Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО КОКЫМШО СЕРЫШЫЖЕ

Глава 6

14– 7:1 Ӱшаныше айдеме – Юмын илыме верже.

1Юмо дене пырля ыштыше улынат, ме тендам сӧрвалена: Юмын порылыкшым налмыда арам ынже лий.2Вет Юмо каласа:
«Келшыше пагыт годым Мый тыйым колынам,
утарыме кечын тылат полшенам».
Теве ынде келшыше пагыт, теве ынде утарыме кече.

3Служитлыме пашана шылталыме ынже лий манын, ме нигӧлан да нимо шотышто шӱртньымӧ кӱм огына пыште.4-5Чыла годымат шкенам Юмын служитлышыже семын ончыктена: нелылыкыште, азапыште, шыгыремдылмаште, кыралтмаште, казаматлаште, пудыранчыкыште, неле пашаште, шагал малымаште, пӱтым кучымаште,6арулыкышто, шинчымашыште, шуко чытымаште, порылыкышто, Святой Шӱлышыштӧ, чын йӧратымаште,7чын шомакыште, Юмын куатыште – ме чын ыштымын саркуралжым пурла да шола кидыште кучена –8чапыште да намысыште, шылталымаште да моктымаште. Мемнам ондалышылан шотлат, но ме чын улына,9палыдымылан шотлат, но мемнам палат, колышылан шотлат, но ме теве илена. Мемнам орландарат, но ме пуштмо огынал.10Мемнам ойгаҥдарат, а ме куаныше улына, ме йорло улына, но шукым пойдарена, мемнан нимона уке, но чылажат мемнан.

11Коринфыште илыше-влак, ме тыланда чыла шотыштат тура ойлена, мемнан шӱмна тыланда кумдан почмо.12Тыланда мемнан шӱмыштӧ шыгыр огыл, но шкендан шӱмыштыда шыгыр.13Шкемын йочамлан ойлымо семын каласем: мыланна тугак пӧртылтыза, теат шӱмдам кумдам ыштыза!

14Ӱшаныдыме-влак дене пырля йот омыташ ида кычкалт. Чын ыштымын да закондымылыкын мо иктеш лиеш? Волгыдо ден пычкемыш коклаште могай кыл уло?15Христос ден Велиар коклаште могай икгайлык? Але ӱшаныше ден ӱшаныдыме коклаште мо иктеш лийын кертеш?16Юмын храмже шояк юмо-влак дене кузе пырля лиеш? Те илыше Юмын храмже улыда. Юмо тыге ойлен:
«Мый нунын дене илаш
да коклаштышт кошташ тӱҥалам.
Нунын Юмышт лиям,
а нуно Мыйын калыкем лийыт».
17Садлан
«Нунын кокла гыч лекса,
нунын деч ойырлыза, – Господь ойла. –
Ару огыл деке ида тӱкнӧ,
тунам тендам Шке декем налам».
18«Тыланда Ача лиям,
а те Мыйын эргым да ӱдырем-влак лийыда», –
ойла чыла кучен Ашныше Господь.


*а 6:2 Ис 49:8.

*б 6:5 «Пӱтым кучымаште»: тидым «шужымаште» манынат умылаш лиеш.

*в 6:16 Лев 26:12, Иез 37:27.

*г 6:17 Ис 52:11.

*д 6:18 2 Цар 7:14, Ис 43:6, Иер 31:9.

предыдущая глава Глава 6 следующая глава