Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН РИМЛЯН-ВЛАКЛАН КОЛТЫМО СЕРЫШЫЖЕ

Глава 10

5-21 Кеч-кӧ утаралтын кертеш

1Иза-шольо-влак‚ Израиль утарыме лийже – тиде мыйын шӱм кумылем, тидым Юмо деч сӧрвалем.2Мый таныклем: Юмо верч тыршымашышт уло‚ но тидыже тичмаш умылымашеш ок негызлалт.3Вет нуно Юмын чын корныжым огыт пале‚ шкеныштыным пеҥгыдемдаш тӧчат‚ Юмын чынжылан мут колыштшо лийын огытыл.4Вет законын мучашыже – Христос‚ сандене ӱшаныше кажне айдеме чыныш лукталтеш.

5Законлан эҥертыме дене чыныш лекме нерген Моисей тыге воза: «Законын йодмыжым шуктышо айдеме тудлан кӧра илышым налеш».6А тугай чыныш лекмаш, могайже ӱшанымашлан эҥерта, тыге ойла: «Пылпомышко кӧ кӱза» – вес семынже, Христосым пылпомыш гыч кӧ волта – «манын, шке шӱмыштет ит ойло».7Але «Кӧ пундашдыме келгытыш вола?» Вес семынже‚ Христосым колымаш гыч кӧ нӧлта?8Возымаш мом ойла?
«Шомак тый денет лишне –
тыйын умшаштет да шӱмыштет».
Тыште мемнан увертарыме ӱшанымаш шомак нерген ойлалтеш.9Иисусым Господь манын, тый йылмет дене еҥ ончылно почын ойлет да‚ Юмо Тудым колымаш гыч ылыжтен манын‚ шӱмет дене ӱшанет гын‚ утаралтат.10Вет шӱм дене ӱшанымаш чыныш лекмашке наҥгая‚ йылме дене почын ойлымаш – утаралтмашке.11Возымаш ойла: «Тудлан ӱшаныше кеч-кӧат намысыш ок пуро».12Тыште иудей ден эллин коклаште ойыртем уке: чыланнанат Господьна икте. Кӧ Тудын деч полышым йодын кумалеш‚ Господь поянлыкше гыч чылалан пуа.13Вет «Господь деч полышым йодшо кеч-кӧат утарыме лиеш».

14Но кӧлан огыт ӱшане‚ кузе Тудын деч полышым йодын кертыт? Кӧн нерген колын огытыл гын‚ кузе Тудлан ӱшанен кертыт? Увертарыше уке гын‚ кузе нуно колын кертыт?15А колтымо огытыл гын‚ кузе увертарен кертыт? Тыге возымо: «Тыныслык нерген увертарыше-шамычын да поро уверым кондышо-влакын толмышт могай сае!»16Но чылан огыл Поро Уверын мутшым колыштыныт. Исаия ойла: «Господь! Мемнан уверланна кӧ ӱшанен?»17Тыгеже‚ ӱшанымашыже уверым колмо дене шочеш, а уверым колмаш Юмын шомакше гоч толеш.18Но йодам: але нуно колын огытыл? Уке, колыныт:
«Нунын йӱкышт уло мланде мучко шарлен‚
мутышт тӱня тӱр марте шуын».
19Адак йодам: але Израиль умылен огыл? Эн ондак Моисей каласен:
«Тугай калык дене, могайже чынжым калыкат огыл,
Мый тендам кӧранаш таратем‚
шонен моштыдымо калык дене тендам шыдештарем».
20Исаия гын лӱдде ойла:
«Кӧ Мыйым кычалын огыл‚ тудо муын‚
кӧ Мыйын нергенем йодын огыл‚
тудлан Шкемым палдаренам».
21Израиль нерген гын ойла: «Мый мут колыштдымо да ваштареш шогышо калык деке кечыгут кидем шуен шогенам».


*а 10:5 Лев 18:5.

*б 10:6-8 Втор 9:4‚ 30:12-14.

*в 10:11 Ис 28:16.

*г 10:13 Иоиль 2:32.

*д 10:15 Ис 52:7.

*е 10:16 Ис 53:1.

*ж 10:18 Пс 18:5.

*з 10:19 Втор 32:21.

*и 10:20 Ис 65:1.

*к 10:21 Ис 65:2.

предыдущая глава Глава 10 следующая глава