Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН РИМЛЯН-ВЛАКЛАН КОЛТЫМО СЕРЫШЫЖЕ

Глава 8

1-17 Юмын Шӱлыш почеш илымаш. 18-30 Ончыкылык чап. 31-39 Юмын йӧратымашыже.

1Тыгеракын‚ кӧмыт Христос Иисус дене ушнен шогат да кап ден чонын йодмышт почеш огыл‚ а Шӱлыш почеш илат‚ нунылан ынде нимогай судитлымашат уке.2Христос Иисус гоч илышым пуышо Шӱлыш закон мыйым языкын да колымашын законжо деч утарен.3Айдемын кап ден чонжо начар улмылан кӧра мом закон ыштен кертын огыл‚ Юмо тудым ыштен: язык верч Тудо шке Эргыжым языкан айдеме гайым колтен да тиде айдеме кап дене языкым титаканыш луктын.4Тыгеракын, законын йодмыжо мемнан, кап ден чон йодмо почеш огыл, а Шӱлыш почеш ыштыше-влакын, илышыште шукталтын.5Кап ден чон йодмо почеш илыше-влак кап ден чонысо нерген веле шонат‚ а Шӱлыш почеш илыше-влак – Шӱлыш дене кылдалтше нерген.6Кап ден чонын шонымыжо – колымаш‚ а Шӱлышын шонымыжо – илыш да тыныслык.7Кап ден чонын шонымыжо Юмын ваштареш тушманлымаш лиеш‚ вет тудо Юмын законым ок колышт да колыштынжат ок керт.8Кап ден чон йодмо почеш илыше-влак Юмылан йӧрышӧ лийын огыт керт.

9А Юмын Шӱлыш тендан кӧргыштӧ ила гын‚ те кап ден чон йодмо почеш огыл‚ а Шӱлыш почеш иледа. А кӧн кӧргыштӧ Христосын Шӱлышыжӧ уке‚ тудо Христосын огыл.10Христос тендан дене гын‚ капда языклан колышо‚ а чын ыштымылан кӧра Шӱлыш тыланда илышым конда.11Иисусым колымаш гыч Ылыжтышын Шӱлышыжӧ тендан кӧргыштыда ила гын‚ Христосым колымаш гыч Ылыжтыше кӧргыштыда илыше Шӱлышыж дене тенданат колышаш капдам илышым ышта.

12Тугеже‚ иза-шольо-влак‚ ме кап ден чонлан огыл парыман улына: ме кап ден чонын йодмышт почеш илышаш огынал.13Вет кап ден чон йодмо почеш иледа гын‚ тендам колымаш вуча‚ а кап ден чонын ыштымыжым Шӱлыш дене пытареда гын‚ илаш тӱҥалыда.14Кӧм Юмын Шӱлыш вӱда, чылан Юмын эргыже улыт.15Адак лӱдын илаш огыл манын‚ те кул шӱлышым огыл‚ а эргылык Шӱлышым налында, Тудын дене ме «Авва! Ачай!» манын ӱжына.16Юмын шочшыжо улмынам Юмын Шӱлыш Шкежак мемнан шӱм-чон шӱлышна дене таныкла.17Шочшыжо улына гын‚ тугеже тыгак наследник улына‚ Христос дене пырля Юмын наследникше улына. Ме Христос дене пырля орланена гын‚ Тудын дене пырля чапышкыжат шуына.

18Мый ӱшанем: мемнан илышыште почылтшаш чап дене таҥастарена гын, кызытсе жапыште орланыме – нимо.19Юмын ыштыме уло тӱня Тудын икшывыж-влакын чапланен почылтмыштым вученак вуча‚20-21вет тӱням кӱлдымашын кид йымакыже налме. Тиде шке кумылын огыл‚ а кид йымаке налшылан кӧра лийын. Шӱймашын куллыкшо гыч Юмын икшывыж-влакын эрыкышкышт да чапышкышт лукмо лиям манын, Юмын ыштыме уло тӱня шкежат ӱшана.22Ме палена‚ Юмын ыштыме уло тӱня кызыт мартеат кечкыжеш да орлана.23Тудо шкет огыл орлана‚ а меат‚ икымше пӧлек семын Юмын Шӱлышым налше-влак‚ эргылыкеш пуртымым, капнам сулен налмым вучен, чон кӧргына дене кечкыжына.24Вет ӱшанен вучымо дене ме утарыме лийынна‚ а ӱшанен вучымын шукталтмыже коеш гын‚ ӱшанен вучымаш уке. Мо шинча ончылно шога, кӧ тудым ӱшанен вуча?25Но мом огына уж, тудым ӱшанен вучена гын, чытенак вучена.

26Шӱлышат мыланна, начар-влаклан, полша‚ вет мо нерген да кузе кумалшашымат ме огына пале. Шӱлыш Шкежак каласен мошташ лийдыме шӱлалтыш дене мемнан верч тырша.27Шӱлышын шонымыжым шӱм-чоннам шымлыше Юмо пала‚ вет Шӱлыш святой-влак верч Юмын эрыкше дене келшышын тырша.

28Ме палена: Юмым кӧ йӧрата да кӧм Тудо шке эрыкше почеш ӱжын‚ нунылан чылажат порылан лиеш.29Эргыже шуко иза-шольо коклаште икымше шочшо лийже манын, ончылгоч пален налме еҥже-влакым Юмо Шкенжын Эргыж гай лияш ончылгоч палемден.30А кӧм Юмо ончылгоч палемден‚ тудымак ӱжын; кӧм ӱжын‚ тудымак чыныш луктын; а кӧм чыныш луктын‚ тудланак Шкенжын чапшым пӧлеклен.

31Ме тидлан мом каласена? Юмо мемнан верч гын‚ кӧ мемнан ваштареш лийын кертеш?32Тудо шке Эргыжымат чаманен огыл, но чыланна верч пуэн гын‚ Тудын дене пырля мыланна чыла молымат ок пӧлекле мо?33Юмын ойырен налме-влакым кӧ титаклен кертеш? Нуным Юмо чыныш луктеш!34Кӧ титаканыш луктын кертеш? Христос Иисус, Тудо колен, адакшым ылыжын. Тудак Юмын пурла могырыштыжо шинча да мемнан верч кумалеш!35Юмын йӧратымыж деч кӧ мемнам ойырен кертеш? Йӧсӧ але нелылык‚ поктылмаш але шужымаш‚ вургем ситыдымаш але шучкылык‚ але керде?36Тыге возымо:
«Тылат верч мемнам кече мучко пуштедат‚
шӱшкылшаш шорыклан шотлат».

37Но мемнам Йӧратышын полшымыж дене ме чыла годымат сеҥымашке шуына.38-39Вет мый ӱшанем: Господьна Иисус Христос гоч Юмын мыланна ончыктымо йӧратымашыж деч колымашат‚ илышат‚ Суксо-влакат‚ Тӱҥалтыш-влакат‚ Куат-влакат‚ кызытсат‚ ончыкылыкат‚ кӱкшытат‚ келгытат‚ Юмын ыштыме нимоат мемнам ойырен огыт керт.


*а 8:10 «Шӱлыш тыланда илышым конда»: тидым «шӱм-чон шӱлышда илыше» манынат кусараш лиеш.

*б 8:16 «Шӱм-чон шӱлышна дене»: тидым «шӱм-чон шӱлышланна» манынат умылаш лиеш.

*в 8:27-28 Эрык – воля, желание.

*г 8:36 Пс 43:23.

предыдущая глава Глава 8 следующая глава