Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН РИМЛЯН-ВЛАКЛАН КОЛТЫМО СЕРЫШЫЖЕ

Глава 9

1-18 Израиль да Юмын сӧрымыжӧ. 19-29 Юмын судшо да порылыкшо. 30– 10:4 Израильын ӱшаныдымыже.

1Мый, Христос дене ушнен, чыным ойлем‚ ом шойышт‚ Юмын Шӱлышын виктарыме совестемат тидымак ончыкта:2мыйын кугу ойгем уло, шӱмыштем пытыдыме йӧсылык.3Вет шочмо калыкысе еҥ-влак олмеш мый шкежак Христос деч ойырен кораҥдыме лийнем ыле.4Нуно Израиль калык улыт: нуным эргылыкеш налме, Юмын чапше да сугынь-влак – нунын; законым‚ служитлыме радамым да сӧрымаш-влакым нунылан пуымо.5Нуно ача-влакын тукымышт улыт‚ нунын дечак Христос айдеме семын шочын, Тудо – чыла ӱмбалне Юмо. Тудо курымеш моктымо лийже! Аминь.

6Туге гынат Юмын шомакше куатшым йомдарен огыл. Вет кӧ Израиль тукым деч, чылан огыл израильтян улыт,7Авраамын урлыкшо деч шочшо чылан огыл тудын икшывыже улыт. Юмо тудлан каласен: «Исаак деч Мый тылат тукымым пуэм».8Вес семынже‚ тудын капше деч шочшо-влак огыл Юмын икшыве улыт‚ а Юмын сӧрымӧ почеш шочшо-влак тукымлан шотлалтыт.9А сӧрымаш тыгае: «Палемдыме жапыште мый пӧртылам‚ тунам Сарран эргыже лиеш».10Но тиде чыла огыл, эше Ревекка лийын, тудо мемнан Исаак ачана деч нелемын.11-12Йыгыр эрге шочмо деч ончычак‚ нунын иктаж-мом сайым але осалым ыштымышт деч ондак‚ Ревеккалан каласыме улмаш: «Кугурак эргыч изиракшылан тарзыланаш тӱҥалеш». Юмын эрыкше умбакыжат ойырен налмашеш негызлалтше манын, Тудо тидым каласен – чыла тидыже паша деч огыл‚ а Ӱжшӧ деч.13Тыге возымо:
«Иаковым Мый йӧратенам‚
а Исавым ужмем шуын огыл».
14Мом каласена? Юмо ала чын огыл ышта? Уке.15Вет Моисейлан Тудо ойлен:
«Кӧм Мый серлагем‚ тудым серлагем‚
кӧм чаманем, тудым чаманем».
16Тыгеракын‚ тидыже айдеме шонымо да тыршыме дене огыл‚ а Юмын чаманымыж дене лиеш.17Возымаште Юмо фараонлан тыге ойла: «Тыйын гоч шке вием ончыкташ да чумыр мланде мучко лӱмем нерген палдараш манын‚ Мый тыйым кӱшкӧ нӧлталынам».18Тыгеракын‚ Юмо, кӧм шона‚ чамана‚ кӧм шона – кӱэмалтше шӱманым ышта.

19Ынде тый мый дечем йодат: «Вара молан Юмо мемнам шылтала? Иктаж-кӧ Тудын эрыкше ваштареш шоген кертеш мо?»20А кӧ улат тый‚ айдеме‚ Юмылан торешланаш? Але вара шун ате ыштышыжлан ойла: «Молан тый мыйым тыгайым ыштенат?»21Кӧршӧк ыштышын ик шун денак тӱрлӧ атым ышташ эрыкше уке мо: иктыштым аклыме арвер кӱлмӧ годым кучылташлан, весыштым – тыглай жапыште кучылташлан?22-23Чаплан ончылгоч ямдылыме порылык ате-влак гоч Шкенжын чапшын уло поянлыкшым палдараш манын, Юмо, шке шыдыжым ончыкташ да куатшым палдараш шонен‚ пыташ ямде шыдылык ате-влакым чытенак чытен гын, мо вара?24Ме, иудей кокла гыч веле огыл‚ а чын Юмым палыдыме-влак кокла гычат ӱжмӧ-влак, нине порылык ате улына.25Осийын книгаштыже Юмо тыгак ойла:
«Могай калык Мыйын лийын огыл‚ тудым Шкемын манам;
кӧм йӧратен омыл‚ йӧратымем манам».
26«Кушто нунылан каласыме:
”Те Мыйын калыкем огыдал”‚
тушто нуным илыше Юмын эргыж-влак маныт».
27А Израиль нерген Исаия кычкыралеш: «Израиль эрге-влак теҥыз ошма пырче наре лийыт ыле гынат‚ шагалже веле утаралтеш.28Господь пашам мучашке шукта, чын почеш тудым писын ышта; жапым шуйкалыде, Господь мланде ӱмбалне шке пашажым ышта».

29Исаия ончылгоч каласыме семын:
«Господь Саваоф мемнан деч урлыкым ок кодо ыле гын‚
ме Содом гай лийынна ыле,
Гоморра гайыш савырненна ыле».

30Мом каласена? Чын Юмым палыдыме-влак чыныш лукталташ тыршен огытыл, но чыныш лукталтыныт, нунын чыныш лекмышт ӱшанымашеш негызлалтын.31Израиль гын чыныш лекме закон деке шуаш тыршен‚ но тушко шуын огыл.32Молан? Тидлан: Израиль ӱшанымылан огыл‚ а законым шуктымылан эҥертен. Тудо шӱртньымӧ кӱэш шӱртнен.33Тидын нерген тыге возымо:
«Теве Сионышто шӱртньымӧ кӱм,
алгаштаралтме кӱм пыштем‚
тудлан ӱшаныше намысыш ок пуро».


*а 9:7 Быт 21:12.

*б 9:9 Быт 18:10.

*в 9:11-12 Быт 25:23. Эрык – воля, желание.

*г 9:13 Мал 1:2-3.

*д 9:15 Исх 33:19.

*е 9:17 Исх 9:16.

*ж 9:19 Эрык – воля, желание.

*з 9:25-26 Ос 2:23‚ 1:10.

*и 9:27-28 Ис 10:22-23.

*к 9:29 Ис 1:9.

*л 9:33 Ис 28:16.

предыдущая глава Глава 9 следующая глава