Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО КОКЫМШО СЕРЫШЫЖЕ

Глава 10

1-18 Павел Апостол сомылжым арален ойла.

1Мый, Павел, – тудак, кӧ тендан дене пырля улмыж годым тугай ӱҥышӧ, укеж годым пеҥгыде – тендам Христосын тыматле да поро улмыжо дене шке сӧрвалем:2тендан деке толмекем, мыйым тыланда пеҥгыдын ида ойлыкто, вет ме пуйто кап да чон йодмо почеш илена манын шотлышо еҥ-влаклан мый чот пеҥгыде лияш шонем.3Молан манаш гын кап да чон дене илена гынат, ме кап да чон почеш огыл кучедалына,4-5вет мемнан кучедалме саркурална капын да чонын огыл. Кеч-могай пеҥгыде крепостьым Юмын куатше дене шалатен кертше саркурална уло, тудын дене тӱрлым шонен пыштымым да Юмым палымаш ваштареш кугешнен нӧлталтше кажне чаракым сӱмыралына да кажне шонымашым Христосым колышташ савырена.6Тендан мут колыштмыда тичмаш лиймеке, чыла ой колыштдымашым мут кучаш шогалташ ямде улына.

7Мо тендан шинча ончылныда, тудым ончеда мо? Кӧ Христосын улам манын ӱшана гын, меат тудын семын Христосын улына манын шотлыжо.8Господь мыланна властьым пуэн, тиде власть дене ме тендам шалатышаш огыл, а пеҥгыдемдышаш улына. Тидын дене мый утларакат кугешнем гын, намысыш ом пуро.9Тендам серышем-влак дене лӱдыкташ тыршем манын, тыланда ынже кой.10Вет ала-кӧ ойла: «Павелын серыш-влакше пеҥгыдын йодшо да виян, а мемнан дене шке лиймыж годым вийдыме, ойлымыжат тудын куатдыме».11Тыгай еҥ тек умыла: укена годым ме серыш мут дене могай улына, улмына годым пашана денат тугаяк улына.

12Вет кӧмыт шкеныштым шке моктен темлат, тугай-влак дене ме шкенам иктӧрыш шындаш але таҥастараш огына тошт. Нуно, умылен моштыде, шкеныштым шкешт денак висат да шкеныштым шкешт денак таҥастарат.13А ме палемдыме деч утым огына кугешне, а Юмын мыланна висен пуымыж наре веле, тиде висен пуымо кумдыкшо тендан декат шуэш.14Ме пуйто тендан деке шудымо гай утыждене огына тырше, вет Христосын Поро Уверже дене ме тендан декат шуынна.15Ме утым огына кугешне, еҥ паша дене огына моктане, но ӱшанен вучена: ӱшанымашда кушмо дене тендан коклаште мыланна пуымо кумдык чот шарла,16да, весе-шамычын шке кумдыкыштышт ыштыме паша дене моктаныде, тендан дечат тораште Поро Уверым каласкален кертына.17«Кӧ кугешна, тек Господь дене кугешна».18Кӧ шкенжым шке моктен темла, тудо сайлан ок шотлалт, а кӧм Господь темла – тудо.


*а 10:17 Иер 9:24.

предыдущая глава Глава 10 следующая глава