Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ТИМОФЕЙЛАН КОЛТЫМО КОКЫМШО СЕРЫШЫЖЕ

Глава 3

1-9 Пытартыш жапысе еҥ-влак. 10– 4:8 Тимофейлан Павелын сугыньжо.

1Пытартыш кечылаште неле жап толеш манын, палышаш улат.2Еҥ-влак шкеныштым да оксам йӧратыше, моктаныше, кугешныше, мыскылыше, ача-авам колыштдымо, таум ыштыдыме, Юмым пагалыдыме, йӧратыдыме,3келшыде илыше, еҥ ӱмбаке ойлышо, шкем кучен моштыдымо, торжа, порым ужмышудымо,4предатель, вожылдымо, чот кугешныше, Юмым йӧратыме олмеш шке шерыштым темаш йӧратыше лийыт.5Тӱжвач ончымаште Юмым пагалышыла койыт, но ӱшанымашын вийже деч кораҥыт. Тыгай еҥ-влак деч торло.6Нунын кокла гыч южышт еҥ пӧртыш чояланен пурат да тӱрлӧ язык дене варналтше, тӱрлӧ сутланымын вӱдымӧ ӱдырамаш-влакым кид йымакышт налыт.7Нине ӱдырамаш эре тунемаш тыршат гынат, чыным палымашке нигунам шуын огыт керт.8Кузе Ианний ден Иамврий Моисей ваштареш шогалыныт, тыгак нине еҥ-влакат чынлан торешланат. Нунын шонымашышт пужлен да ӱшанымашышт лушкыдо.9Но нуно шукыжак ыштен огыт керт, вет нунын ушдымылыкышт чылан ончылно чараш лектеш. Тыгеак Ианний ден Иамврий дене лийын.

10А тый мыйын туныктымем, илыш-шотем, ышташ шонымем, Христослан ӱшанымем, туркымем, йӧратымем, чытымем эре ужынат да тыгак ыштенат,11Антиохийыште, Иконийыште, Листраште мый денем лийше поктылмым, орланымым тый палет. Могай поктылмым мый чытенам! А чылаж дечат мыйым Господь утарен.12Христос Иисус дене ушнен, Юмым пагален илаш шонышо-влак чылан поктылмо лийыт.13А осал еҥ да ондалыше-влак, весе-влакым йоҥылышыш пуртен да шкештат ондалалтын, осалым ыштымаште кӱкшытыш шуыт.

14А молан тый тунемынат да мом тылат ӱшаныме, тудым пеҥгыдын кучо, вет тый шке туныктышетым палет.15Адакшым тый Святой Возымашым йоча годсек шинчет. Тудо Христос Иисуслан ӱшаныме дене утаралташ тыланет ушым пуэн кертеш.16Чыла Возымаш Юмын Шӱлыш деч лектын да туныкташ, титакым чараш лукташ, койыш-шоктышым тӧрлаш, чын ыштымашке виктараш пайдале.17Тугеже, Юмын айдемыжын нимогай ситыдымашыже уке, тудо чыла поро пашаланат ямдылыме лиеш.


предыдущая глава Глава 3 следующая глава