Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ГАЛАТ-ВЛАКЛАН КОЛТЫМО СЕРЫШЫЖЕ

Глава 5

1-15 Эрыкыште лийза. 16-26 Шӱлышын саскаже да кап ден чонын пашаже.

1Тугеже, Христосын мыланна пуымо эрыкыштыже пеҥгыдын шогыза да угычын кул пызыралтмашке шкендам кепшылташ ида пу.2Теве мый, Павел, тыланда ойлем: те шкендам пӱчкыктеда гын, Христос тыланда нимогай пайдам ок кондо.3Шкенжым пӱчкыктышӧ кажне еҥлан адак шижтарем: тудо законым тӱрыснек шуктышаш.4Те, законым шуктымо дене шкендам чыныш лукташ шонышо-влак, Христос деч кораҥында, Юмын порылыкшо деч ойырленда.5А ме Шӱлыш дене ӱшанымына гоч чыныш лукмым вучена, чыныш лукмылан ӱшаннам пыштена.6Ме Христос Иисус дене ушнен шогена гын, мыланна пӱчмӧ йӱлам эртарыме але уке – садиктак, йӧратымаш гоч саскам пуышо ӱшанымаш гына кӱлешан.

7Те сайын тӱҥалында. Чыным колышташ огыл манын, кӧ тендам чарен шогалтен?8Тыгай чарак тендам Ӱжшӧ деч огыл.9Шагал ру уло руашым шукта.10Мый тыланда ӱшанем, вет ме чылан Господь дене ушнен шогена: те вес семын шонаш огыда тӱҥал. А тендам пудыратылше, кӧ гына ынже лий, судитлыме лиеш.11Иза-шольо-влак, пӱчмаш кӱлеш манын, мый алят увертарем гын, молан мыйым адак шыгыремдылыт? Тыгеже ырес нерген шомак еҥ-влакым шыдештарымым чарна ыле.12О, тендам пудыратылше-влак кораҥдыме лийыт ыле гын!

13Те, иза-шольо-влак, эрыкыш ӱжмӧ улыда. Но эрыкда кап ден чонын йодмыштлан йӧным ынже ыште, а икте-весыланда йӧратен полышкалыза.14Вет чумыр закон тиде ик оеш шыҥдаралтеш: «Шкендым кузе йӧратет, лишыл еҥетымат тугак йӧрате».15А икте-весыдам пурыда да кочкыда гын, ваш-ваш пытарыме деч шекланыза.

16Мый тидым ойлынем: Шӱлыш вуйлатыме почеш илыза, тунам те кап ден чонын сутланымым огыда шукто.17Вет кап ден чон шонымаш Шӱлыш ваштареш ыштынеже, а Шӱлыш – кап ден чон шонымо ваштареш. Нуно икте-весыштлан ваштареш шогат, сандене те мом ышташ шонеда, тудым огыда ыште.18А тендам Шӱлыш виктарен шога гын, те закон йымалне огыдал.

19Кап ден чонын пашаже чылалан коеш. Тиде: еҥ вате дене коштмаш, яжарланымаш, амыргымаш, аташланымаш,20шояк юмылан кумалмаш, юлымаш, сырен илымаш, ӱчашымаш, кӧранымаш, шыдешкымаш, шкалан пайдам кычалмаш, келшыдымаш, [алгаштарымаш,] йоҥылыш туныктымаш,21кӧранен ыштымаш, пуштедылмаш, аракам йӱмаш, йӱын пайремлымаш да тулеч молат. Кузе ондак тыланда ойленам, кызытат ойлем: тыге ыштыше-влак Юмын Кугыжанышым огыт нал.22А Шӱлышын саскаже: йӧратымаш, куанымаш, тыныслык, кужун чытымаш, алал кумыл, порылык, ӱшанымаш,23ӱҥышылык, шкем кучымаш. Закон тыгай-влак ваштареш огыл.24Но кудышт Христосын улыт, нуно кап ден чоным да нунын сутланен йодмыштым ыресеш пудаленыт.

25Ме Шӱлыш дене илена гын, тугеже Шӱлыш вуйлатыме почеш ыштышаш улына.26Яра чапым кычалше, икте-весым сырыктыше, икте-весылан кӧраныше лийшаш огынал.


*а 5:14 Лев 19:18.

*б 5:22 «Ӱшанымаш» – тидым «ӱшанлык» манынат умылаш лиеш.

предыдущая глава Глава 5 следующая глава