Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕФЕСЯН-ВЛАКЛАН КОЛТЫМО СЕРЫШЫЖЕ

Глава 6

1-4 Йоча да ача-ава. 5-9 Кул-влак да нунын озашт. 10-20 Юмын пуымо сарӱзгарже. 21-24 Чеверласымаш.

1Йоча-влак, Господь дене ушнен, ача-авадан мутыштым колыштса, вет Юмын ончылно тиде сай.2«Шке ачат ден аватым пагале», – тиде икымше кӱштымаш, тудын дене пырля сӧрымаш пуалтын:3тунам «тыланет сай лиеш, да мланде ӱмбалне кужу ӱмыран лият».4Те, ача-влак, йочада-влакым шыдылан ида тарате, а Господьын туныктымыж да тӧрлатымыж дене нуным ончен куштыза.

5Кул-влак, мландӱмбалсе озада-влакым Христосым колыштмо семын, лӱдын да пагален, яндар шӱм дене колыштса.6Айдемылан келшаш тӧчен, оза ужмо годым веле огыл тыге ыштыза, а, Юмын эрыкшым уло чон дене шуктен, Христосын тарзыже семын ыштыза.7Айдемылан огыл, а Господьлан служитлыме семын уло кумылын шке пашадам ыштыза.8Пален лийза: кӧ иктаж-могай порым ышта гын, кеч кул, кеч эрыкан лийже, Господь деч порылыкым налеш.9Теат, оза-влак, лӱдыктылмашым коден, кулда-влак дене тугак ыштыза. Пален лийза: пылпомышто нунынат, тенданат Господь уло, Тудо чыла айдемым ик семын онча.

10Иза-шольым-влак, пытартышлан ойлынем: Господь да Тудын кугу вий-куатше дене пеҥгыдемза.11Диаволын осал шонымыжлан ваштареш шоген кертса манын, Юмын уло сарӱзгарже дене вӱдылалтса.12Вет кучедалмашна еҥ-влак ваштареш огыл, а тиде курымысо пычкемышын вуйлатышыже, властьше ден тӧраже-влак ваштареш, кава йымалсе осал шӱлыш-влак ваштареш.13Тыгеже Юмын уло сарӱзгаржым налза. Тунам те осал кечын ваштареш шогалын да, чыла шуктымеке, пеҥгыдын шоген кертыда.14Тугеже ямде лийза: кыдалешда чыным ӱшталза, чын ыштымашым кӱртньӧ тувыр семын чийыза,15тыныслык нерген поро уверым каласкалаш ямде улмым йолешда чийыза.16А эн чотшо Юмылан ӱшанымашым авыртыш семын налза, тудын дене те осалын чыла йӱлышӧ пикшыжым йӧртен кертыда.17Утарымашым шлем семын упшалза, Шӱлышын кердыжым, вес семынже Юмын шомакым, налза.

18Эре сӧрвалыза да йодса, чыла годымат Шӱлыш дене кумалза, тӱткӧ лийза да кугу чытымаш дене чыла святой-влак верч Юмым сӧрвалыза.19Ойлымем годым мылам кӱлеш шомакым Юмо пуыжо да Поро Уверын тайныжым лӱдде палдараш йӧным ыштыже манын, мыйын верчат кумалза.20Поро Уверлан кӧра мыйым колтымо да кучен петырыме. Поро Увер нерген еҥ-влак ончылно кӱлеш семын лӱдде каласкалаш мылам полшыжо манын, Юмым сӧрвалыза.

21Мыйын пашам кузе кайыме да кузе илымем нерген теат палыза манын, Господьын ӱшанле служитлышыже, йӧратыме Тихик иза тыланда чыла каласкален пуа.22Мемнан нерген чыла палдараш да тендан шӱмдам кумылаҥдаш манын, мый тудым тендан деке колтенам.

23Иза-шольо-влаклан Юмо Ача да Господь Иисус Христос деч тыныслык, йӧратымаш да ӱшанымаш лийже.24Мемнан Господьна Иисус Христосым вашталтдыме йӧратымаш дене йӧратыше чыла айдеме пелен порылык лийже. Аминь.


*а 6:2-3 Исх 20:12, Втор 5:16.

*б 6:6 Эрык – воля, желание.

предыдущая глава Глава 6 следующая глава