Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ФЕССАЛОНИКЫШТЕ ИЛЫШЕ-ВЛАКЛАН КОЛТЫМО ИКЫМШЕ СЕРЫШЫЖЕ

Глава 2

1-16 Павелын Фессалоникысе пашаже. 17– 3:13 Павел угыч Фессалоникыш мийынеже.

1Иза-шольо-влак, шкеат паледа: тендан деке мемнан мийымына арам лийын огыл.2Те паледа: тылеч ончыч Филиппыште шуко орлыкым да торжа койышым мыланна чыташ логалын, да тендан денат ваштареш шогеныт гынат, тыланда Поро Уверым каласкалаш Юмо мыланна лӱддымылыкым пуэн.3Мемнан ӱжын ойлымына чын деч кораҥме гычат, амыргыме гычат, чояланыме гычат ок лек.4А Юмо мемнам терген да Поро Уверым мыланна ӱшанаш лиймым ужын, да ме тыгак ойлена: еҥлан огыл, а мемнан шӱмнам тергыше Юмылан келшаш тыршена.

5Ме нигунам сайла кояш тӧчен ойлен огынал манын, те паледа; пайдам налаш шонымына лийын огыл, Юмо тидлан танык.6Ме айдеме деч чапым огына кычал, тендан дечат, моло дечат.7Ме Христосын Апостолжо улына да тендан деч пеҥгыдын йодын кертына ыле, но шке йочажым пукшен ончышо ава гай шыма тендан коклаште лийынна.8Тендам йӧратымыланна кӧра ме Юмын Поро Увержым веле огыл, а шкенан чоннамат тыланда пуаш ямде улына ыле, тунар те мыланна шерге лийында.

9А те, иза-шольо-влак, пашам ыштымынам да тыршымынам шарнеда: тендан кокла гыч иктыланат нелым ышташ огыл манын, Юмын Поро Увержым каласкалымына годым йӱдшӧ-кечыже пашам ыштенна.10Кузе ме святойын, чын да шылталаш лийдымын тендан дене ыштенна, тидлан те, ӱшаныше-влак, да Юмо танык улыда.11-12Тендам шке Кугыжанышкыже да чапышкыже ӱжшӧ Юмылан келшышын илыза манын, ача шке икшывыжым туныктымо семын кажныдам кумылаҥденна, ӱшандаренна да сӧрваленна – тидым те паледа.

13Мемнан деч Юмын шомакым колмекыда, те тудым айдеме шомак семын огыл, а тудо чынжымак могай, тугайым, тендан, ӱшаныше-влакын, коклаште Юмын виян ыштыше шомакше семын ушешда коденда – тидланат ме Юмылан эреак таум ыштена.14Те, иза-шольо-влак, Христос Иисус дене ушнен шогышо Иудейысе черке-влак семын ыштыше лийында. Нуно иудей-влак деч мом чытеныт, теат шкендан калык деч тудымак чытенда.15Иудей-влак Господь Иисусымат, шкеныштын пророкышт-влакымат пуштеденыт, а мемнам поктылыныт. Нуно Юмылан огыт келше да чыла еҥын тушманже улыт.16Чын Юмым палыдыме-влаклан утарыше шомакым ойлаш нуно мыланна чаракым ыштылыныт, да тидын дене шке язык висаштым эре темен шогат. Но пытартышлан нунын ӱмбаке Юмын шыдыже логалын.

17Иза-шольо-влак, кӱчык жаплан тендан деч мыланна ойырлаш логале, но шӱмна дене огыл, а чурийна дене гына, да тендан дене вашлияш эшеат кугу кумыл дене тыршенна.18Ме тендан деке мияш шоненна – мый, Павел, ик гана веле огыл мийынем ыле – но сатана чаракым ыштылын.19Господьна Иисус Христос толмо годым Тудын ончылно кӧ мемнан ӱшанен вучымына але куанна, кӧ мемнан сеҥымаш вуйшӱдышна? Те огыл мо?20Те мемнан чапна да куанна улыда.


предыдущая глава Глава 2 следующая глава