Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕФЕСЯН-ВЛАКЛАН КОЛТЫМО СЕРЫШЫЖЕ

Глава 5

6-20 Волгыдын икшывыже семын илыза. 21-33 Марий ден вате.

1Те Юмын йӧратыме икшывыже улыда гын, тугеже Тудын семын ыштыза.2Кузе Христос мемнам йӧратен да Шкенжым мемнан верч жертве семын, тамле пушан пӧлек семын Юмылан пуэн, туге йӧратен илыза.3Но яжарланыме, тӱрлӧ ару огыл койыш але опкынланыме нерген тендан коклаште мутымат лукман огыл, святой-влаклан тиде келшен ок тол.4Тыгак шакшын мутланымаш, кӱлеш-оккӱлым ойлыштмаш, игылт воштылмаш тыланда йӧрдымӧ, тыгай олмеш те Юмылан таум ыштышаш улыда.5Пален лийза: ик яжарланышынат, але ару огылынат, але опкынланышынат – опкынланымыже шояк юмылан кумалме дене иктак – тыгайым ыштыше ик айдемынат Христосын да Юмын Кугыжанышыште нимогай наследствыже уке.

6Тек тендам яра ойлыштмо дене нигӧ ынже ондале, вет тидын верчак мут колыштдымо еҥ-влак ӱмбаке Юмын шыдыже возеш.7Тыгай еҥ-влак деке ида ушно.8Ондак те пычкемыш лийында, а ынде, Господь дене ушнен, волгыдо улыда. Волгыдын йочашт семын илыза,9вет Шӱлышын саскаже – тӱрлӧ порылык, чын ыштымаш да чын.10Юмылан мо келшымым эре терген шогыза.11Пычкемышын саскадыме пашаж деке ида ушно, а тыгайым тӱжвак лукса.12Еҥ-влакын шолып ыштыме пашашт нерген ойлашат намыс.13Но волгыдо дене тӱжвак лукмо годым чыла раш коеш. Тӱжвак лукмо чылажат волгыдо лиеш,14сандене каласыме:
«Малыше, кынел да колымаш гыч ылыж,
тыйым Христос волгалтараш тӱҥалеш».

15Тугеже, кузе илымыдам тӱткын ончыза. Ушдымо семын огыл, а уш-акылан семын илыза,16жапым пайдалын кучылтса, вет нине кече ондалчыкан улыт.17Сандене шонен моштыдымо ида лий, а Юмын эрыкшым умылаш тыршыза.18Руштмешке ида йӱ, тиде яжарланымашке конда, а Святой Шӱлыш дене темалтса.19Икте-весыдам псалом да шӱлыш кумылаҥдыме моктен мурымаш дене пеҥгыдемдыза, шӱмыштыда Господьлан мурыза да семым шоктыза.20Мемнан Господьна Иисус Христос лӱм дене эре да чыла верч Юмылан, Ачалан, таум ыштыза.

21Юмо деч лӱдын, икте-весыдам колыштын илыза.22Вате-влак тек шке марийыштым Господьым колыштмо семынак колыштыт,23вет кузе Христос Черкылан вуй улеш, да Тудак капын Утарышыже, тугак марият ватылан вуй улеш.24Кузе Черке Христосым колыштеш, тугак вате-влакат шке марийыштым чыла шотыштат колыштшаш улыт.

25-26Марий-влак, Христосын Черкым йӧратымыж семын шке ватыдам йӧратыза. Черкым святитлаш манын, Христос Шкенжым пуэн, тудым вӱд дене да шомак дене мушкын эрыктен.27Христос Шке ончыланже Черкым чап дене, лавыран тамга але иктаж-могай экшык деч посна шогалтынеже, Черкыже святой да нимогай ситыдымаш деч посна лийшаш.28Тыгак марият ватыжым шке капшым йӧратыме семын йӧратышаш. Ватыжым йӧратыше шкенжым шке йӧрата.29Нигӧ нигунам шке капшым ужмышудымо ок лий, а тудым пукша да ырыкта. Тыгак Черке верч Господь тырша,30вет ме Тудын капшын ужашыже улына, Тудын капше ден лужо деч улына.31«Сандене пӧръеҥ ачаж ден аважым кода, шке ватыж дене ушна, да нуно коктын ик кап ден чон лийыт.»32Тиде кугу тайне, а ойлемже Христос да Черке нерген.33Но тендан коклаштат тугак лийже: кажныже шкенжым йӧратыме семын тек ватыжым йӧрата, а вате тек марийже деч лӱдеш.


*а 5:13 «Тӱжвак лукмо чылажат волгыдо лиеш»: грек шомакым «Волгыдо чыла тӱжвак луктеш» манынат кусараш лиеш.

*б 5:17 Эрык – воля, желание.

*в 5:23 Кап – тыште «Черке» манын умылыман.

*г 5:31 Быт 2:24.

предыдущая глава Глава 5 следующая глава