Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕФЕСЯН-ВЛАКЛАН КОЛТЫМО СЕРЫШЫЖЕ

Глава 4

1-16 Христосын Черкыжын иктылыкше. 17-24 Ончычсо илыш да у илыш. 25– 5:5 У илышлан каҥаш-влак.

1Тыгеракын мый, Господь верч кучен петырыме еҥ, налме ӱжмашда дене келшен илаш сӧрвалем.2Эре ӱҥышӧ, тыматле да чытыше лийза, икте-весыдам йӧратен чытыза.3Шӱлышын кондымо иктылыкшым тендам ушышо тыныслык дене аралаш тыршыза.4Ик кап да ик Шӱлыш уло, ӱшанен вучымашат тыгак икте, те тушко ӱжмӧ улыда.5Ик Господь, ик ӱшанымаш, ик тынеш пуртымаш,6ик Юмо да чылан Ачаже. Тудо чыла ӱмбалне шога, чыла гоч ышта да чыланнан чонышто ила.

7А мемнан кокла гыч кажнылан Христосын висен пуымыж дене келшышын посна пӧлек пуалтын.8Сандене Возымаш ойла:
«Тудо кӱкшытыш кӱзен,
пленыш налме-влакшым наҥгаен
да айдеме-влаклан пӧлекым пуэден».
9Тудын кӱзымыжӧ мом ончыкта? Тудын ондакше мланде пундашке волымыжым ончыкта.10Тиде Волышыжак, уло сандалыкым темаш манын, чыла пылпомыш деч кӱшкӧ кӱзен.11Тудо иктыштым Апостоллан, весыштым пророклан, иктыштым Поро Уверым каласкалышылан, весыштым пастырьлан але туныктышылан шогалтен.12Служитлыме пашалан, Христосын Капшым чоҥымылан святой-влакым ямдылаш манын, Тудо тыге ыштен.13Тыгеракын, пытартышлан ме чылан ӱшанымаште да Юмын Эргыжым палымаште иктылыкыш шуына, кушкын шушо, Христосын тичмашлыкше дене келшыше кӱкшытыш шушо лийына.14Тунам ме толкын кышкылтме, чыла туныктымашын мардежше пуэн наҥгайме, алгаштараш уста чоя еҥ-влакын ондалыме изи йоча гай огына лий,15а чыным кучен, йӧратен илен, Тудын деке ушнымашке чыла шотыштат кушкын толына, Тудыжо вуй, Христос улеш.16Тудын деч уло кап, пырля кучышо кажне йыжыҥ полшымо дене иктеш ушнен шоген, кажне посна ужашын шке ыштышашыжым ыштымыж семын кушкеш да йӧратымаште шкенжым чоҥен пеҥгыдемда.

17Тыгеже мый Господьын лӱмжӧ дене тидым ойлем да сӧрвалем: моло калык семын кӱлдымӧ шонымаш дене умбакыже ида ыште.18Нунын ушыштым пычкемыш авалтен, палыдымыштлан да шӱмышт кӱэмалтмылан кӧра Юмын илыш деч ӧрдыжтӧ улыт.19Нуно чыла шижмашым йомдареныт, шала койышлан шкеныштым пуэныт, тӱрлӧ йырныкым опкынланен ыштат.20Но те тыге огыл Христос нерген тунемында.21Иисус нерген те колында да, Тудын тунемшыже лийын, Тудын дене улшо чынлан туныктымо лийында гын,22тугеже ондалчыкан сутланымаш дене эркын-эркын пытаралтше тошто айдемыдан ончычсо койышыж деч кораҥшаш улыда.23Тендан шӱм-чон шӱлышда да ушда уэмшаш улыт,24Юмо гай лияш ыштыме, чынын йодмыж дене чын да святойла илыше у айдемыш вӱдылалтшаш улыда.

25Сандене, шоям ӧрдыжеш коден, чылан шке лишылда-влаклан чыным ойлыза, вет ме икте-весын ужашыже улына.26Сыреда гынат, языкым ида ыште: кече шичмешке, шыдешкымыдам кудалтыза,27да диаволлан верым ида пу.28Кӧ шолыштын, тек ынде ок шолышт, йорло еҥлан кушеч ойырен пуаш лийже манын, тек шке кидше дене пайдале пашам тыршен ышта.29Тендан умшада гыч нимогай йӧрдымӧ мут ынже лек, а колыштшо-влаклан порым кондышо, ӱшанымаште пеҥгыдемдыше поро шомакым веле ойлыза.30Юмын Святой Шӱлышыжым ида ойгаҥдаре, вет те эрыкыш лукмо кечын Шӱлыш дене палемдыме улыда.31Чыла чон кочым, ажгынымым, шыдым, кычкырымым, мыскылымым чыла осаллык дене пырля кудалтыза.32Икте-весе деке поро да пушкыдо кумылан лийза. Кузе Юмо тендан титакдам Христос гоч кудалтен, теат тугак икте-весын титакыштым кудалтыза.


*а 4:8 Пс 67:19.

*б 4:25 Зах 8:16.

*в 4:26 Пс 4:5.

предыдущая глава Глава 4 следующая глава