Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОЛОССЯН-ВЛАКЛАН КОЛТЫМО СЕРЫШЫЖЕ

Глава 4

2-6 Черкылан каҥаш-влак. 7-18 Чеверласымаш.

1Оза-влак, кулда-влак дене чын да тӧр ыштыза. Ушыштыда кучыза: пылпомышто тенданат Озада уло.

2Кумалмаштыда чытышан да тӱткӧ лийза, таум ыштыза.3Шке увержым шараш, Христосын тайныжым увертараш, Юмо мыланна омсам почшо манын, мемнан верчынат кумалза. Тиде тайне верчак мый кызыт петырымаште шинчем,4да мый тудым раш палдарышаш улам. Мыланем тидым кӱлеш семын ышташ манын кумалза.5Ӧрдыж-влак дене шкендам моштен кучыза, жапым пайдалын кучылтса.6Мутда эре поро, шинчал дене саемдыме лийже, кажнылан кузе вашешташ пален шогышаш улыда.

7Господьлан ӱшанлын служитлыше, мемнан дене пырля ыштыше йӧратыме Тихик иза тыланда мыйын нерген чылажымат каласа.8Тудым тидланак тендан деке колтенам. Тек тудо тендан дене мо ышталтме нерген пален налеш да шӱмдам кумылаҥда.9Тудын дене пырля ӱшанле да йӧратыме Онисим изана толеш, тудо тендан кокла гыч иктыже. Тысе чыла паша нерген нуно тыланда каласкалат.

10Мый денем пырля казаматыште шинчыше Аристарх, тыгак Варнаван Марк родыжо тыланда саламым колтат. Марк шотышто йодмым налында: тудо тендан деке мия гын, порын вашлийза.11Тыгак Иуст манме Иисус саламым колта. Пӱчман-влак кокла гыч нуно веле Юмын Кугыжанышлан мый денем пырля пашам ыштат. Нуно мыланем кумылаҥдымаш лийыныт.

12Иисус Христосын тарзыже, тендан Епафрасда саламым колта. Те нимогай ситыдымаш деч посна шогыза, чыла шотыштат Юмын эрыкше почеш илыза манын, тудо кумалмаште тендан верч эреак кучедалеш.13Тудо тендан верч да Лаодикий ден Иерапольышто улшо-влак верч уло кумылын тырша манын, мый ӱшандарен кертам.14Йӧратыме врач Лука да Димас тыланда саламым колтат.15Лаодикийысе иза-шольо-влаклан, тыгак Нимфанлан да тудын пӧртеш погынышо черкылан саламым каласыза.16А тиде серышым тендан дене лудмеке, тудым тыгак Лаодикийысе черкыште лудыктыза, Лаодикийысе серышым теат лудса.17Архипплан каласыза: «Шеклане, Господь дене ушнен шогымаште налме служитлыме пашатым шукто».

18Мый, Павел, тиде саламлымашым шке кидем дене возем. Мыйын петырымаште шинчымем шарныза. Тендан дене Юмын порылыкшо лийже. Аминь.


*а 4:12 Эрык – воля, желание.

предыдущая глава Глава 4 следующая глава