Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ЕФЕСЯН-ВЛАКЛАН КОЛТЫМО СЕРЫШЫЖЕ

Глава 2

1-10 Колымаш гыч илышыш. 11-22 Иудей да моло калыкым Христос иктеш уша.

1Те ондак осал пашаланда да языкланда кӧра колышо лийында.2Тудо жапыште те осалым ыштен иленда, тиде тӱнясе илыш-йӱла дене келшышын, южысо властьын тӧражын – мут колыштдымо-влак коклаште кызытат ыштыше шӱлышын – шонымыж семын ыштенда.3Нунын коклаште ондак меат чылан кап ден чоннан сутланымыже почеш, кап ден чонын да шонымашын йодмыштым шуктен иленна да пӱртӱсна дене моло семынак Юмын шыдыжым ужшаш улына ыле.4Но порылыклан поян Юмо шке кугу йӧратымашыж дене мемнам туге йӧратен,5мемнам, осал пашаланна кӧра колышо-влакым, Христос дене пырля илышым ыштен. Юмын порылыкшо дене те утарыме улыда.6Тыгак Юмо мемнам Христос Иисус дене ылыжтен да Тудын дене ушнымаште мемнам пылпомышто шынден.7Мыланна, Христос Иисус дене ушнышо-влаклан, ончыктымо порылыкшо дене Юмо Шкенжын алалжын лыҥ поянлыкшым шушаш курымлаште ончыкташ шонен.

8Юмын порылыкшо дене, ӱшаныме гоч, тендам утарыме. Утарымаш тендан деч огыл, а Юмын пӧлекше,9тиде – паша деч огыл, сандене нигӧ моктанен ок керт.10Ме Тудын ыштымыже улына, Тудын ончылгоч ямдылыме поро пашажым шукташ Юмо мемнам Христос Иисус гоч ыштен.

11Тыгеже шарныза: ондак те, шочынжо Юмым палыдыме-влак – капым айдемын кидше дене пӱчмылан кӧра пӱчман маналтше-влак тендам пӱчдымӧ маныт –12те тудо жапыште Христос деч посна ыльда да Израиль калык деч ӧрдыжтӧ лийында, сӧрымашан сугынь-влаклан йот лийында, те тӱняште ончыкылан ӱшан да Юмо деч посна иленда.13А ынде те, ондакше тораште лийше-влак, Христос Иисус дене ушнымаште Христосын Вӱржӧ гоч лишемында.

14-15Вет Христос – мемнан тыныслыкна, кок тӱшка гыч Тудо иктым ыштен да нуным ойырышо пырдыжым, вес семынже тушманлымашым, шке айдеме капше дене шалатен. Нине кокыт гыч Шкеж дене ик у айдемым ышташ манын, законым, тудын кӱштымыж ден пунчалже-влакым укеш луктын, тидын дене тынысым конден.16Тыге Христос тушманлымашым ырес гоч пытараш, тушто нине кокыт ден Юмо коклаште сӧрасымашым ышташ да нуным ик капеш ушаш шонен.17Тудо толын да тыланда, тораште улшо-влакланат, лишне улшо-влакланат тыныслык нерген поро уверым каласкален.18Тудын гоч иктыштат, весыштат ик Шӱлыш дене Ача деке шуын кертыт.

19Тыгеже, те ынде йот да ӧрдыж еҥ огыдал, а святой-влак дене пырля ик калыкак лийында, Юмын еҥже-влак улыда.20Те Апостол ден пророк-влакын негызешышт чоҥымо улыда, а негызын пусак кӱжӧ – Иисус Христос Шкежак.21Тушан уло оралте ушна, кушкеш да Господьын святой храмже лиеш.22Христос дене ушнен шогымаште теат Шӱлыш дене Юмын илемже лийыда.


*а 2:22 «Шӱлыш дене Юмын илемже лийыда»: тидым «Илем лийыда, тушто Юмо Шӱлышыж гоч ила» манынат кусараш лиеш.

предыдущая глава Глава 2 следующая глава