Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ГАЛАТ-ВЛАКЛАН КОЛТЫМО СЕРЫШЫЖЕ

Глава 3

1-14 Закон да Христослан ӱшанымаш. 15-18 Сӧрымаш ден закон. 19– 4:7 Закон молан кӱлеш?

1О, умылыдымо галат-влак, кӧ тендам чын деч кораҥаш ондален таратен? Шинча ончылныда Иисус Христос тендан дене пудален сакыме [гаяк] сӱретлалтын.2Тендан деч тидым гына пален налнем: законым шуктымо дене те Юмын Шӱлышым налында мо але колмо уверлан ӱшаныме дене?3Тунарак те умылыдымо улыда мо? Шӱлыш дене тӱҥалында, а ынде кап да чон дене мучашледа?4Арамак мо те тынар шуко чытенда? Уке, арам огыл, шонем.5Юмо тыланда Шӱлышым пуа да тендан коклаште чудым ышта. Тидым Тудо законым шуктымыланда кӧра мо ышта – але колмо уверланда ӱшанымылан кӧра?

6Авраам денат тыгак лийын: «Тудо Юмылан ӱшанен, сандене Юмо тудым чын ыштышылан шотлен».7Тугеже палыза: ӱшанымашлан эҥертыше-влак Авраамын шочшышт улыт.8Чын Юмым ондак палыдыме-влакым Юмо ӱшанымыштлан кӧра чыныш луктеш. Тидым Возымаш ончык ужын да Авраамлан «Тыйын гоч калык-влак чылан суапландарыме лийыт» манын, поро уверым ончылгоч увертарен.9Тыгеракын, ӱшанымашлан эҥертыше-влак ӱшаныше Авраам дене пырля суапландарыме лийыт,10а законым шуктымылан эҥертыше-влак ӱмбалне – каргымаш.

Вет возымо: «Закон книгаш возымым кӧ чылажымат шуктен ок шого, кеч-кӧат каргыме лиеш».11А закон гоч нигӧ Юмын ончылно чыныш ок лек, тиде раш, вет «чын ыштыше айдеме ӱшанымашыж дене илаш тӱҥалеш».12Закон ӱшанымашлан ок эҥерте, а «кӧ законын йодмыжым шукта, тудым шуктымо дене ила».13Христос мемнам законын каргымыж деч тӱлен налын. Тудо мемнан верч Шке каргыме лийын, возымо вет: «Пу меҥгеш сакыме кеч-кӧат каргыме».14Сандене Авраамлан пуымо суапландарымаш чын Юмым палыдыме-влак дек Христос Иисус гоч шуын кертеш, да ме сӧрымӧ Шӱлышым ӱшаныме дене налын кертына.

15Иза-шольо-влак, еҥ-влакын шонкалымышт семын ойлем: айдемын пеҥгыдемдыме сугыньымат нигӧ шӧренат да тушко нимом ешаренат ок керт.16А сӧрымашым Авраамлан да тудын урлыкшылан пуымо. Возымаште, «урлык-влаклан» манын, шуко нерген огыл, а икте нерген «тыйын урлыкетлан» манын каласыме, тиде – Христос.17Мый тидым ойлынем: ныл шӱдӧ кумло ий эртымеке лекше закон Христос нерген Юмын ондак пеҥгыдемдыме сугыньым шӧрен да Юмын сӧрымыжын вийжым пытарен ок керт.18Вет наследствым налмаш законеш негызлалтеш гын, тыгеже тудо сӧрымашеш ок негызлалт. Но Юмо сӧрымыж дене Авраамлан наследствым пӧлеклен.

19А молан законжо кӱлеш? Тудым, сӧрымашым налше урлык толмешке, титакыш пурымылан кӧра варарак лукмо да ушен шогышын кидше дене Суксо-влак гоч пуымо.20Но икте годым ушен шогышо огеш лий, а Юмо икте.

21Тугеже закон Юмын сӧрымыж ваштареш шога? Уке! Вет илышым ыштен кертше закон пуалтеш ыле гын, чыныш лекмаш чынжымак закон деч лиеш ыле.22Но мом сӧрымӧ, тудо ӱшаныше-влаклан Иисус Христослан ӱшаныме дене пуалтше манын, Возымаш чылам языкеш кепшылтен.

23Ӱшанымаш толмо деч ончыч, шушаш ӱшанымаш почылтмешке, закон мемнам петырен кучен да оролен.24Тыгеже, ӱшаныме дене мыланна чыныш лекташ манын, закон мемнам Христос деке виктарыше лийын.25Но ӱшанымаш толмеке, ме ынде виктарышын кид йымалныже огынал.

26Вет Христос Иисуслан ӱшанымылан кӧра те чылан Юмын шочшыжо улыда.27Те чылан, Христос дене ушнаш манын тынеш пурышо-влак, Христос дене вӱдылалтында.28Иудей але эллин, кул але эрыкан, пӧръеҥ але ӱдырамаш ынде уке, вет те чыланат, Христос Иисус дене ушнен, икте улыда.29А Христосын улыда гын, тугеже те Авраамын урлыкшо да сӧрымӧ почеш наследник улыда.


*а 3:6 Быт15:6.

*б 3:8 Быт 12:3.

*в 3:10 Втор 27:26.

*г 3:11 Авв 2:4.

*е 3:13 Втор 21:23.

*ж 3:16 Быт 12:7, 13:15, 24:7.

*з 3:24 «Закон мемнам Христос деке виктарыше лийын»: грекла возымым тыгеат умылаш лиеш: «Христос толмешке, закон мемнам виктарыше лийын».

предыдущая глава Глава 3 следующая глава