Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ФИЛИППЫШТЕ ИЛЫШЕ-ВЛАКЛАН КОЛТЫМО СЕРЫШЫЖЕ

Глава 1

1-2 Саламлымаш. 3-11 Филиппысе черке верч Юмылан тауштен кумалмаш. 12-30 Христос – илыш.

1Иисус Христосын Павел ден Тимофей тарзыже-влак деч Христос Иисус дене ушнен шогышо, Филиппыште улшо чыла святой-влаклан, тыгак епископ ден диакон-влаклан.

2Мемнан Юмо Ачана деч да Господь Иисус Христос деч тыланда порылык да тыныслык лийже.

3Кеч-кунамат тендам шарналтымем годым Юмемлан таум ыштем.4Тендан чыланда верч Юмым сӧрвалымем годым эре куанен кумалам,5вет те икымше кече гычак таче мартеат Поро Уверым шарымаште полшеда.6Мый ӱшанем: поро пашам тендан кӧргыштӧ тӱҥалше Юмо тудым Иисус Христосын кечыж марте мучашыш шукта.7Чыланда нерген мыйын тыге шонымем чын. Те шӱмыштем улыда. Петырымаште лиям але Поро Уверым арален ойлем, але тудын верч ӱшандарен каласкалем, чылан мый денем пырля Юмын порылыкыштыжо улыда.8Мый тендам Иисус Христосын йӧратымыж дене йӧратем, тидлан Юмо таныклыше.9Тендан йӧратымашда шинчымаш да шижын моштымаш дене эре утларак шукемже манын, мый кумалам.10Тунам мо эн сай улмым терген кертыда, Христосын кечынже ару, йоҥылышдымо11да Иисус Христосын шочыктымо чын ыштымаш саска дене тич темыда, тидыже Юмылан чапым да моктымашым конда.

12Иза-шольо-влак, палыза шонем: мо мый денем лийын гын, Поро Уверлан пайдам конден.13Ынде преторийысе уло калыклан, тыгак чыла молыланат палыме лийын: мый петырымаште Христос верч улам.14Мыйын петырымаште шинчымемлан кӧра иза-шольо-влак кокла гыч шукыракыштын Господьлан ӱшанымышт пеҥгыдемын, Юмын шомакым эшеат талын да лӱдде каласкалаш тӱҥалыныт.

15Чын, иктышт кӧранымышт да ӱчашаш йӧратымыштлан кӧра Христос нерген увертарат, а весышт тидым поро шонымаш дене ыштат:16икымшышт ару огыл чон дене, шкалан пайдам кычалмылан кӧра Христос нерген увертарат, тидын дене мылам петырен шинчымаште нелылыкым ыштынешт,17а мыйым Поро Уверым аралаш шогалтымым палатат, кокымшышт йӧратымылан кӧра ыштат.18Но Христос нерген кеч-кузе увертарышт, сайла кояш тӧчен але чын шонымаш дене, тидлан мый куанем веле.

Ончыкыжымат куанаш тӱҥалам,19вет мый палем: тендан кумалмыланда да Иисус Христосын Шӱлышыжын полшымылан кӧра тиде чылажат мыланем утарымашке савырна.20Мый чот вучем да ӱшанем: мылам нимо шотыштат вожылаш ок логал, но лӱддымӧ лиям, да кеч илыш, кеч колымаш лийже, Христос мыйын капем гоч кызыт моло годымсо семынак чаплана.21Илыш мыланем – Христос, а колымаш – сеҥымаш.22Капыште илымаш мыйын пашам гоч саскам конда гын, мом ойырен налаш, мый ом пале.23Мыйым тидыжат, тудыжат шупшеш: мый тиде илыш гыч кайынем да Христос дене лийнем, тидыже шуко пачаш сайрак,24но капыште илаш кодаш тыланда верч кӱлешанрак.25-26Мый тидлан ӱшанем, сандене палем: те ӱшанымаште сеҥымашке шуза да куаныза манын, мый тышан кодам да, тендан деке угыч мийымекем, мыланем кӧра куанда Христос Иисус дене ушнен шогымаште лыҥ лийже манын, чылада дене пырля улам.

27Ончыза, Христосын Поро Увержылан йӧрышӧ илыш дене илыза. Мый тендам ужаш мием але тендан деч тораште лиям, те ик шӱлыш дене икоян улыда да Евангелиеш негызлалтше ӱшанымаш верч пеҥгыдын шогеда манын колнем.28Ваштареш шогышо-влак деч те нимо шотыштат лӱдшаш огыдал. Тидыже нунылан колымашын палыже улеш, а тыланда утарымашын палыже – тидыже Юмо деч.29Вет Христослан ӱшанаш гына огыл, Тудын верч орланашат тыланда пиал пуалтын.30Мыйын кредалмашем те ондак ужында, тудым шуйымем нерген кызыт колыда. Тенданат тиде кредалмашак.


предыдущая глава Глава 1 следующая глава