Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ТИМОФЕЙЛАН КОЛТЫМО КОКЫМШО СЕРЫШЫЖЕ

Глава 2

1-13 Поро Увер верч тыршымаш. 14-26 Юмын сайлан шотлымо тарзе.

1А тый, эргым, Христос Иисусын порылыкшо дене пеҥгыдем.2Шуко таныклыше улмо годым мом мый дечем колынат, ӱшанле еҥ-влаклан тудым ӱшанен пу. Нуно вара молымат туныктен кертыт.3Иисус Христосын сай сарзыже семын нелылыкым чыте.4Воеводылан кажне сарзе келшаш тырша, сандене илышысе тыглай паша дене шкенжым ок кылде.5Тыгак таҥасыше айдемат, чын почеш ок таҥасе гын, сеҥымаш вуйшӱдышым ок нал.6Мланде пашам тыршен ыштыше еҥ саскам эн ондак налшаш.7Мом мый ойлем, тудын нерген шоналте. Господь тылат чылажымат умылаш полшыжо.

8[Господь] Иисус Христосым шарне. Мыйын увертарыме Поро Увер дене келшышын Тудо Давид тукым гыч лийын да колымаш гыч ылыж кынелын.9Поро Уверлан кӧра мый орланем, мыйым осалланыше еҥ семын казаматыш шынденыт, но Юмын шомакшым шинчырлаш ок лий.10Сандене мый ойырен налме-влак верч чыла чытем: нунат Христос Иисус дене ушнымаште утарымашым да курымашлык чапым налшаш улыт.11Тиде мут чын:
Ме Тудын дене пырля коленна гын,
Тудын дене пырляк илашат тӱҥалына,
12чытена гын,
Тудын дене пырля кугыжаланашат тӱҥалына,
Тудым ме огына пале манына гын,
Тудат мемнам ом пале манеш,
13ме ӱшанле огынал гын,
Тудо – ӱшанле,
вет Тудо Шкеж деч Шке кораҥын огеш керт.

14Тидым ушештарен шого, мут шотышто ынышт ӱчаше манын, Господь ончылно кӱштӧ. Тыгайже нимогай пайдам ок пу, а колыштшо-влакым энгекыш шукта.15Юмылан йӧрышӧ лияш тырше: шке пашат деч ит вожыл, чынын шомакшым чын туныкто.16А йӧрдымӧ арам ойлыштмаш деч кораҥ, вет тыге кутыркалыше еҥ-влак утларак да утларак Юмо деч кораҥыт.17Нунын шомакышт шӱйшӧ сусырла шарлаш тӱҥалеш. Тыгай улыт Именей ден Филит.18Ылыж кынелмаш уже лийын манмышт дене нуно чын корно гыч кораҥыныт да тыге южыштын ӱшанымашыштым локтылыт.19Но Юмын пыштыме чоткыдо негызше шога, ӱмбалныже тыгай печать: «Господь шке еҥже-влакым пала», «Господьын лӱмжым ӱжшӧ чыла еҥ чын огыл деч кораҥже».20Кугу пӧртыштӧ шӧртньӧ да ший ате веле огыл, пу да шун дене ыштыме ате-влакат улыт. Иктыштым аклыме ате кӱлмӧ годым кучылтыт, весыштым – тыглай жапыште.21Тугеже, кӧ шкенжым чыла тыгай осал деч эрыкта гын, тудо аклыме ате гай, святитлыме да Озажлан пайдале, тӱрлӧ поро пашалан ямде лиеш.22Самырык годсо сутланымаш деч кораҥ курж, Господьлан яндар шӱм дене кумалше-влак дене пырля чын ыштымым, Христослан ӱшанымым, йӧратымым, тыныслыкым пеҥгыдын кучо.23Но ораде да шотдымо ӱчашымаш деч кораҥ, палет вет: нуно келшыдымашым шочыктат.24Господьын тарзыже ӱчашышаш огыл, а чыла дене тыматле, туныктен моштышо да чытыше лийшаш.25Ваштареш шогышо-влакым тудо тыматлын тӧрлышаш. Юмо нунылан языкыштым касарыкташ да Шкеж деке савырнаш ала йӧным пуа. Тыге лиеш гын, нуно, чыным пален налын26да ушым шынден, диаволын вапшыж деч утлен кертыт, вет диавол, шкенжын эрыкшым шуктышт манын, нуным кучен.


*а 2:19 Числ 16:5.

*б 2:26 Эрык – воля, желание.

предыдущая глава Глава 2 следующая глава