Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО КОКЫМШО СЕРЫШЫЖЕ

Глава 12

1-10 Павелын ужмыжо. 11-21 Коринфысе черке верч Павелын тургыжланымыже.

1Мылам кугешнаш пайдале огыл. Мый кызыт Господьын пуымо кончымаш ден почмаш-влак нерген ойлаш тӱҥалам.2Христос дене ушнен шогышо еҥым палем. Латныл ий ончыч тудо кумшо пылпомыш марте кӱзыктымӧ лийын. Капыште лийын мо – ом пале, кап деч ӧрдыжтӧ лийын мо – ом пале, Юмо пала.3Мый тиде айдеме нерген палем – капыште лийын мо але кап деч ӧрдыжтӧ, тидым ом пале, Юмо пала –4тудо райыш кӱзыктымӧ лийын да ойлен мошташ лийдыме шомак-влакым колын, нуныжым айдемылан ойлен мошташ ок лий.5Тыгай еҥ дене моктанем, а шкем дене ом моктане; моктанем гынат, вийдыме улмем дене веле.

6Моктанынем ыле гынат, ушдымо ом лий ыле, вет чыным ойлем. Но мыйым утыждене кӱкшын нигӧ ынже акле, мом ыштымем ужмыжо але мый дечем мом колмыжо дене келшышын веле аклыже манын, шкемым моктаныме деч кучем.7Мыланем ончыктымо ӧрыктарыше почмаш-влак дене мый кугешнышаш омыл, садлан кап ден чонышкем умдым пуымо – тиде сатанан суксыжо, кугешнымылан чаракым ышташ манын, тудо мыйым орландара.8Тудым мый дечем кораҥдыже манын, Господьым кум гана сӧрвален кумалынам.9Но Господь мылам каласен: «Тылат Мыйын порылыкем сита, вет Мыйын вием вийдымылыкыште шукталтеш». Сандене, Христосын куатше кӧргышкем илаш пурыжо манын, мый шке вийдымылыкем дене уло кумылын кугешнаш тӱҥалам.10Тидланак Христослан кӧра вийдыме улмылан, шотлыдымашлан, азаплан, поктылмашлан, шыгыремдылмашлан куанем, вет кунам мый вийдыме улам, тунам куатан улам.

11Моктанен, мый ушдымылыкыш шуынам: тышке мыйым те шуктенда. Тыланда мыйым мокташ кӱлеш ыле вет. Мый нимо омыл гынат, нине кӱшыл Апостол-влак деч мый нимо денат уда омыл.12Апостолын палыж-влакым тендан коклаште чыла чытымаш, палдарыше пале, ӧрыктарыше паша да куат дене ончыктымо.13Мо дене тендам моло черке деч ударак верышке шындыме? Икте дене веле: мый шкеже тыланда уто нелым ыштен омыл. Тыгай титакемлан вуеш ида нал!14Теве ынде мый тендан деке кумшо гана мияш ямде улам да тыланда уто нелым ом ыште, вет тендан погыдам огыл, а тендам кычалам. Йоча-влак огыл ача-аваштлан погышаш улыт, а ача-ава-влак – йочаштлан.15Тендам тынар чот йӧратымем ӱмбач те мыйым шагал йӧратеда гынат, тендан чонда верчын мый уло кумыл дене шкемыным кучылтам да шкемым шке чаманыде пуэм.16Йӧра, мый тыланда уто нелым ыштен омыл лийже. Но чоя еҥ семын ала тендам ондаленам?17Кӧм мый тендан деке колтенам, нунын кокла гыч иктаж-кӧн гоч тендан деч пайдам кычалынам мо?18Мый Титым тендан деке каяш сӧрваленам да иза-шольо-влак кокла гыч иктым пырля колтенам. Тит тендан деч иктаж-могай пайдам кычалын мо? Ме ик шӱлыш дене огыл мо ыштенна? Ме ик корно дене огыл мо коштынна?

19Ме тендан ончылно аралалтына манын, те угыч шонеда докан? Но ме Юмын ончылно Христос дене ушнен ойлена, да чылажат тиде, йӧратымем-влак, тендам пеҥгыдемдаш ышталтеш.20Мый лӱдам: мийымекем, могайым ынем уж, тугайым тендам ужам, теат мыйым тугайым ужыда, могайым ынеда уж. Келшыдымым, кӧранымым, шыдешкымым, ӱчашымым, еҥ ӱмбак ойлымым, коклазе лиймым, кугешнымым, шотдымылыкым ужам манын лӱдам.21Мыйын тендан деке мийымекем, Юмем тендан ончылно мыйым угыч ӱлыкӧ ынже шынде ыле, да кӧ эртыше жапыште языкым ыштен да ару огыл койыш, яжарланыме да аташланыме деч кораҥын огыл, шукышт верч шорташ огыл ыле.


предыдущая глава Глава 12 следующая глава