Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН ГАЛАТ-ВЛАКЛАН КОЛТЫМО СЕРЫШЫЖЕ

Глава 1

1-5 Саламлымаш. 6-10 Вес Поро Увер уке. 11-24 Кузе Павел Апостол лийын.

1Павел деч – еҥ-влакынат, айдеме гочат огыл, а Иисус Христосын да Тудым колымаш гыч ылыжтыше Ача Юмын колтымо Апостолжо деч –2да пеленем улшо чыла иза-шольо деч Галатийысе черке-влаклан.

3-4Юмо Ачана деч да Тудын эрыкше почеш мемнам кызытсе осал саман деч утараш Шкенжым языкна верч пуышо Господьна Иисус Христос деч тыланда порылык да тыныслык лийже.5Юмылан курым-курымеш чап лийже. Аминь.

6Тендам Христосын порылыкшо дене Ӱжшӧ деч тыге писын кораҥмыланда да вес поро увер деке савырнымыланда ӧрам.7Туге гынат тидыже вес увер огыл, а тендам пудыратыше да Христосын Поро Увержым локтыл весемдаш шонышо еҥ-влак гына улыт.8Но мемнан каласкалыме Поро Уверна деч молым тыланда ме шкежат ойлена але пылпомыш гыч Суксо каласкала гынат, тек тыгай уверым шарышыже каргыме лиеш.9Кузе ме ондак ойленна, кызытат тыгак каласем: шӱмышкыда пыштыме Поро Увер деч молым тыланда иктаж-кӧ каласкала гын, тудо каргыме лийже.

10Кызыт мый еҥ-влакын мо кумылыштым шке велкем савырынем але Юмыным? Еҥ-влаклан мо келшаш тыршем? Мый кызыт мартеат еҥ-влаклан келшаш тӧчем ыле гын, Христосын тарзыже ом лий ыле.

11Иза-шольо-влак, пален лийза: мыйын каласкалыме Поро Увер айдемын огыл.12Тудым мый айдеме деч налын омыл, тудлан мыйым туныктен огытыл, тудым мый Иисус Христосын почмыж гоч налынам.

13Иудей йӱла почеш ондак кузе илымем нерген те колында, тунам мый Юмын Черкым чот поктылынам да тудым пытараш тыршенам.14Иудей йӱлам шуктымаште мый шке калыкысе ятыр иктаҥашем-влак деч утларак сеҥымашке шуынам, ачана-влакын йӱлашт верч моткоч пеҥгыдын шогенам.15-16Но эше авамын кӧргыштыжӧ улмем годымак мыйым ойырен налше да порылыкшо дене ӱжшӧ Юмо шке Эргыжым мыйын гоч палдараш сайлан шотлен. Тудын нерген Поро Уверым чын Юмым палыдыме-влак коклаште каласкалышаш улам. Мый тунамак айдеме деч каҥашым йодын омыл,17да мый дечем ончыч Апостол лийше-влак деке Иерусалимыш миен омыл, а Аравийыш каенам да угыч Дамаскыш пӧртылынам.

18Вара, кум ий эртымеке, Петр дене вашлийын мутланаш Иерусалимыш миенам да тудын дене латвич кече лийынам,19но Господьын изаже Иаков деч моло вес Апостолым ужын омыл.20Тиде мыйын возымем шоя огыл манын, тендам Юмын ончылно ӱшандарем.

21Тылеч вара мый Сирий да Киликий кундемлашке каенам.22Иудейысе христиан черкылаште мыйым чурий дене пален огытыл.23Нуно колыныт веле: «Ондак мемнам поктылшо саде еҥ ӱшанымашнам тылеч ончыч пытараш тӧчен, но кызыт тудым шке увертара».24Сандене мыйын верч Юмым моктеныт.


*а 1:3-4 Эрык – воля, желание.

*б 1:17 Аравий – тыге лӱмдымӧ кундем тунам кушто лиймым ме таче раш каласен огына керт. Тудо кызытсе Аравий лийын огыл.

предыдущая глава Глава 1 следующая глава