Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОЛОССЯН-ВЛАКЛАН КОЛТЫМО СЕРЫШЫЖЕ

Глава 3

1-17 Тошто ден у айдеме. 18– 4:1 Христиан еш ден кул-влак нерген.

1Те Христос дене пырля ылыжында гын, тугеже кӱшылсым кычалза. Тушто Юмын пурла могырыштыжо Христос шинча.2Мланде ӱмбалсе нерген огыл, а кӱшылсӧ нерген шоныза.3Вет те коленда, да тендан илышда Христос дене пырля Юмо дене ушнымаште уждымын саклалтеш.4Кунам Христос, тендан илышда, толеш, тунам теат Тудын дене пырля чапланен толыда.

5Сандене тендан тиде тӱня деч мо уло, тудым пытарыза: яжарланымым, шакшыланымым, сутланымым, осал кумыл шупшмым, опкынланымым. Опкынланымыже шояк юмылан кумалме дене иктак.6Тыгай верчак мут колыштдымо еҥ-влак ӱмбаке Юмын шыдыже возеш.7Ала-кунам теат тыгай койыш кид йымалне лийында, шкендам тыгак кученда.8А ынде те чылажымат ӧрдыжкӧ кораҥдыза: шыдым, ажгынымым, еҥлан осалым шонымым, еҥ ӱмбаке ойлымым, умша гыч лекше шакше мутым.9Икте-весыланда ида шойышт, вет шке ӱмбачда тошто айдемым пашаж дене пырля кудалтенда,10у айдемыш вӱдылалтында. Тудыжо, Пӱрышыжын тӱсан гай лияш келыштаралтын, эре уэмеш, Юмым сайынрак да сайынрак палаш тунемеш.11Тидын шотышто эллинат, иудеят, пӱчмат, пӱчдымат, варварат, скифат, кулат, эрыканат уке, но Христос – тиде чыла да чылаштат.

12Тыгеже, Юмын ойырен налме, святой да йӧратыме еҥ-влак семын, шӱм чаманымаш, порылык, ӱҥышылык, тыматле улмо, шуко чытыме дене вӱдылалтса.13Икте-весыдам чытен илыза, тендан кокла гыч иктаж-кудыжын весылан ӧпкеда уло гын, титакшым кудалтыза. Кузе Христос титакдам кудалтен, теат тугак ыштыза.14Но эн ондак йӧратымаш дене вӱдылалтса, тудо чыла сайым уша.15Тек тендан шӱмыштыда Юмын тыныслыкше озалана. Тыныслыкышке тендам ик кап семын ӱжмӧ. Тауштен моштышо лийза.16Тек тендан чоныштыда Христос шомакын уло поянлыкше ила. Уло уш-акыл дене икте-весыдам туныктыза, икте-весылан каҥашым пуыза, псаломым, моктемурым да шӱлыш кумылаҥдыме мурым шӱмыштыда Господьлан тауштен мурыза.17Мом гына ойледа але ыштеда, чылажымат Господь Иисус Христос лӱм дене ыштыза, Тудын гоч Юмылан да Ачалан таум каласыза.

18Вате-влак, марийдам колыштса, Господьлан ӱшаныше ӱдырамашлан тиде келшен толеш.19Марий-влак, шке ватыдам йӧратыза да нунын дене торжа ида лий.20Йоча-влак, ача-авадам чыла шотыштат колыштса, Господьлан тиде келша.21Ача-влак, йочада-влак вуйым ынышт саке манын, нуным эре ида шылтале.

22Кул-влак, мландӱмбалсе озада-влакым чыла шотыштат колыштса. Тидыжым айдемылан келшаш тӧчен, оза ончымо годым веле огыл, а яндар шӱм дене, Юмо деч лӱдын ыштыза.23Мом те ыштеда, чылажымат айдемылан огыл, а Господьлан ыштыме семын уло кумылын ыштыза.24Господь деч пӧлек шотеш наследствым налшашдам те паледа, вет Христос Господьлан служитледа.25А осалым ыштыше шкенжын осалже денак налеш. Юмо чыла еҥым ик семын онча.


*а 3:10 Пӱрышӧ – Творец.

предыдущая глава Глава 3 следующая глава