Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ГАЛАТ-ВЛАКЛАН КОЛТЫМО СЕРЫШЫЖЕ

Глава 4

8-20 Галат-влак верч Павелын тургыжланымыже. 21-31 Агарь ден Сарра.

1Эше каласынем: наследник чылалан оза гынат, йочаж годым тудо кул деч нимо денат ок ойыртемалт.2Ачажын палемдыме жап марте тудо ончышын да сурт-печым вуйлатышын кид йымалнышт лиеш.3Тыгак меат: йоча улмына годым тӱрлӧ пӱртӱс вийын кулжо лийынна,4-5но жап шке тичмашышкыже шумеке, Юмо [Ик Шкет] Эргыжым колтен. Закон йымалсе-влакым тӱлен налаш да мыланна Юмын икшыве лияш манын, Эргыже закон кид йымалне ӱдырамаш деч шочын.6А те Тудын икшывыже улыда, сандене Юмо Эргыжын «Авва, Ача!» манын ӱжшӧ Шӱлышыжым шӱмышкыда колтен.7Тыгеже тый ынде кул отыл, но эрге, а эрге улат гын, Иисус Христос гоч Юмын наследникше улат.

8Но ондак, кунам те Юмым пален огыдал, тугай-влакын кулышт лийында, могайышт чынжым юмо огытыл.9А ынде Юмым паледа але, чынрак каласаш гын, Юмо тендам пала. Молан угычын тӱрлӧ лунчырго да чӱдӧ пӱртӱс вий деке пӧртылыда, шкендам адакат тудын кулышкыжо савырынеда?10Те кече, тылзе, идалык жап да ий-влакым посна палемдеда.11Тендан верч лӱдам. Арам мо мый тендан верч тынар пашам ыштенам?

12Иза-шольо-влак, тендам сӧрвален йодам, мый гаемак лийза, вет мыят тендан гаяк лийынам. Те мыланем нимо удам ыштен огыдал.13Те паледа: икымше гана тыланда Поро Уверым начар лиймем годым каласкаленам.14Кап дене орланенам гынат, те йыгыжген огыдал да шкендан деч ышда шӱкал, а Юмын Суксыжым але Христос Иисусым вашлийме семын мыйым вашлийында.15Могай те поро пиалан лийында! Тендан нерген таныклем: лиеш ыле гын, те шке шинчадам луктыда да мыланем пуэда ыле.16Тыгеже тыланда чыным ойлымо дене але мый тушманышкыда савырненам?

17Тендан верч саде еҥ-влак тыршат, но порым огыт шоно, а шкенышт верч тыршыза манын, мемнан деч тендам ойырынешт.18Порылан тыршымаш эре сай, тендан дене лиймем годым гына огыл.19Икшывем-влак, Христосын сынже тендан гоч кояш тӱҥалмешке, тыланда верч мылам азам ыштыме годсо гай орланымым угыч чыташ логалеш.20Кузе тендан дене ынде лийнем да йӱкем вашталтынем ыле! Мом тендан дене ышташ, мый ом пале.

21Те, закон йымалне лияш шонышо-влак, мыланем каласыза: але те законым огыда колышт?22Вет возымо: Авраамын кок эргыже лийын, иктыже кул ӱдырамаш деч, а весыже – эрыкан деч.23Кул ӱдырамаш деч шочшо эрге пӱртӱс пуымо почеш шочын, а эрыкан ӱдырамаш деч шочшо – Юмын сӧрымӧ почеш.24Тыште туштен каласымаш уло. Нине кок ӱдырамаш – кок сугынь. Иктыже Синай курык деч, тудо кул лияш шочыкта. Тиде – Агарь.25Вет Агарьже Аравийысе Синай курыкым ончыкта, а Синай курыкшо кызытсе Иерусалимлан келшен толеш. Тудыжо шке икшывыж-влак дене кулышто улеш.26А пылпомышсо Иерусалим эрыкан, тудо мемнан чыланнан авана.27Вет возымо:
«Йочам ыштен кертдыме, азам ыштыдыме – куане,
азам ыштен орланыдыме – йывыртен кычкырал,
вет шкет ӱдырамашын йочаже шуко,
мариян ӱдырамашын дечат утларак».

28Ме, иза-шольо-влак, Исаак семын Юмын сӧрымашын шочшыжо улына.29Кузе пӱртӱс пуымо почеш шочшо эрге Шӱлыш пуымо почеш шочшым тунам поктылын, кызытат тугак.30А Возымаш мом ойла? «Кул ӱдырамашым да эргыжым поктен колто. Кулын эргыже эрыканын эргыж дене пырля наследник огеш лий».31Тыгеракын, иза-шольо-влак, ме кул ӱдырамашын огыл, а эрыканын икшывыж-влак улына.


*а 4:22-23 Быт 16‚18:1-15‚ 21:1-21.

*б 4:27 Ис 54:1.

*в 4:30 Быт 21:10.

предыдущая глава Глава 4 следующая глава