Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ФЕССАЛОНИКЫШТЕ ИЛЫШЕ-ВЛАКЛАН КОЛТЫМО ИКЫМШЕ СЕРЫШЫЖЕ

Глава 4

1-12 Юмылан келшыше илыш. 13-18 Господьын толмыжо.

1Икманаш, иза-шольо-влак: Юмылан келшыше илыш дене кузе илаш кӱлмым те мемнан деч тунемында. Но ме Иисус Христосын лӱмжӧ дене сӧрвален йодына: адакат сайракыш тыршыза.2Господь Иисусын лӱмжӧ дене тыланда мом кӱштенна, те паледа.

3Юмын эрыкше тиде: те святой лийшаш да яжарланыме деч шкендам кучышаш улыда.4Тендан кокла гыч кажныже шке капшым святойым да чапыште кучен моштышаш,5Чын Юмым палыдыме калык семын сутланымын тулжылан вуйым ида пу.6Шке лишылжылан нигӧ эҥгекым ыштышаш да тудын кӱшеш пайдам налшаш огыл. Кузе ме тыланда ондакат пеҥгыдын шижтаренна, Господь тыгайлан мутым кучыкта.7Юмо мемнам амырчыкыш огыл, а святой илышыш ӱжын.8Тыгеракын, тиде туныктымо деч кораҥше еҥ айдемым огыл, а мыланна Шкенжын Святой Шӱлышыжым пуышо Юмым кораҥда.

9Но иза-шольо-влакым йӧратыме нерген тыланда возымо ок кӱл, вет икте-весыдам йӧраташ Юмо Шке тендам туныктен.10Уло Македонийысе чыла иза-шольо дене тыгак ыштеда. Тендам сӧрвалена, иза-шольо-влак, адакат сайракыш тыршыза.11Кӱштымына семын тыматлын илымым, шке сомылым шуктымым да илышлан шке кид дене ыштен налмым чаплан шотлыза.12Тунам тендан кузе илымыдам ӧрдыж еҥ-влак пагалат, да те нимо укелыкым огыда пале.

13Иза-шольо-влак, ӱшанен вучымаш деч посна илыше еҥ-влак семын ида ойгыро манын, колышо дене мо лийшаш нерген тендам палдарыде ынем кодо.14Иисус колен да ылыж кынелын манын ӱшанена гын, Иисуслан ӱшанен колышо-влакымат Юмо Тудын дене пырля конда манынат ӱшанена.15Ме тидым Господьын шомакше дене ойлена: ме, Господь толмешке илен шушо-влак, колышо-влакым изишат огына ончылто.16Вет увертарыме годым, Архангелын йӱкшӧ да Юмын пучшо шергылтме годым Господь Шкеак пылпомыш гыч вола, да Христослан ӱшанен колышо-влак эн ондак ылыж кынелыт.17Вара ме, илен шушо-влак, нунын дене пырля Господь дене южышто вашлияш пыл дене кӱзыктымӧ лийына. Тыгеракын, ме эре Господь дене пырля лийына.18Тугеже, тиде шомак дене икте-весыдам кумылаҥден шогыза.


*а 4:3 Эрык – воля, желание.

*б 4:4 «Кап»: грекла возымаште «ате».

*в 4:16 Архангел – ик эн кугу Суксо.

предыдущая глава Глава 4 следующая глава