Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ТИМОФЕЙЛАН КОЛТЫМО ИКЫМШЕ СЕРЫШЫЖЕ

Глава 5

1– 6:2 Ӱшаныше-влакын тӱрлӧ тӱшкашт дене шкем кузе кучаш.

1Шоҥгыеҥым ит шылтале, но ачам туныктымыла пагален туныкто, а самырык пӧръеҥ-влакым – иза-шольым туныктымо семын.2Илалше ӱдырамаш-влакым авам туныктымыла пагален туныкто, самырык ӱдырамаш-влакым – ака-шӱжарым туныктымо семын, койышет чыла шотыштат ару лийже.

3Чынжымак шкет кодшо тулык вате-влакым пагале.4А иктаж тулык ватын йочаж але уныкаж-влак улыт гын, тек ондак шке ешыштым пагалаш да ача-аваштлан поро дене пӧртылташ тунемыт, тидыже Юмын ончылно сай.5Чынжымак родо-тукымжо деч посна кодшо тулык ӱдырамаш ӱшанжым Юмылан пышта да, полышым йодын, Тудлан йӱдшӧ-кечыже кумалеш.6А шке шержым темаш йӧратыше илышынек колен.7Еҥ-влакын шылталаш амалышт ынже лий манын, чыла тидымак ышташ кӱштӧ.8А кӧ родо-тукымжо да поснак шке ешыже верч ок тырше гын, тудо ӱшанымаш деч кораҥын да ӱшаныдыме еҥ дечат ударак лийын.9Кудло деч шагал огыл ийыш шушо да ик гана веле марлан лекше тулык ӱдырамаш тек тулык вате радамыш пурталтеш.10Тудо поро пашаж дене палыме лийшаш: йоча-влакым ончен-куштен, корныеҥ-влакым ончен, святой-влакын йолыштым мушкын, нелылыкыш логалшылан полшен да тӱрлӧ поро пашам ыштен шоген.11Самырык тулык вате-шамычым тыгай радамыш ит пурто. Кунам нуно шкеныштым куштылгын кучаш тӱҥалыт, Христос деч торлат да марлан лекнешт,12ӱшанле лияш мутым пуэныт гынат, тудым пудыртат да титаканыш лукталтыт.13Тыгодымак нуно йолагайланаш, пӧрт еда кошташ тунемыт, да йолагайланаш гына огыл, а утым ойлен кошташ, кӱлеш-оккӱлым пален налаш тыршат да оккӱлым ойлыштыт.14Сандене самырык тулык вате-влак марлан лектышт, йочам ыштышт, сурт сомылкам чумыркалышт манын тыланем, осалым ойлаш тушманлан нимогай амалым ынышт пу.15Вет южышт ынде чын корно гыч кораҥыныт да сатана почеш каеныт.16Ӱшаныше иктаж пӧръеҥын але ӱдырамашын лишыл родыжо-влак коклаште тулык вате уло гын, тудлан полшыжо, чынжымак шкет кодшо тулык ватылан Черке полшен кертше манын, тиде нелылык Черке ӱмбаке ынже воч.

17Черкым моштен вуйлатыше пресвитер-влакым, Юмын шомакым каласкалыше да тыршен туныктышо-влакым, поснак пагалаш кӱлеш.18Возымаште ойлалтеш: «Пырчым шийше ӱшкыжын умшажым ит петыре», тыгак: «Пашаеҥ шке пашадаржым сулен налеш».19Кок але кум таныклыше деч посна пресвитерым титаклымым ит колышт.20Молат лӱдышт манын, языкым ыштен шогышо-влакым чылаштын ончылно шылтале.21Юмо ончылно, Господь Иисус Христос ончылно да ойырен налме Суксо-влак ончылно мый тыланет нине каҥашем шукташ пеҥгыдын кӱштем. Пашам шымлымешке, чыла раш манын, ончылгоч ит шоно, иктаж-кӧн велке ит лий.

22Нигӧ дене кид пыштымым шукташ ит вашке, еҥ-влакын языкыштышт тыйын ужашет ынже лий. Шкендын арулыкетым арале.23Ончыкыжым вӱдым веле огыл йӱ, а пагаретлан да чӱчкыдын черле лийметлан кӧра йошкар аракамат изиш кучылт.24Южо еҥын языкше раш коеш да судитлымашке вик конда, а южыштын вара почылтеш.25Тыгак поро пашат раш коеш, а кудыжо ок кой гын, шылын кодын ок керт.


*а 5:18 Втор 25:4.

*б 5:22 Кид пыштыме нерген мутерыште мом возымым ончо.

предыдущая глава Глава 5 следующая глава