Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО КОКЫМШО СЕРЫШЫЖЕ

Глава 11

1-15 Павел да шояк апостол-влак. 16-32 Павелын нелылыкше.

1О, мый дечем кеч изиш ушдымылыкым те чытеда ыле гын! Но те мыйым чынжымак чытеда.2Мый Юмын тыршымыж дене тендан верч чон йӱлен тыршем, вет мый тендам ик пӧръеҥлан, Христослан, сӧренам да Тудын ончык яндар ӱдырым шогалтышаш улам.3Но кузе кишке Евам шке чоялыкше дене ондален, тугак тендан шонымашдат пужлен кертеш, да Христос дене ушнымаште ару чон дене илымыда деч кораҥыда манын лӱдам.4Вет иктаж-кӧ толеш да мемнан каласкалыме Иисус нерген огыл, вес Иисус нерген каласкалаш тӱҥалеш гын, але те налме Шӱлышда деч моло шӱлышым налыда гын, але шӱмышкыда пыштыме Поро Увер деч моло поро уверым налыда гын, те тидым сайын чытеда ыле.5Кӱшыл Апостол-влак деч мый нимо денат уда омыл, шонем.6Мый ойлымо шотышто тунемше омыл гынат, шинчымашлан тунемше улам. Тыланда тӱрлӧ семынат чылаштат палыме улына.

7Мый Юмын Поро Увержым тыланда акым йодде каласкаленам. Тендам нӧлташ манын, мый шкемым ӱлык шынденам. Але тиде язык?8Тыланда пашам ышташ манын, моло черке деч оксам налын, мый нуным йорлештаренам, манаш лиеш. А тендан дене лиймем годым, кунам мылам иктаж-мо ситен огыл, иктыланат нелым ыштен омыл.9Мо мылам ситен огыл, Македоний гыч толшо иза-шольо-влак тудым пуэныт. Тыланда нимо шотыштат нелым ышташ огыл манын, мый тыршенам да тыршаш тӱҥалам.10Христосын кӧргышкем пыштыме чынже дене ӱшандарем: тиде кугешнымаш Ахаийсе кундемлаште мый дечем ок налалт!11-12Молан? Пуйто мый тендам ом йӧрате, садлан мо? Юмо пала.

Мо дене моктанат, тушто мемнан гаяк лияш тыршыше-влаклан моктанаш амалым пуаш огыл манын, мый мом ыштенам, умбакыжат тудымак ышташ тӱҥалам.13Тыгай-влак шояк апостол, Христосын Апостолжо улына манын ӱшандарыше чоя пашаеҥ улыт.14Ӧршашыжат уке: сатана шкежат волгыдо Суксын тӱсшым налеш.15Тыгеже, тудын тарзыж-влак чынын служитлышыжла койнешт гын, тидыже кугу паша огыл. Нунын мучашышт пашашт дене келшыше лиеш.

16Адак каласем: нигӧ мыйым ушдымо манын ынже шотло. Тыге шотледа гын, мыламат иктаж-кунар моктанаш манын, кеч ушдымо семын мыйым налза.17Мом кызыт ойлем, тудым Господь деч ом ойло. Моктаныме шотышто мый ушдымо семын ойлем.18Шукын тиде тӱнясе айдеме семын моктанат гын, мыят тугак моктанем.19Вет те, ушан-влак, ушдымо-влакым кумылын чытеда!20Тендам кулыш савырат, погыдам кочкын пытарат, тендам кид йымакышт налыт, ӱмбакыда кӱшыч ончат, тендам шӱргыда гыч кырат – да те тидым чытеда.21Вожылашем ойлем: тидлан мемнан вийна ситен огыл!

Мо шотышто иктаж-кӧ моктанаш тоштеш гын – мый ушдымо семын ойлем – мыят тоштам.22Нуно еврей улыт? Мыят еврей улам. Израиль калык гыч улыт? Мыят. Авраамын урлыкшо улыт? Мыят.23Христосын служитлышыже улыт? Уш кайышыла ойлем: мыйым Христосын служитлышыже манаш амал шукырак. Мый пашам шукырак ыштенам, мыйым мучашдымын кыреныт, чӱчкыдынрак казаматышке логалынам, ятыр гана колаш шушо гай лийынам.24Иудей-влак мыйым «икте деч посна нылле гана дене» вич пачаш кыреныт.25Кум гана тоя дене кыреныт, ик гана ӱмбакем кӱм кышкеныт. Кум гана теҥызыште корабльна шаланен. Ик йӱдым да кечым теҥыз вӱдыштӧ эртаренам.26Мый корнышто шуко лийынам, эҥерыште лӱдыкшыштӧ, агыше-влаклан кӧра лӱдыкшыштӧ, шке тукым калыкемлан кӧра лӱдыкшыштӧ, чын Юмым палыдыме-влаклан кӧра лӱдыкшыштӧ, олалаште лӱдыкшыштӧ, ир мландыште лӱдыкшыштӧ, теҥызыште лӱдыкшыштӧ, шояк иза-шольо-влак коклаште лӱдыкшыштӧ лийынам.27Мый вий пытымешке пашам ыштенам, чӱчкыдынак малаш йӧн лийын огыл, шужымым да йӱмӧ шумым чытенам, чӱчкыдын пӱтым кученам, йӱштыштат, вургем деч поснат лийынам.28Тидын деч посна кече еда мый декем еҥ-влак погынат, тыгак чыла черке верч тургыжланем.29Иктаж-кӧ вийдыме гын, мыят вийдыме улам, иктаж-кӧ алгаштаралтеш гын, тудын верч чонем йӱла.

30Кугешнаш кӱлеш гын, шкемын вийдымылыкем дене кугешнем.31Господьна Иисус Христосын курым-курымеш моктымо Юмыжо да Ачаже пала: мый ом шойышт.32Дамаскыште Арета кугыжан тӧраже, мыйым руалтен кучаш манын, Дамаск олам оролен, но мыйым окна гыч ола пырдыж воктеч комдеш шынден волтеныт да тудын кидышкыже логалын омыл.


предыдущая глава Глава 11 следующая глава