Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ФИЛИППЫШТЕ ИЛЫШЕ-ВЛАКЛАН КОЛТЫМО СЕРЫШЫЖЕ

Глава 3

1-11 Христослан ӱшаныме гоч чыныш лекмаш. 12– 4:1 Ончыко кайымаш.

1Тыгеракын, иза-шольым-влак, Господь дене ушнымаште куаныза. Тидымак угыч тыланда возымем мыйым ок йӧсландаре, а тыланда пайдале лиеш.

2Пий-влак деч, осал пашаче-влак деч шекланыза, пӱчкедыше-влак деч шекланыза.3Ме, шӱлыш дене Юмылан служитлыше, Христос Иисус дене кугешныше да каплан огыл ӱшаным пыштыше-влак, чынжымак пӱчман улына.4Кеч мый шкеже капланат ӱшаным пыштен кертам ыле. Иктаж-кӧ каплан ӱшаным пышташ шона гын, тидлан мыйын амал утларак уло:5шочмекем, мылам кандашымше кечын пӱчмӧ йӱлам ыштеныт, Израиль калык гыч Вениамин тукым, еврей деч шочшо еврей улам, а законым шуктымо шотышто фарисей лийынам,6Юмын Черкым поктылмо марте тыршыше лийынам, законым шуктымо гыч лекше чын ыштымаш шотышто – шылталаш лийдыме айдеме.7Но мо мыланем сеҥымаш лийын, тидым Христослан кӧра йомдарымашлан шотлем.8-9Туге, мый чылажымат оккӱллан шотлем, вет Христос Иисусым, мыйын Господьым, палымаш мылам чыла моло деч утларак чапле. Тудлан кӧра мый чылажымат кудалтенам. Христосым шкаланем муын налаш да Тудын дене тӱрыснек ушнен шогаш манын, мый чылажымат йӧрдымылан шотлем. Тыге мый шкаланем кӧра, законым шуктымо дене огыл, а Христослан ӱшаныме дене чын ыштышыш лектам. Тыгай чын ыштымаш ӱшанымылан кӧра Юмо деч лиеш.10Мый Христосым да Тудын ылыжмыжын куатшым палынем, Тудын орланымашкыже ушнынем да Тудын колымыж дене Тудын гай лийнем.11Тыге ала мыят колымаш гыч ылыжтыме лиям.

12Мый кушко кайышаш улам, тушко шуынам але тичмашлыкыш толынам манын ом ойло, но, кузе Христос Иисус мый декем шуын, тугак, шуаш тыршен, вийым пыштен, ончыко каем.13Иза-шольо-влак, мый кушко кайышаш улам, тушко але шуынам манын ом шотло гынат, иктым ыштем: шеҥгелан кодшым чыла монден, ончыко уло вийын каем.14Мый тушко шунем, кушто Христос Иисус дене ушнен шогымаште Юмын эн кӱшыл ӱжмашлан кӧра пуалтшаш сеҥымаш пӧлек мыйым вуча.15Тугеже мемнан кокла гыч ӱшанымаште кушкын шушо-влак тыге шонышаш улыт, а те иктаж-мо нерген вес семын шонеда гын, тидымат Юмо тыланда почеш.16Кеч-мо лийже, ме могай кӱкшытыш шуынна, ме тыге шонышаш да тудо правил почешак илышаш улына.

17Иза-шольо-влак, мыйын семынем ыштыза, мемнан тыланда ончыктымо корно дене коштшо-влак ӱмбаке ончыза.18Мый тидын нерген тыланда чӱчкыдын ойленам, да ынде шинчавӱд йӧре каласем: шукышт Христосын ыресшын тушманже семын илат.19Нунын мучашышт – пытымаш, нунын юмышт – кочмаш-йӱмаш, а чапышт – намысан койыш. Нуно мланде ӱмбалсе нерген шонат.20Но мемнан илыме верна пылпомышто, тушечын ме Утарышым, Господь Иисус Христосым, вучена.21Кид йымакыже чыла налаш Тудын куатше уло, тиде куат дене Тудо мемнан начар капнам Шкенжын чапланыше капше гайыш савыра.


предыдущая глава Глава 3 следующая глава