Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛЫН РИМЛЯН-ВЛАКЛАН КОЛТЫМО СЕРЫШЫЖЕ

Глава 5

1-11 Юмын порылыкшылан куанымаш. 12-21 Адам ден Христос.

1Тыгеже‚ ӱшаныме дене чыныш лекмеке‚ Господьна Иисус Христос гоч Юмо дене тыныслыкна уло.2Ӱшанымыланна кӧра Христос мыланна Юмын порылыкшо деке корным почын, ме Тудын порылыкыштыжо илена да Юмын чапышкыже логалмылан ӱшаным пыштен кертмылан йывыртена.3Тидын дене веле огыл‚ нелылык денат куанена. Ме палена: нелылык деч чытымаш лектеш,4чытымаш деч – тергымым эртен кертмаш, тергымым эртен кертмаш деч – ончыкылан ӱшан.5Ончыкылан ӱшанымаш намысым ок кондо‚ вет Юмын йӧратымашыжым мыланна пуымо Святой Шӱлыш гоч шӱмышкына опталме.

6Кунам ме але вийдыме лийынна, Христос палемдыме жапыште языкан-влак верч колен.7Чын ыштыше верч иктаж-кӧ колынеже манын, мый ом шоно. Поро еҥ верч иктаж-кӧ колаш тоштын кертеш.8Но Христос эше языкан лиймына годымак мемнан верч колен‚ тидын дене Юмо мемнам йӧратымыжым ончыкта.9Тыгеже, Христосын Вӱржӧ дене кызыт чыныш лукталтмекына‚ Юмын шыдыж дечын Тудо, чынжымак, мемнам утара.10Эше Юмын тушманже лиймына годым Эргыжын колымыж гоч Тудын да мемнан коклаште сӧрасымашым ыштыме гын‚ ме сӧрасыме деч вара Эргыжын илышыж гоч чынжымак утарыме лийына.11Тиде гына огыл‚ а мыланна сӧрасымашым кондышо Господьна Иисус Христос гоч ме Юмо дене моктанена.

12Тыгеже, язык ик айдеме гоч тӱняшке толын‚ а язык гоч – колымаш‚ да чыла айдемым колымаш авалтен‚ вет чыланат языкым ыштеныт.13Закон лекме деч ончычат тӱняште язык улмаш‚ но закон уке гын‚ язык ок шотлалт.14Адам языкым ыштен, а кӧ тыгай языкым ыштен огыл гынат, нунын ӱмбалнат колымаш озаланен. Тыге лийын Адам дечын тӱҥалын Моисей марте. Толшаш Айдемын ончыч пуымо сынже Адам лийын.

15Но Юмын пӧлекшым Адамын сулыкшо дене таҥастарашат ок лий. Вет ик айдемын сулыкшылан кӧра шукын коленыт гынат‚ ик Айдемын‚ Иисус Христосын, порылыкшылан кӧра Юмын порылыкшо ден пӧлекше шуко еҥлан эшеат лыҥ лийыныт.16А Юмын пӧлекшым тиде ик айдемын языкше кушко шуктымо дене таҥастараш ок лий: ик сулык гыч судитлымаш да титаканыш лукмаш лиеш‚ а Юмын порылыкшылан кӧра шуко сулык гыч чыныш лукмаш лиеш.17Иктын сулыкшылан кӧра колымаш тиде ик айдеме гоч озаланаш тӱҥалын гын‚ Юмын порылыкым да чыныш лукмын пӧлекшым лыҥ налше-влак, чынжымак, ик Айдеме, Иисус Христос, гоч илышыште кугыжаланаш тӱҥалыт.

18Тыгеракын, ик сулык гоч кузе чыла еҥ титаканыш лукталтеш‚ тугак ик айдемын чын пашаж дене чыла еҥлан чыныш лукмаш да илыш лиеш.19Кузе ик айдемын мут колыштдымыжо шукым языканым ыштен‚ тугак Иктын мут колыштмыжо шукым чыныш луктеш.20Сулык шукемже манын, закон лектын. А кушто язык шукемын‚ тушто Юмын порылыкшат моткоч лыҥ лийын.21Кузе язык озаланен да колымашке конден‚ тугак Юмын порылыкшат чын ыштымаш гоч озаланаш тӱҥалын да мемнан Господьна Иисус Христос гоч курымашлык илышыш наҥгая.


предыдущая глава Глава 5 следующая глава