Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО КОКЫМШО СЕРЫШЫЖЕ

Глава 7

2-16 Коринфысе-влакын шке йоҥылышышт деч кораҥмыштлан Павелын куанже.

1Тугеже, йӧратымем-влак, тыгай сӧрымашна-влак улыт гын, ме кап ден чонын да шӱлышын чыла лавырашт деч шкенам эрыктышаш да, Юмо деч лӱдын, святой илыш дене илышаш улына.

2Шӱмыштыда мыланна верым пуыза! Ме нигӧланат осалым ыштен онал, нигӧланат эҥгекым ыштен огынал, нигӧ дечат пайдам кычалын огынал.3Тендам титаклаш огыл тидым ойлем, вет мый ондакат каласенам: те мемнан шӱмыштына улыда, колымаштат, илымаштат пырля лийына.4Мый тыланда лӱдде ойлен кертам, тендан дене моткоч кугешнем, лыпланымаш дене темынам, чыла нелылык годымат мый кугу куан дене тич темше улам.

5Македонийыш толмекына, кап ден чонланна нимогай ласкалык лийын огыл, а чыла шотыштат орлыкым чытенна: тӱжвач – кредалмаш, кӧргыштӧ – лӱдмаш.6Но чытен илыше-влакым лыпландарыше Юмо мемнам Титын толмыж дене лыпландарен.7Титын толмыжо веле огыл, тудын тендан дене лыпландарымашым налмыжат мемнам лыпландарен. Мыйым ужмо шумыда нерген, мыйын верч ойганымыда да тыршымыда нерген тудо мыланна каласкален, тыгеже мый эшеат утларак куаненам.

8Серышем дене тендам ойгандаренам гынат, ом ӧкынӧ. Серышемлан кӧра кӱчык жаплан ойгаҥмыдам ужын, тудым колтымемлан ӧкыненам гынат,9мый ынде куанем. Мый тендан ойгаҥмыланда огыл куанем, а теве молан куанем: ойгыда тендам языкым касарыктымашке да Юмо деке савырнымашке конден. Вет те Юмо верч ойгаҥында, тыгеже ме тыланда нимогай эҥгекым ыштен огынал.10Юмо верч ойгаҥмаш языкым касарыктымашке да Юмо деке савырнымашке конда, тыгак шӧраш лийдыме утарымашке наҥгая, а тиде тӱнясе ойго колымашке наҥгая.11Юмо верч ойгаҥмыда мом ыштен, ончалза: могай тыршымым, могай аралалт ойлымым, могай шыдешкымым, могай лӱдмашым, могай ужмышумашым, могай кумылаҥмашым, могай мут кучымашым тендан дене шочыктен! Тыште те чыла шотыштат ару улмыдам ончыктенда.12Тугеже, мый тыланда возенам гынат, осалым ыштышылан кӧра але осалым ыштымым чытышылан кӧра огыл, а тендан верч тыршымынам те шкежат Юмын ончылно ужса манын возенам.13Тидыже мемнам лыпландарен.

Но тиде лыпландарымашлан эшеат кугу куан ешаралтын: Титын куанымыже, вет те чылан тудын шӱм-чон шӱлышыжым куштылемденда.14Мый тудлан тендан нерген иктаж-мо шотышто моктен ойленам гын, вожылмашке логалын омыл. Кузе тыланда эре чыным веле ойленна, тугак Тит ончылно моктен ойлымынат чыныш лектын.15Могай мут колыштшо те лийында да кузе тудым лӱдын да пагален вашлийында манын шарналтымыж годым тудын шӱмжӧ эшеат утларак тендан велке савырна.16Тыланда чыла шотыштат ӱшанен кертам манын куанем.


предыдущая глава Глава 7 следующая глава