Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ТИМОФЕЙЛАН КОЛТЫМО ИКЫМШЕ СЕРЫШЫЖЕ

Глава 4

1-16 Ӱшаныше-влакын вуйлатышышт шкеныштым кузе кучышаш улыт.

1Шӱлыш раш ойла: ондалыше шӱлыш-влакым да ия-влакын туныктымыштым колыштын, пытартыш жапыште южышт Христослан ӱшаныме деч кораҥыт.2Тыгай туныктымаш йӱлен пытыше совестян да сайла кояш тӧчышӧ шояче-влак гоч толеш.3Нуно ӱдырым налаш але марлан лекташ чарат да, мом Юмо ӱшаныше да чыным пален налше-влаклан тауштен кочкашышт ыштен, тудым кочкаш чарат.4Юмын ыштыме чылажат сай, тауштен налме гын, нимо шӱкалме лийшаш огыл,5тудым Юмын шомак да кумалме святитлат.

6Тидым иза-шольо-влаклан эре ушештарен шогет гын, Иисус Христосын сай служитлышыже лият, ӱшанымаш шомак тыйым пукша, сай туныктымым шуктен шогет, да тудо тыйым пеҥгыдемда.7А йӧрдымӧ да шонен лукмо тӱрлӧ ойлыштмаш деч кораҥ, Юмым пагалымаште шкендым вияҥде.8Капым вияҥдымаш шагал пайдам пуа, но Юмым пагалымаш чыла шотыштат пайдале, вет тудо кызытсе илышымат, ончыкылык илышымат сӧра.9Тиде мут чын да шӱмыш пышташ чыла шотыштат йӧра.10Вет ме илыше Юмылан ӱшаннам пыштенна, садлан пашам уло вийын ыштена да вурсымым чытена, Тудыжо – чыла айдемын, поснак ӱшаныше-влакын, Утарышышт.11Тидым ышташ кӱштӧ да тидлан туныкто.12Самырыкетлан кӧра тек тыйым шотлыдымо нигӧ ок лий. Мутланымаштат, шкем кучымаштат, йӧратымаштат, шӱлышыштат, ӱшанымаштат, арулыкыштат ӱшаныше-влаклан корным ончыкто.13Мыйын мийымешкем, еҥ-влаклан Возымашым лудмылан, каҥашымылан, туныктымылан шкендым пу.14Пресвитер-влакын тый денет кид пыштымым шуктымышт годым пророкла каласыме гоч Юмын тыланет пуымо моштымашым ит шӱкал.15Тыйын сеҥымашке шуметым чылан ужышт манын, чыла тиде верч тырше, тидлан уло виетым пыште.16Шкендымат, туныктыметымат шекланен шого. Чыла тидым пеҥгыдын кучо, вет тыге ыштымет дене тый шкендымат, колыштшо-влакетымат утарет.


предыдущая глава Глава 4 следующая глава