Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ТИМОФЕЙЛАН КОЛТЫМО ИКЫМШЕ СЕРЫШЫЖЕ

Глава 6

3-10 Шояк туныктымаш да чын поянлык. 11-21 Тимофейлан Павелын сугыньжо.

1Юмын лӱмжӧ да мемнан туныктымашна ынышт вурсалт манын, кид йымалне улшо кул-влак шке озаштым чыла шотыштат пагалаш йӧрышылан шотлышаш улыт.2А кӧн Христослан ӱшаныше озаже уло, тек озажым шотлыдымо ок лий, вет нуно ӱшанымаште иза-шольо улыт. Тудо утларак тыршен веле тарзыланышаш, молан манаш гын озаже – ӱшаныше да йӧратыме еҥ – эре порым гына ышта. Чыла тидлан туныкто да каҥашым пу.

3Кӧ весылан туныкта да мемнан Господьна Иисус Христосын яндар шомакше да чын ӱшанымаш туныктымо дене ок келше,4-5тудо кугешна, нимом ок пале, но ӱчашыме да мут нерген тавалыме чер дене черланен, тидыж дечын пужлышо ушан, чыным йомдарыше еҥ-влак коклаште кӧранымаш, келшыдымаш, вурсен ойлымаш, осал йолам ыштымаш да ӱчашымаш лектыт. Тыгай еҥ-влак Юмым пагалыме дене пояш лиеш манын шонат. Нунын деч кораҥ.

6Чынжымак, мо уло дене серлаген, Юмым пагалаш – кугу поянлык.7Ме тӱняшке нимом конден огынал да, чылалан раш, тиде тӱня гыч нимом пеленна налын огына керт.8Кочкышна да вургемна уло гын, тидын дене серлагышаш улына.9А пояш шонышо-влак алгаштаралтыт, ушдымо да зияным ыштыше тӱрлӧ сутланымашын лӧдышкыжӧ логалыт, нунышт еҥ-влакым кугу азапыш пуртен, пытымашке шуктат.10Вет чыла осалын вожшо – оксам йӧратымаш, оксалан вуйым пуымеке, южышт ӱшанымаш деч кораҥыныт да шкеныштым шке шуко орлыкыш пуртеныт.

11А тый, Юмын еҥже, тыгай деч кораҥ курж да чын ыштымаште, Юмым пагалымаште, ӱшанымаште, йӧратымаште, чытымаште, тыматле лиймаште сеҥымашке шу.12Христослан ӱшаныме верч шогымаште чыла виет дене тырше, курымаш илышым кучо. Юмо тыйым тиде илышланак ӱжын, да тый шуко таныклыше ончылно шке ӱшаныметым пеҥгыдын почын каласенат.13Чылалан илышым пуышо Юмын ончылно да Понтий Пилат годым пеҥгыдын таныклен ойлышо Христос Иисус ончылно мый тыланет кӱштем:14мемнан Господьна Иисус Христос толмешке, тыланет кӱштымым яндарын да шылталаш лийдымын шуктен шого.15Тудын толмыжым
поро пиалан ик шкет куатле Юмо,
кугыжаланыше-влакын Кугыжашт
да озаланыше-влакын Озашт,
шке жапыштыже ончыкта.
16Тудо шкетынак веле колыдымо,
лишемаш лийдыме волгыдышто ила,
Тудым ик айдемат ужын огыл да ужын ок керт.
Тудлан чап да курымашлык вий-куат. Аминь.

17Шкеныштым кӱшкӧ ынышт шынде да пытышаш поянлыклан огыл, а мыланна куанен илаш чылажымат лыҥ пуышо илыше Юмылан ӱшаным пыштышт манын, кызытсе курымысо поян-влаклан кӱштӧ.18Тек нуно порым ыштат, нунын поянлыкышт порым ыштымышт лийже, вес еҥлан тӱрлын полшаш эре кумылан лийышт.19Тидын дене нуно шкаланышт чын поянлыкым погат, тидыже ончыкылыкыштлан пеҥгыде негыз лиеш, да курымашлык илышыш шуын кертыт.

20О, Тимофей! Тылат ӱшанен пуымым арале, йӧрдымӧ яра мутланымаш деч да шинчымаш манын мом йоҥылыш лӱмдат, тудын торешланымыже деч кораҥ.21Южышт тудын велке савырненыт да Христослан ӱшаныме корно гыч кораҥыныт. Тый денет Юмын порылыкшо лийже. Аминь.


предыдущая глава Глава 6 следующая глава