Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО ИКЫМШЕ СЕРЫШЫЖЕ

Глава 16

1-4 Оксам погымаш. 5-12 Ончыкылык миен коштмаш нерген. 13-24 Чеверласыме шомак.

1Святой-влаклан оксам погымо нерген тидым ойлем: кузе мый Галатийысе черкылаште ышташ кӱштенам, теат тугак ыштыза.2Мийымекем погаш ынже кӱл манын, тендан кокла гыч кажныже арнян икымше кечынже кертмыж семын мӧҥгыштыжӧ оксам ӧрдыжкӧ пыштен аныклыже.3А кунам мый тендан деке мием, кӧмытым те ойырен налыда, нуным Иерусалимыш пӧлекдам наҥгаяш серыш-влак дене колтем.4Мыланемат тарванаш амал лиеш гын, нуно мый денем пырля каен кертыт.

5Македонийым эртымеке, тендан деке мием – вет мый Македоний гоч каем.6Мый тендан дене ала иктаж-мыняр жап лиям, теле мучкат лийын кертам. Вара, кеч-кушко каем гынат, те мыйым ужатен кертыда.7Кызыт тендам эртен кайышыла веле ынем уж, Господь йӧным ышта гын, шукырак жап тендан дене лийнем.8Но Ефесыште мый Витлыгече пайрем марте лиям.9Мылам кугу да кумда омсам почмо, да ваштареш шогышо-влакат шукын улыт.

10Тимофей мия гын, тудлан тендан дене нимо деч лӱдшаш ынже лий манын шекланыза, вет тудо мыйын семынак Господьын пашажым ышта.11Тыгеже тудым шотлыдымо нигӧ ынже лий, мый декем мӧҥгеш тыныслык дене ужатыза. Мый тудым иза-шольо-влак дене пырля вучем.

12А Аполлос иза шотышто, мый тудым иза-шольо-влак дене пырля тендан деке мияш пешак йодынам, но кызыт ынеж мий. А кунам йӧн лектеш, тунам мия.

13Шекланен шогыза, ӱшанымаштыда пеҥгыде лийза, лӱддымӧ, виян лийза.14Мом те ыштеда, чылажымат йӧратен ыштыза.

15Иза-шольо-влак, те Стефаным да мӧҥгысыж-влакым паледа, нуно Ахаийыште мемнан пашанан тӱҥалтыш саскаже улыт, святой-влаклан пашам ышташ шкеныштым ойыреныт. Йодам:16теат тыгай-влакын да нунын дене пырля пашам ыштыше да тыршыше-влакын мутыштым колыштшо лийза.17Мый Стефанын, Фортунатын да Ахаикын толмыштлан куанем. Те тыште уке улыда гынат, нуно мыланем тендан олмеш улыт.18Нуно мыйынат, тенданат кӧргӧ шӱлышым лыпландареныт. Тыгай-влакым аклыза.

19Асийысе черке-влак тыланда саламым колтат, Акила ден Прискилла да нунын пӧртыш погынышо черке тыланда Господь дене ушнымаште шокшо саламым колтат.20Чыла иза-шольо тыланда саламым колта. Святой шупшалмаш дене икте-весыдам саламлыза.

21Мый, Павел, тиде саламлымашым шке кидем дене возем.22А иктаж-кӧ Господь Иисус Христосым ок йӧрате гын, тек ойырен кораҥдыме лийже. Мемнан Господьна, тол!23Господь Иисус Христосын порылыкшо тендан дене лийже.24Христос Иисус дене ушнымаште тек мыйын йӧратымашем чыландан дене лийже. Аминь.


*а 16:12 «Ынеж мий»: грек мутым «Юмо тудым ынеже колто» манынат умылаш лиеш.

*б 16:22 Грек йылмыште тыште «анафема» мут кучылталтеш, тудо ’каргымаш, ойырен кораҥдымаш’ манмым ончыкта. «Мемнан Господьна‚ тол!»: Павел тыште арамей «маран афа» ойым кучылтеш‚ тудыжо «Мемнан Господьна‚ тол!» манмым ончыкта.

предыдущая глава Глава 16 следующая глава