Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО КОКЫМШО СЕРЫШЫЖЕ

Глава 5

11– 6:13 Юмо дене сӧрасымаш

1Ме палена: мландысе мемнан пӧртна, тиде омашна, шалатыме лиеш гынат, Юмын пуымо илыме верна уло. Тиде – айдеме кид тӱкныде ыштыме, пылпомышсо, курымашлык пӧрт.2Но тыште улмына годым ме, кугун шӱлалтен, пылпомыш гыч пуалтшаш илыме верышкына вӱдылалтмым уло чон дене вучена.3Тудын дене вӱдылалтмеке, мыланна чара кодаш огыл ыле.4Ме, тиде кап-омашыште улшо-влак, кугун шӱлалтен йӧсланена: ме ынена кудаш, а колышашым илыш авалтыже манын чийынена.5Тидланак мемнам Юмо ыштен, Тудо мыланна залоглан Шӱлышым пуэн.

6Садлан ме эре лӱддымӧ улына. Ме палена: капыште улмына годым ме але Господь дене огынал.7Ме ужмо дене огыл, а ӱшаныме дене илена.8Ме лӱддымӧ улына, да кап гыч лекмым да Господь деке куснымым сайраклан шотлена.9Сандене ме кеч-кушто лийына гынат, тыште але тушто, Тудлан йӧрышӧ лияш чот тыршена.10Капыште илымыж годым кажныже мом ыштен, порым але удам, тудлан келшышын налаш манын, ме чылан Христосын судшо ончылан шогалшаш улына.

11Тыгеже, Господь деч лӱдмашым пален, ме еҥ-влакым ӱшандараш тыршена. А могай улмына Юмылан раш, тиде тендан совестьланат раш манын ӱшанем.12Ме шкенам тыланда угычын огына палдаре, а шӱмысӧ дене огыл, тӱжвалсе дене моктаныше-влаклан мом каласашда лийже манын, мемнан дене моктанаш амалым пуэна.13Ме шотдымыла койынна гын – Юмылан кӧра, шотан лийынна гын – тыланда кӧра,14вет Христосын йӧратымашыже мемнам вуйлата. Ме тыге шонена: икте чылан верчын колен гын, тугеже чылан коленыт.15А Тудо чылан верчын колен, тугеже илыше-влак ынде шкаланышт огыл, а нунын верч Колышылан да Ылыжшылан илышаш улыт.

16Сандене тылеч вара ме нигӧмат айдемын висаже дене огына пале. Ме ондакше Христосым тыге паленна гын, ынде огына пале.17Тыгеракын, кӧ Христос дене ушнен шога, тудо – у айдеме, ончычсыжо шеҥгелан кодын, ынде чыла у.18Чылажат Юмо деч, Тудо Шкенжын да мемнан коклаште Иисус Христос гоч сӧрасымашым ыштен да сӧрасымашке ӱжмӧ пашам мыланна ӱшанен пуэн:19Юмо Христос дене ушнен шоген да тӱня ден Шкеж коклаште сӧрасымашым ыштен, еҥ-влакын сулыкыштым шотыш налын огыл, а мыланна сӧрасыме шомакым пуэн.

20Тугеже, ме Христосын лӱмжӧ дене колтымо улына, Юмо Шке мемнан гоч темла. Христосын лӱмжӧ дене йодына: Юмо дене сӧрасыза.21Христос дене ушнымаште мыланна Юмын ончылно чын ыштыше лияш манын, мемнан верч Юмо языкым палыдыме Христосым языклан кӧра жертвым ыштен.


*а 5:1«Мландысе пӧрт» да «омаш» колышаш капнам ончыктат.

предыдущая глава Глава 5 следующая глава