Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН КОРИНФЯН-ВЛАКЛАН КОЛТЫМО ИКЫМШЕ СЕРЫШЫЖЕ

Глава 1

1-3 Саламлымаш. 4-9 Юмылан тауштымаш. 10-17 Черкыште келшыдымаш ваштареш. 18-31 Юмын куатше да уш-акылже.

1Юмын эрыкше почеш Иисус Христосын Апостолжо лияш ӱжмӧ Павел да Сосфен иза деч2Юмын Коринфысе черкыжлан, Христос Иисусын святитлыме да святой лияш ӱжмӧ-влаклан, кеч-куштат Господьна Иисус Христосын – нунынат, мемнанат Господьнан – лӱмжым ӱжын кумалше-влаклан.
3Мемнан Юмо Ачана да Господь Иисус Христос деч тыланда порылык да тыныслык лийже.

4Юмын тыланда Христос Иисус гоч пуымо порылыкшылан тендан верч Юмемлан эре таум ыштем.5Тудын дене ушнен шоген, те чыла шотыштат – шомак денат, шинчымаш денат пойдарыме улыда.6Христос нерген таныклымаш тендан коклаште пеҥгыдын вожаҥын,7да мемнан Господьна Иисус Христосын толмыжым вучымыда годым Юмын пуымо чыла тӱрлӧ моштымаш тендан уло.8Христос тендам мучаш марте пеҥгыдемда, тыгеже мемнан Господьна Иисус Христосын кечынже тендам нимо дене шылталаш ок лий.9Шке Эргыж деке, мемнан Господь Иисус Христос деке, ушнымашке тендам ӱжшӧ Юмо – ӱшанле.

10Иза-шольо-влак, те чылан ик семынак ойлыза, тендан коклаште шеледалтмаш ынже лий, а ик ой да ик шонымаш тендам ушыжо манын, мемнан Господьна Иисус Христосын лӱмжӧ дене сӧрвалем.11Иза-шольым-влак, те шке коклаштыда ӱчашеда манын, мый Хлоян еҥже-влак деч пален налынам.12Мый теве мо нерген ойлем: тендан кокла гыч кажныже «Мый Павелын тунемшыже улам», але «Мый – Аполлосын», «А мый – Кифан», «А мый – Христосын» манын каласа.13Христос шелалтын мо вара? Але тендан верч Павелым пудален сакеныт? Але те Павел лӱмеш тынеш пуренда?14Крисп ден Гаий деч молым тендан кокла гыч нигӧм тынеш пуртен омыл, тидлан Юмылан тауштем:15шке лӱмешем тендам тынеш пуртенам манын, нигӧ каласен ок керт.16Адакшым Стефаным да мӧҥгысыж-влакымат мый тынеш пуртенам. Иктаж-кӧм весым тынеш пуртенам мо, мый ом пале.17Вет Христос мыйым тынеш пурташ огыл, а Поро Уверым каласкалаш колтен. Поро Уверым мый ушанла чучшо шомак дене каласкалышаш омыл, уке гын Христосын ыресше кӱлдымыш лектеш.

18Пытымашке кайыше-влаклан ырес нерген шомак – ушдымылык, а мыланна, утарымашке кайыше-влаклан, – Юмын куатше.19Возымо:
«Ушан-влакын уш-акылыштым пытарем,
умылышо-влакын умылымашыштым кораҥдем».
20Кушто ушан еҥ, кушто закон туныктышо, кушто тиде тӱнясе шымлызе? Тӱнян кугу ушыжым Юмо ушдымылыкыш савырен огыл мо?21Юмын уш-акылже гоч тӱня шке ушыж дене Юмым пален налын огылат, ушдымылыкым увертарыме гоч Юмо ӱшаныше-влакым шке порылыкшо дене утараш сайлан шотлен.22Вет иудей-влак палдарыше палым ончыкташ йодыт, эллин-влак уш-акылым кычалыт,23а ме ыресеш пудалыме Христос нерген уверым каласкалена. Тидыже иудей-влаклан шӱртньымӧ кӱ, эллин-влаклан – ушдымылык,24а ӱжмӧ-влаклан, иудей-влакланат, эллин-влакланат, Христос – Юмын куатше да Юмын кугу уш-акылже.25Вет мо Юмын ушдымылыкшыла коеш, айдемын ушыж деч ушанрак, да мо Юмын вийдымылыкшыла коеш, айдемын вийже деч виянрак.

26Иза-шольо-влак, Юмын ӱжмӧ-влак, могай улыда – ончалза: шукынжо огыл шочынак ушан, шукынжо огыл власть кучышо, шукынжо огыл сай тукым деч лекше улыда.27Но мо тӱняште ушанлан ок шотлалт, тудым Юмо ушан-влакым намысыш лукташ манын ойырен налын, да виян-влакым намысыш пурташ манын, тӱняште вийдымыла койшым Юмо ойырен налын.28-29Ик айдемат Юмын ончылно моктанен ынже керт манын, кугуэш шотлымым укешке лукташ Тудо тӱняште изи, пагалыдыме да нимолан шотлалтдымым ойырен налын.30Юмо тендам Христос Иисус деке ушен, Тудыжо мыланна Юмо деч толшо уш-акыл лийын: святитлалтмаш, чыныш лекмаш да сулен налмаш.31Тыгеракын, возымо семын
«Кӧ моктанынеже гын, тек Господь дене моктана».


*а 1:1 Эрык – воля, желание.

*б 1:19 Ис 29:14.

*в 1:31 Иер 9:24.

предыдущая глава Глава 1 следующая глава