Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ФЕССАЛОНИКЫШТЕ ИЛЫШЕ-ВЛАКЛАН КОЛТЫМО КОКЫМШО СЕРЫШЫЖЕ

Глава 1

1-2 Саламлымаш. 3-12 Господьын кечыжым вучымаш.

1Павел, Силуан да Тимофей деч мемнан Юмо Ача да Господь Иисус Христос дене ушнен шогышо Фессалоникысе черкылан.

2Мемнан Юмо Ачана деч да Господь Иисус Христос деч тыланда порылык да тыныслык лийже.

3Иза-шольо-влак, ме тендан верч Юмылан эреак таум ыштышаш улына, тыгак лийшаш, вет тендан ӱшанымыда моткоч чот кушкеш да кажныдан икте-весым йӧратымашда шукемеш.4Тыланда чыташ логалше чыла поктылмаш ден йӧсланымаште пеҥгыдын шогымыда да ӱшанымыда дене ме шкежат Юмын черкыж-влак ончылно тендан дене кугешнен кертына.5Юмын судшо чын улмым чыла тиде ончыкта, тыгеракын, те Юмын Кугыжанышлан йӧрышӧ еҥлан шотлалтыда. Юмын Кугыжаныш верчынак те орланеда.6Юмо чын ышта: тендам орландарыше-влаклан орлык дене тӱла,7-8а тыланда, орландарыме-влаклан, тыгак мыланнат ласкалыкым пуа. Тидыже Господь Иисусын виян Суксыж-влак дене пылпомыш гыч тул лоҥгаште толмыж годым лиеш. Тунам Юмым палаш шоныдымо, Господьна Иисус Христосын Поро Увержым колыштдымо еҥ-влакым мут кучаш шогалта.9-10Кунам Иисус шке святойжо-влак коклаште чапланаш, ӱшаныше-влак коклаште моктымо лияш толеш – вет те мемнан таныклымылан ӱшаненда – тудо кечын Господь Поро Уверым колыштдымо-влакым курымашлык пытымашлан судитла, нуно Тудын чурийже деч да Тудын куатшын чапше деч кораҥдыме лийыт.11Сандене ме тендан верч эре кумалына. Тек мемнан Юмына тендам ӱжмашлан йӧрышым ышта да поро деке тыршымыдам да ӱшанымашеш негызлалтше пашадам шке куатше дене тичмашыш шукта.12Мемнан Господьна Иисус Христосын лӱмжӧ тендан гоч чапланыже, мемнан Юмынан да Господь Иисус Христосын порылыкшо дене тыландат Тудын гоч чап лийже манын, ме кумалына.


предыдущая глава Глава 1 следующая глава