Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ТИТЛАН КОЛТЫМО СЕРЫШЫЖЕ

Глава 2

1-15 Чын туныктымылан келшыше илыш.

1А тый яндар туныктымаш дене келшышын ойло.2Илалше пӧръеҥ-влакым айык шонымашан, чын илыше, ушан-шотан, ӱшанымаште, йӧратымаште, чытымаште чын лияш туныкто.3Тыгак илалше ӱдырамаш-влакат святой-влаклан келшен толшо вургемым чийышт,, еҥ ӱмбаке ынышт ойло, аракан кулжо ынышт лий, порылан веле туныктышт.4-5Нуно самырык ӱдырамаш-влакым марийыштым, йочаштым йӧраташ, ушан-шотан, яндар, сурт сомылкам тыршен шуктышо, поро, шке марийыштым колыштшо лияш туныктышт. Юмын шомакше ынже мыскылалт.6Рвезе-влаклан ушан-шотан лияш каҥашым пу,7тый шке поро пашат дене чыла шотыштат илыш корным ончыктышо лий. Тек туныктымет яндар, пагалымашым лукшо, локтылалтдыме лийже.8Ойлымет чын лийже, титаклаш амалым ынже пу, тунам ваштареш шогышо-влак мемнан нерген нимо удам каласен огыт керт, вожылмашке пурат.9Кул-влакым озаштым чыла шотыштат колышташ, келшыше лияш туныкто, ваштареш ынышт ойло,10ынышт шолышт, эре поро да ӱшанле лийышт, тыге нуно мемнан Утарышынан, Юмынан, туныктымыжлан чыла шотыштат поро чапым кондат.

11Юмын утарыше порылыкшо чыла еҥлан почылтын.12-13Ӱшаныме поро пиалым – Кугу Юмын, мемнам Утарыше Иисус Христосын, чапшын шумыжым – вучымына годым Юмын порылыкшо мемнам шотдымо илышым да тӱнясе сутланымым кораҥдаш виктара, кызытсе курымышто яндар уш-акыл дене, чын, Юмым пагален илаш туныкта.14Мемнам чыла закондымылык деч утараш, поро пашам тыршен ыштыше калыкым Шкаланже эрыкташ манын, Тудо Шкенжым мемнан верч пуэн.15Тидым ойло, каҥашым пуэде, уло властетым кучылтын шылтале. Тек нигӧат тыйым шотлыдымо ок лий.


*а 2:3 «Святой-влаклан келшен толшо вургемым чийышт»: тидым «илышыштым Юмылан святитлен пуышо еҥ-влак семын шкеныштым кучышт» манынат кусараш лиеш.

предыдущая глава Глава 2 следующая глава