Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ФИЛИППЫШТЕ ИЛЫШЕ-ВЛАКЛАН КОЛТЫМО СЕРЫШЫЖЕ

Глава 4

2-9 Каҥаш-влак. 10-20 Пӧлеклан тауштымаш. 21-23 Чеверласымаш.

1Тыгеже, йӧратыме да ужмо шумо иза-шольым-влак, мыйын куанем да сеҥымаш вуйшӱдышем, Господь дене тыге ушнен шогыза, йӧратымем-влак.

2Господь дене ушнен икоян лияш Еводиям да Синтихиям сӧрвалем.3Туге, тыйымат йодам, пашаште ӱшанле йолташем: нине ӱдырамашлан полшо, нуно мый денем пырля, тыгак Климент да мый денем ыштыше моло еҥ дене пырля Поро Увер верч тыршеныт. Нунын лӱмышт – илыш книгаште.4Господь дене ушнен эре куаныза. Угыч каласем: куаныза!5Тендан тыматле улмыда чыла еҥлан палыме лийже; Господь лишнак.6Нимо нергенат ида тургыжлане, а, кумалын, тауштен да сӧрвален, йодмыдам чыла годымат Юмылан палдарыза.7Тунам Юмын кеч-могай уш деч кӱшнӧ шогышо тыныслыкше тендан шӱмдам да шонымыдам Христос Иисус дене ушнымаште арала.

8Пытартышлан, иза-шольо-влак, чыла, мо чын, мо пагалыме, мо сай, мо ару, мо келшыше, мо мокташ йӧрышӧ – мо гына поро лиеш да тауштымым шога гын, тидын нерген шоныза.9Мый дечем те молан тунемында, мом налында, колында да ужында, тудым ыштыза, да тыныслыкым пуышо Юмо тендан дене лиеш.

10Те ынде мыйын верч угыч тыршаш тӱҥалында, садлан Господь дене ушнен моткоч куанышым. Те ондакат полшынеда ыле, но йӧнда лийын огыл.11Мый йорло улмемлан огыл тидым ойлем, мый мо улмо дене серлагаш тунемынам.12Мый чӱдӧ илыш денат, улан илыш денат илен моштем, чыла годымат да чыла вереат темын илашат, шужашат, улан але йорлын илашат тунемше улам.13Мылам вийым пуэн шогышо [Иисус] Христос дене мый чылажымат кертам.14Туге гынат мылам орлыкем куштылемдаш полшымыда дене те сай ыштенда.

15Те, Филиппыште илыше-влак, шкеат паледа: Поро Увер шарлаш тӱҥалме годым, Македоний гыч лекмекем, тендан деч моло ик черкат мыланем полышым пуэн огыл.16Фессалоникыште улмем годымат те кӱлмӧ годым мылам ик гана веле огыл полышым колтенда.17Тендан деч пӧлекым налашлан огыл тидым ойлем, но поро паша лектышда ешаралтмым ужмем шуэш.18А мый чыла налынам, чылажат лыҥ уло. Тендан колтымыдам Епафродит деч налынамат, мыйын чылажат шуко. Мом те пуэнда, тиде «тамле пушан пӧлек», «Юмылан келшыше, йӧрышӧ надыр».19Мыйын Юмем тек тендан чыла кӱлешдам чап дене шке поянлыкше почеш Христос Иисус гоч тема.20Юмылан, мемнан Ачаланна, курым-курымеш чап лийже. Аминь.

21Христос Иисус дене ушнен шогышо чыла святой-влаклан саламым каласыза. Мыйын пеленем улшо иза-шольо-влак тыланда саламым колтат.22Тыланда чыла святой, поснак кесарьын полатысыже-влак, саламым колтат.23Тек Господьна Иисус Христосын порылыкшо чыланда дене лиеш. Аминь.


*а 4:18 Ончо: Быт 8:21, Исх 29:18.

предыдущая глава Глава 4 следующая глава