Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ГАЛАТ-ВЛАКЛАН КОЛТЫМО СЕРЫШЫЖЕ

Глава 2

1-10 Вес Апостол-влак Павелым шке коклашкышт налыт. 11-14 Петрым Павел шылтала. 15-21 Христослан ӱшаныме веле айдемым утарен кертеш.

1Вара, латныл ий эртымеке, мый Варнава дене пырля уэш Иерусалимыш миенам, пеленем Титымат налынам.2А каенамже Юмын почын ончыктымыжлан кӧра. Мыйын ончычсо да кызытсе тыршымем арам ынже лий манын, чын Юмым палыдыме-влаклан мыйын каласкалыме Поро Уверым тысе-влаклан умылтаренам, вуйлатышылан шотлалтше-влаклан посна каласкаленам.3Но нуно мый денем пырля мийыше эллин Титымат пӱчмӧ йӱлам эрташ ӧкымлен огытыл.4Туге гынат Христос Иисусын мыланна пуымо эрыкшым палаш шолып толшо, ӱшанышыла кояш тӧчышӧ шояк еҥ-влак, мемнам кулыш савыраш манын, коклашкына йышт пуреныт.5Тендан коклаште Поро Уверын чынже аралалтше манын, ме нунын ончылно ик шагатланат чакнен да вуйым пуэн огынал.

6А кӧ вуйлатышылан шотлалтын – могай гына нуно ынышт лий, мылам нимогай ойыртем уке, Юмо чылан ӱмбак ик семын онча – нине вуйлатышылан шотлалтше-влак мыланем туныктымашке нимом ешарен огытыл.7Мӧҥгешла, нуно ужыныт: кузе Поро Уверым пӱчман-влак коклаште каласкалаш Петрлан ӱшаныме, тугак пӱчдымӧ-влаклан тудым каласкалаш мылам ӱшаныме.8Петрым пӱчман-влакын Апостолжым Ыштышак мыйымат чын Юмым палыдыме-влаклан Апостолым ыштен.9Юмо порылыкшо дене мылам могай пашам пуымым умылымекышт, пеҥгыде эҥертышлан шотлалтше Иаков, Кифа да Иоанн мылам да Варнавалан, кидым пуэн, паша кыл ыштымым палемденыт: ме чын Юмым палыдыме-влак деке кайышаш улына, нуно – пӱчман-влак деке.10Йорло-влакым гына шарнышаш улына, тидыжым мый ышташ тыршенам.

11А кунам Петр Антиохийыш толын, мый чылан ончылно тудын ваштареш шогалынам, вет тудо титакан лийын.12Молан манаш гын еҥ-влакын Иаков деч толмышт деч ончыч тудо чын Юмым ондак палыдыме да вара ӱшанаш тӱҥалше-влак дене пырля кочкын, а нине еҥ толмеке, пӱчмӧ йӱла верч шогышо-влак деч лӱдынат, тыгай ӱшанаш тӱҥалше-влак деч кораҥ кошташ тӱҥалын.13Тудын дене пырля моло иудей-влакат шояк койышым койыныт, Варнават нунын койышышкышт ушнен.14Поро Уверын чын корныж гыч нунын кораҥмыштым ужмекем, мый чылан ончылно Петрлан каласенам: «Тый, иудей, шкеже иудейла огыл, а чын Юмым палыдыме-влак семын илет гын, молан чын Юмым палыдыме-влакым иудей семын илаш ӧкымлет?»

15Ме шочынак иудей улына, а чын Юмым палыдыме языкан еҥ-влак кокла гыч огыл.16Туге гынат ме палена: айдеме законым шуктымо дене огыл чыныш лукталтеш, а Иисус Христослан ӱшаныме дене веле. Сандене, законым шуктымо дене огыл, а Христослан ӱшаныме дене чыныш лекташ манын, меат Христос Иисуслан ӱшаненна, вет законым шукташ тыршыме дене ик еҥат чыныш ок лукталт.17Но мемнанат, Христос гоч чыныш лекташ шонышо-влакын, языкан улмына рашемын гын, тугеже Христос языкын служитлышыже мо вара? Уке!18Мом мый шалатенам, тудым угыч чоҥем гын, мый шкемым шке закон пудыртышо семын ончыктем.19Юмылан илаш манын, закон гоч мый законлан коленам. Мый Христос дене пырля ыресеш пудалалтынам,20да ынде мый огыл илем, а, мый денем ушнен, Христос ила. А кызыт капыште илымем годым мыйым йӧратыше да мыйын верч Шкенжым пуышо Юмын Эргылан ӱшанен илем.21Юмын порылыкшым ом кораҥде: айдеме закон гоч чыныш лукталтеш гын, Христос арам колен.


*а 2:8 Тидым тыгеат кусараш лиеш: «Петр гоч тудын апостол пашаже дене пӱчман-влак коклаште Ыштыше мыйын гочат чын Юмым палыдыме-влак коклаште ыштен».

предыдущая глава Глава 2 следующая глава