Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН РИМЛЯН-ВЛАКЛАН КОЛТЫМО СЕРЫШЫЖЕ

Глава 15

1-6 Лишыллан йӧрымаш. 7-13 Иисус Христос пӱчман-влаклан да чын Юмым палыдыме-влаклан служитлыше лийын. 14-21 Павел – йот калыкын Апостолжо. 22-33 Павелын Римыш мияш шонымыжо.

1Ме‚ виян-влак‚ шкаланна йӧраш тыршышаш огынал, ӱнардыме-влакын вийдымылыкыштым нумалшаш улына.2Мемнан кокла гыч кажныже лишылжылан йӧраш тыршышаш, тудлан мо сай лиеш да мо тудым пеҥгыдемда, тидым ыштышаш.3Христосат шкаланже огыл йӧраш тыршен, а возымо семын «Тыйым вурсен ойлышо-влакын мыскылымышт Мыйын ӱмбакем возын».4Возымашын шочыктымо чытымаш ден кумылаҥдымашлан кӧра ӱшанна лийже манын, мом ончыч возымо, чылажат мемнам туныкташлан возымо.5Чытымашым пуышо да кумылаҥдыше Юмо тек тендам икте-весыда дене Христос Иисусын туныктымыжла икояным ышта.6Тыге те ик ой дене ик йӱкын Юмым‚ мемнан Господьна Иисус Христосын Ачажым‚ чапландарен кертыда.

7Юмын чапшым нӧлташ манын, Христос тендам кузе вашлийын, туге икте-весыдам йӧратен налза.8Мый тыланда ойлем: Юмын чынжылан кӧра, ача-влаклан пуымо сӧрымаш-влакым пеҥгыдемдаш манын, Иисус Христос пӱчман-влаклан служитлыше лийын,9а чын Юмым палыдыме-влаклан Тудо Юмын порылыкшылан кӧра служитлыше лийын, тидлан нуно Юмым чапландарышаш улыт. Тыге возымо:
«Сандене мый Тыйым чын Юмым палыдыме-влак коклаште чапландарем‚
Тыйын лӱметым моктен мурем».
10Да эше возымо:
«Чын Юмым палыдыме-влак, Тудын калыкше дене пырля куаныза!»
11Да эше:
«Чын Юмым палыдыме-влак, Господьым чылан моктыза!
Чыла калык-влак, Тудым моктыза!»
12Исаият ойла:
«Иессейын вожшо гыч лиеш,
калык-влакым вуйлаташ кынелеш‚
Юмым палыдыме-влак ӱшаныштым Тудлан пыштат».
13Ӱшанен вучаш йӧным ыштыше Юмо тендам ӱшанымаштыда тек куан да тыныслык дене тема‚ тунам те Святой Шӱлышын куатше гоч ӱшанен вучымаш дене темыда.

14Иза-шольым-влак‚ мый шкежат тыланда ӱшанем: те порылык дене тич темында‚ тыланда тичмаш шинчымашым пуымо, да икте-весыдам туныктен кертыда.15Иза-шольо-влак‚ южо паша нерген шарныктен, мый тыланда пеҥгыде мут дене возенам гын, Юмын мылам пуымо порылыкшылан кӧра тидым ыштенам:16чын Юмым палыдыме чыла еҥ-влак Юмылан келшыше да Святой Шӱлышын святитлыме надыр лийышт манын, мый чын Юмым палыдыме-влаклан лийын Христос Иисуслан служитлышаш да Юмын Поро Увержын святой пашажым ыштышаш улам.17Тыгеже, Христос Иисус дене ушнен, Юмылан служитлымемлан мый шкемым моктен кертам.18-19Чын Юмым палыдыме-влакым Юмым колыштшым ышташ манын, Христос Шкеже ойлымо да ыштыме дене, палдарыше кугу пале да ӧрыктарыше паша дене, Юмын Шӱлышын куатше дене мыйын гоч мом ыштен‚ тудын деч моло нерген ойлаш ом тошт. Тыге Иерусалим да тудын йырже гыч тӱҥалын‚ Иллирик марте чыла вере мый Христосын Поро Увержым каласкален шуктенам.20Еҥын ямде негызеш чоҥаш огыл манын, кушто Христосын лӱмжым колын огытыл‚ мый тушто Поро Уверым каласкалаш тыршенам.21Возымо семын лийын:
«Тудын нерген уверым налдыме-влак ужыт‚
Тудын нерген колдымо-влак умылат».

22Тидыже тендан деке толаш шуко гана чаракым ыштен.23Но ынде нине верлаште мыйым нимо ок кучо, а тендан деке мияш ончычсо ийласе шонымем кодын.24Кунам Испанийыш каем, тендан деке мием, вет кайымем годым тендам ужнем да, тендан дене икмыняр жапым куанен эртарымеке, те мыйым тушко ужатеда манын, ӱшанен вучем.

25Но кызыт мый Иерусалимыш святой-влаклан полшаш каем.26Македоний ден Ахаийысе черке-влак Иерусалимыште илыше святой-влак кокласе йорло-влаклан полышым погаш сайлан шотленыт.27Нуно тыге ыштынешт улмаш – Иерусалимысе-влак ончылно нуно, чынжымак, парымыш пуреныт. Шӱлышлан мо кӱлмым иудей-влак деч налыныт гын‚ чын Юмым ондак палыдыме-влак каплан кӱлмӧ дене нунылан полшышаш улыт.28Тиде пашам шуктымеке‚ тиде пӧлекым тичмашнек намиен пуымеке, мый, тендан дене лиймеке, Испанийыш каем.29Мый палем‚ кунам тендан деке мием‚ Христосын Поро Увержын тичмаш благословенийже дене мием.

30Иза-шольо-влак‚ мемнан Господьна Иисус Христос дене да Шӱлышын пуымо йӧратымаш дене тендам сӧрвалем: мый денем пырля тыршыза, мыйын верч Юмылан кумалза.31Христослан ӱшаныдыме-влак деч мылам Иудейыште эрык лийже‚ Иерусалимыште полшымем тушто илыше святой-влаклан келшыше лийже манын кумалза.32Тунам, Юмо колтынеже гын, мый тендан деке куанен миен да тендан дене пырля чон дене каналтен кертам.33Тек тыныслыкым пуышо Юмо чыланда дене пырля лиеш. Аминь.


*а 15:3 Пс 68:10.

*б 15:9 Пс 17:50.

*в 15:10 Втор 32:43.

*г 15:11 Пс 116:1.

*д 15:12 Ис 11:10.

*е 15:21 Ис 52:15.

предыдущая глава Глава 15 следующая глава