадыме лияш огыл манын, полыш кӱлмӧ годым тек поро пашам тыршен ышташ тунемыт.

15Мый денем улшо-влак чылан тыйым саламлат. Мемнам ӱшанымаште йӧратыше-влакым саламле. Чыланда дене Юмын порылыкшо лийже. Аминь.


предыдущая глава Глава 3 следующая глава