Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН РИМЛЯН-ВЛАКЛАН КОЛТЫМО СЕРЫШЫЖЕ

Глава 12

1-8 Христос дене у илыш. 9-21 Молым йӧратыме нерген.

1Иза-шольо-влак‚ Юмын шӱм порылыкшо дене мый тендам сӧрвалем: капдам илыше, святой, Юмылан келшыше надыр семын пуыза. Тыге те Юмылан шот дене служитледа.2Тиде саманлан ида келыштаралт‚ а ушдан уэммыж дене вашталт толза. Юмын эрыкше могай, мо поро‚ келшыше да чыла шотыштат сай манын, тунам шонкален, шымлен кертыда.

3Юмын мылам пуымо порылыкшо дене чылаланда ойлем: шонкалымаштыда шкендам утыждене кӱшкӧ ида шынде‚ но шот дене, кажнылан Юмын пуымо ӱшанымаш виса дене шоныза.4Кузе мемнан ик капыште шуко ужаш уло да чыла ужаш ик семын огеш кучылталт‚5тугак меат, шукын улына гынат, Христос дене ушнен, ик кап улына‚ а посна-посна – икте-весынан ужашыже.6Юмын кажныланна пуымо порылыкшо дене моштымашна тӱрлӧ. Кӧн пророкла ойлен моштымашыже уло гын‚ ӱшанымаш висаж дене келшышын, пророкла ойлыжо;7служитлен моштымаш пуалтын гын‚ тек служитла; туныктен моштымаш пуалтын гын‚ тек туныкта‚8кумылаҥден моштымаш гын‚ тек кумылаҥда; кӧ шкенжыным пуа гын‚ тек поро чон дене пуа; вуйлатен моштымаш пуалтын гын‚ тек шке сомылжым тыршен шукта; полшен моштымаш пуалтын гын‚ тек тидым куанен ышта.

9Тек тендан йӧратымашда поро чон гыч лектеш‚ осал деч кораҥ коштса‚ поро деке пижса.10Икте-весыдам иза-шольо семын ныжылгын йӧратыза‚ пагалымаште икте-весыдам ончылтыза.11Йолагай огыл, тыршыше лийза‚ йӱлышӧ чон дене Господьлан служитлыза.12Ончыкылан ӱшанда улмылан куаныза‚ нелылык годым чытыше лийза‚ эре кумалза.13Кӱлешышт годым святой-влаклан полшыза‚ корныеҥ-влакым кумылын ончыза.14Тендам поктылшо-влаклан порым тыланыза; ида карге‚ а порым тыланыза.15Куаныше дене куаныза‚ шортшо дене шортса.16Икте-весе дене келшен илыза‚ ида кугешныл‚ чытен илыше-влак гай лийза, шкендам шке ушанлан ида шотло.17Осаллан осал дене нигӧлан ида тӱлӧ‚ а чыла еҥын шинча ончылныжо мо поро, тудым ышташ тыршыза.18Кертыда гын, лийме семын, чыла еҥ дене тынысын илыза.19Шергакан иза-шольым-влак‚ шкендан верч ӱчым ида шукто‚ Юмын шыдыжлан верым кодыза. Возымо: «Ӱчым Мый шуктем‚ Мый пӧртылтем», ойла Господь.20А «тушманет шужышо гын‚ тудым пукшо‚ йӱмыжӧ шуэш гын‚ йӱктӧ: тидым ыштен‚ тудын вуйжылан йӱлышӧ тулшолым погет».21Осаллан шкендым сеҥаш ит пу‚ осалым поро дене сеҥе.


*а 12:2 Эрык – воля, желание.

*б 12:19 Втор 32:35.

*в 12:20 Притч 25:21-22.

предыдущая глава Глава 12 следующая глава